ភ្នំពេញៈ គិត​ត្រឹម​ថ្ងៃទី​​ ២៤ ខែមករា​ឆ្នាំ​ ២០២៣ រាជរដ្ឋាភិបាល​កម្ពុជា​បាន​ចំណាយ​ថវិកា​ជាង​ ៩៣០​ លាន​ដុល្លារ​អាមេរិក ​សម្រាប់​ឧបត្ថម្ភ​សាច់ប្រាក់​ជូន​គ្រួសារ​ក្រីក្រ និង​ជន​ងាយ​រងគ្រោះ​អំឡុងពេល​ប្រយុទ្ធ​នឹង​ជំងឺ​កូ​វីដ​ ១៩ ដែល​ក្នុងនោះ​មាន​ប្រជាពលរដ្ឋ​ជិត​ ២,៨​ លាន​នាក់​បានទទួល​ពី​ការឧបត្ថម្ភ​នេះ​។​

​សេចក្តីជូនដំណឹង​រប​ស់​ក្រសួង​សង្គមកិច្ច អតីតយុទ្ធជន និង​យុវនីតិសម្បទា បានឱ្យដឹងថា គិត​ចាប់ពី​ថ្ងៃទី​២៥ ខែមិថុនា ឆ្នាំ​ ២០២០ ដល់​ថ្ងៃទី​ ២៤ ខែមករា ឆ្នាំ​ ២០២៣ រដ្ឋាភិបាល​កម្ពុជា​បាន​អនុវត្ត​កម្មវិធី​ឧបត្ថម្ភ​សាច់ប្រាក់​ជូន​គ្រួសារ​ក្រីក្រ និង​ជន​ងាយ​រងគ្រោះ​ក្នុងអំឡុងពេល​ប្រយុទ្ធ​ជាមួយ​កូ​វីដ​ ១៩ មាន​ចំនួន ​១១​ ជុំ និង​ ៣១ ​លើក ដោយ​ក្នុងនោះ​រដ្ឋ​បាន​ចំណាយ​ទឹកប្រាក់​ចំនួន​ ៩៣១,៧១​ លាន​ដុល្លារ​។

​ក្រសួង​បន្តថា ក្នុងនោះ​ចំនួន​សមាជិកគ្រួសារ​ស​រុ​ប​ដែល​ទទួលបាន​ពី​ការឧបត្ថម្ភ​នេះ​មាន​ចំនួន ២ ៧៨៨ ០៦៥ ​នាក់​នៃ​ចំនួន​ ៧០៦ ៦៤៨ ​គ្រួសារ​។ ពលរដ្ឋ​ដែល​ទទួលផល​ក្នុងនោះ​កុមារ​ចាប់ពី​អាយុ​ ០-៥​ ឆ្នាំ មាន​ចំនួន​ ១៦៥ ៦៤៣​ នាក់ មនុស្ស​វ័យចាស់​អាយុ​ពី​ ៦០ ​ឆ្នាំ​ឡើងទៅ​ចំនួន ៣៦៦ ១៥៨​ នាក់ ជន​មាន​ពិការភាព​ចំនួន ៦៤ ៥៧៦​ នាក់ ព្រមទាំង​ផ្តល់ជូន​ដល់​គ្រួសារ​ដែលមាន​ជំងឺអេដស៍​មាន​ប្រមាណ ២ ០៣៦​ នាក់​ផងដែរ​។​

​សម្រាប់​ការបើក​ផ្តល់ប្រាក់​ឧបត្ថម្ភ​ជុំ​ទី​ ១២ លើក​ទី ១ ​ចាប់ផ្តើម​ពីថ្ងៃ​ទី ​២៥ ខែមករា ឆ្នាំ ​២០២៣ រហូតដល់​ថ្ងៃទី​ ២៤​ ខែកុម្ភៈ ឆ្នាំ​ ២០២៣ ដែលមាន​រយៈពេល​ ៣០ ​ថ្ងៃ​សម្រាប់​ទៅ​ដក​ប្រាក់​។​

​ព្រម​ជាមួយគ្នានេះដែរ ក្រសួង​សង្គមកិច្ច​ស្នើ​សុំឱ្យ​អ្នកទទួលផល​ទាំងអស់​ប្រើប្រាស់​ថវិកា​ដែល​ទទួលបាន​ពី​កម្មវិធី​នេះ​ឱ្យបាន​ត្