ភ្នំពេញៈ លោកនាយករដ្ឋមន្ត្រី ហ៊ុន សែន ប្រាប់ឱ្យពលរដ្ឋ ត្រូវយកចិត្តទុកដាក់លើវិធានការសុខាភិបាល ដើម្បីបង្ការការឆ្លងមេរោគកូវីដ ១៩ ហើយថា កម្ពុជានៅតែមានការប្រុងប្រយ័ត្នជានិច្ច ពីការឆ្លងរាលដាលនៃមេរោគនេះ ដោយនៅតែបន្តការធ្វើតេស្តរកមេរោគកូវីដ ១៩ មុននឹងចូលរួមក្នុងកម្មវិធីណាមួយ ខណៈមេរោគនេះបានបំប្លែងខ្លួនថ្មីជាបន្តបន្ទាប់ផងដែរ។
ប្រមុខរដ្ឋាភិបាលកម្ពុជា លោក ហ៊ុន សែន បញ្ជាក់បែបនេះ នៅពេលលោកអញ្ជើញចូលរួមជាអធិបតីភាពក្នុងពិធីប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជា (CUS) ជិត ៧ ពាន់នាក់ នាព្រឹកថ្ងៃទី ២៣ ខែមករា ឆ្នាំ ២០២៣។
លោកថ្លែងថា៖ «យើងនៅតែមានការប្រុងប្រយ័ត្ន មុននឹងចូលរួមក្នុងកម្មវិធីណាមួយ គឺចាំបាច់ត្រូវធ្វើតេស្ត ដើម្បីបញ្ចៀសនូវហានិភ័យណាមួយដែលអាចកើតមានឡើង នៅក្នុងកិច្ចខិតខំប្រឹងប្រែង ដើម្បីទប់ស្កាត់កូវីដ ១៩ និងយកឈ្នះនៅលើសមរភូមិកូវីដ តែយើងមិនទាន់យកឈ្នះនូវសង្រ្គាមកូវីដនោះទេ»។
វីរុសកូវីដ ១៩ បានបំប្លែងខ្លួនជាច្រើនប្រភេទ ហើយនៅថ្ងៃខាងមុខ ក៏មិនមានអ្នកណាដឹងថា តើមេរោគនេះនឹងមានការវិវឌ្ឍទៅជាអ្វីទៀតនោះទេ ដែលជាហេតុលោកនាយករដ្ឋមន្ត្រីហ៊ុន សែន នៅតែបន្តអំពាវនាវឱ្យប្រជាពលរដ្ឋទាំងអស់ បន្តយកចិត្តទុកដាក់លើវិធានការសុខាភិបាល និងបន្តទទួលយកវ៉ាក់សាំងដើម្បីការពារខ្លួនផងដែរ។
លោក ហ៊ុន សែន បានថ្លែងថា៖ «វ៉ាក់សាំង គឺជាផ្នែកមួយដ៏សំខាន់ក្នុងការទប់ស្កាត់នូវការឆ្លង ឬទប់ស្កាត់មិនឱ្យឈានទៅរកភាពធ្ងន់ធ្ងររហូតដល់ការស្លាប់នោះដែរ។ នៅក្នុងតំបន់ ក៏ដូចជានៅលើពិភពលោក នៅសល់មនុស្សស្លាប់ក្នុង១ថ្ងៃៗ រាប់ពាន់នាក់នៅឡើយទេ ដែលកម្ពុជាក៏ត្រូវតែបន្តប្រុងប្រយ័ត្នជាប់ជានិច្ចផងដែរ»។
ទាក់ទងនឹងមេរោគកូវីដ ១៩ នេះដែរ លោកស្រីឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខ័ណ្ឌទូទាំងប្រទេស(គ.វ.ក-១៩)បានថ្លែងនៅថ្ងៃទី២០ ខែមករា ថា ភាគច្រើននៃប្រជាពលរដ្ឋ មានការយកចិត្តទុកដាក់ខ្ពស់ក្នុងការមកទទួលយកវ៉ាក់សាំងកូវីដ១៩ ប៉ុន្តែពលរដ្ឋមួយចំនួន នៅមានភាពអល់អែកក្នុងការចាក់វ៉ាក់សាំងនេះ។
លោកស្រីថ្លែងថា៖«ខ្ញុំនៅតែអំពាវនាវដល់ប្រជាពលរដ្ឋ មកទទួលយកការចាក់វ៉ាក់សាំងកូវីដ១៩ឱ្យបានគ្រប់ៗគ្នាដើម្បីការពារសុខភាព និងអាយុជីវិតរបស់ខ្លួនឯងទេ ហើយសូមបងប្អូនកុំមានការព្រួយបារម្ភពីការខ្វះវ៉ាក់សាំង គឺយើងមានវ៉ាក់សាំងចាក់គ្រប់គ្រាន់ តែអ្វីដែលសំខាន់បងប្អូនត្រូវមកចាក់តាមវេនរបស់បងប្អូនដែលត្រូវទទួលយក»។
បើយោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី២២ ខែមករា ឆ្នាំ២០២៣ លទ្ធផលចាក់វ៉ាក់សាំង ធៀបនឹងចំនួនប្រជាជនសរុប១៦លាននាក់ ប្រជាពលរដ្ឋដែលមកទទួលយកការចាក់វ៉ាក់សាំង មានចំនួន ៩៥,៣៤%។
របាយការណ៍បានឱ្យដឹងទៀតថា សម្រាប់អ្នកដែលបានចាក់ដូសទី៣ មានជាង១០,៤៧លាននាក់ អ្នកចាក់ដូសទី៤ មានជាង៤,៥លាននាក់ អ្នកចាក់ដូសទី៥ បានជាង ១, ៤លាននាក់ និងអត្រាអ្នកដែលបានចាក់ដូសទី៦ មានជាង៥ម៉ឺននាក់ផងដែរ៕