គ្រូកាត់សក់សិស្សដែលបណ្ដាលឱ្យមានការរិះគន់។ រូបថត FB
ភ្នំពេញៈ មន្ត្រីនៃក្រសួងអប់រំ យុវជន និងកីឡា បានថ្លែងថា នឹងចុះសិក្សាករណីការអនុវត្តវិន័យរបស់លោកគ្រូអ្នកគ្រូ និងក្រុមប្រឹក្សាយុវជនរបស់វិទ្យាល័យសម្តេចតេជោហ៊ុនសែនសំពៅលូន ស្ថិតក្នុងខេត្តបាត់ដំបង ក្រោយបានធ្វើសកម្មភាពឈូសសក់សិស្សប្រុសដោយប្រើកន្រៃ្តអេឡិចត្រូនិក ទោះបីជាសក់របស់ពួកគេខ្លី និងរៀបរយក៏ដោយ។
ការចុះសិក្សាករណីនេះ បានធ្វើឡើងបន្ទាប់ពីមានប្រតិកម្មច្រើនពីអ្នកប្រើប្រាស់បណ្តាញសង្គមហ្វេសប៊ុក ដោយបានបង្ហាញយោបល់យល់ឃើញថា ទង្វើរបស់គ្រូធ្វើបែបនោះ គឺជារឿងមិនត្រឹមត្រូវ ក្រោយមានការបង្ហោះរូបជាច្រើនសន្លឹកក្នុងការចុះអនុវត្តវិន័យនៅក្នុងសាលាកាលពីថ្ងៃទី ២៣ ខែមករា ឆ្នាំ ២០២៣។
គិតត្រឹមថ្ងៃទី ២៤ មករានេះ ការបង្ហោះរបស់ទំព័រហ្វេសប៊ុកវិទ្យាល័យសម្តេចតេជោហ៊ុនសែនសំពៅលូន នូវរូបជាច្រើនសន្លឹកនេះត្រូវបានចែករំលែកបន្តជាង ២២ ០០០ ដង និងមានចូលបញ្ចេញមតិជាង ១២ ពាន់មតិ ដោយភាគច្រើនបានបង្ហាញការមិនពេញចិត្ត និងប្រតិកម្មទៅនឹងសកម្មភាពទាំងនោះថា ជាទង្វើគ្មានសីលធម៌ មិនត្រឹមត្រូវ។
គណនី១ក្នុងចំណោមគណនីទាំងនោះដែលមានឈ្មោះ Nan Veng បានសរសេរថា លោកគ្រូអ្នកគ្រូ គួរតែឈប់អប់រំមនុស្សតាមក្បួនចាស់គំរឹលនេះតទៅទៀតទៅ។ គណនីដដែលនេះ បានបន្តថា លោកគ្រូអ្នកគ្រូ ដឹងច្បាស់ណាស់ថា ក្នុងសង្គមជាក់ស្ដែង មនុស្សល្អមិនល្អ វាមិនអាស្រ័យទៅលើសក់ក្បាលនេះទេ។
គណនីឈ្មោះ Nan Veng បានបញ្ជាក់ថា៖ «លោកគ្រូអ្នកគ្រូក៏ធ្លាប់ក្មេងដែរ អីឡូវចាស់ៗធ្វើដល់គ្រូគេទៅហើយ មនុស្សយើងនិយាយគ្នាបាន បង្រៀនគេឱ្យមានសីលធម៌ក្នុងខ្លួន តែភ្លេចថា ខ្លួនឯងកំពុងតែប្រព្រឹត្តអំពើគ្មានសីលធម៌ "ដើរកាត់សក់ក្បាលគេ"»។
ចំណែកគណនី ១ ទៀត ដែលមានឈ្មោះថា ធីង អ៊ី បានសរសេរបញ្ចេញមតិដែរថា៖ «កុំផ្តល់សម្ពាធឱ្យសិស្ស កុំឱ្យពួកគេគិតថា ទៅសាលាដូចទៅជាប់ទោស ត្រូវភិតភ័យនិងប្រុងប្រយ័ត្នគ្រប់ពេលវេលា។ ហើយវិន័យ សីលធម៌ និងការខិតខំរៀនសូត្រ វាមិនស្ថិតនៅលើសក់ទេ មនុស្សម្នាក់បើចង់រៀនក្រេបយកចំណេះដឹង ទោះទុកសក់វែងដល់ស្មាក៏នៅតែរៀនចូលដែរ។ តែបើមិនចង់ហើយ ទោះលោកគ្រូអ្នកគ្រូ កោរសក់ពួកគេអស់ក៏នៅតែមិនរៀនដដែលហ្នឹង ហើយជាក់ស្តែងដូចក្នុងរូបនេះ សក់ពួកគេខ្លីសមសួនហើយ មិនបាំងត្រចៀកទេ ហេតុអីក៏នៅកាត់ទៀត?»។
ក្រៅពីមានប្រតិកម្មពីសំណាក់អ្នកលេងបណ្តាញទំនាក់ទំនងទូទៅ សកម្មភាពនេះ ក៏ត្រូវបានអ្នកស្រី ប៊ុន ចាន់និមល ដែលជាម្ចាស់ផលិតកម្មភាពយន្ត Sastra Film បានបង្ហាញនូវការមើលឃើញដែរថា ការអប់រំបច្ចុប្បន្ន គួរតែធ្វើឡើងតាមវិធី ១ ត្រជាក់ ដែលផ្ដោតសំខាន់លើការពន្យល់ហេតុផលនិងការណែនាំឱ្យបានច្រើនជាងការសម្លុត បង្ខិតបង្ខំ ឬការបំបាក់មុខសិស្សនៅក្នុងចំណោមមហាជន។
លោកស្រីបានបន្តថា មានអត្ថបទស្រាវជ្រាវ ១ របស់សាកលវិទ្យាល័យហាវើដ បានបង្ហាញថា៖ ការអនុវត្តវិន័យតឹងរ៉ឹងជ្រុលពេក មិនត្រឹមតែមិនអាចបង្កើតទម្លាប់ល្អឱ្យសិស្សទេ ប៉ុន្តែថែមទាំងជះឥទ្ធិពលអវិជ្ជមានដល់ជីវិតពួកគេក្នុងពេលអនាគតទៀតផង។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់ ភ្នំពេញ ប៉ុស្តិ៍ នៅថ្ងៃទី ២៤ មករាថា ក្រសួងអប់រំ យុវជន និងកីឡា កំពុងពិនិត្យករណីនេះ ស្របពេលក្រសួងរង់ចាំចំណាត់ការ និងការឆ្លើយតបរបស់គណ:គ្រប់គ្រងគ្រឹះស្ថានសិក្សានេះដោយផ្ទាល់។
លោក បញ្ជាក់ថា៖ «ជាទូទៅគណ:គ្រប់គ្រងគ្រឹះស្ថានសិក្សា ត្រូវដោះស្រាយករណីបាតុភាពផ្សេងៗនៅតាមគ្រឹះស្ថានសិក្សា ដោយចាត់វិធានការតាមទិដ្ឋភាពជាក់ស្តែង។ បើចាំបាច់ គណ:គ្រប់គ្រងគ្រឹះស្ថានសិក្សា អាចសហការជាមួយមន្ទីរអប់រំ យុវជន និងកីឡាទាំង ២៥ ខេត្ត-រាជធានី ដែលជាសេនាធិការតាមឋានានុក្រមនៃក្រសួងអប់រំ យុវជន និងកីឡា»។
យោងតាមរបាយការណ៍ របស់វិទ្យាល័យសម្តេចតេជោហ៊ុនសែនសំពៅលូនបានឱ្យដឹងកាលពីម្សិលមិញថា កាលពីថ្ងៃទី ២៣ ខែមករា ឆ្នាំ ២០២៣ លោកគ្រូទទួលបន្ទុកខាងវិន័យ និងក្រុមប្រឹក្សា យុវជនបានចុះពង្រឹងវិន័យក្នុងសាលាតាមរយៈការត្រួតពិនិត្យទៅលើសម្លៀកបំពាក់ ការតុបតែង ខ្លួន ក្រចកដៃ ក្រចកជើង និងសក់ក្បាល។
របាយការណ៍នេះបានបញ្ជាក់ថា៖ «ក្នុងពេលអនុវត្តការពង្រឹងវិន័យនេះឃើញថា កូនៗ សិស្សានុសិស្សមួយចំនួនមានសក់មិនទាន់សមរម្យនៅឡើយទើបលោកគ្រូទទួលបន្ទុកខាងវិន័យ កាត់សក់តែម្តង»៕
វីដេអូ៖
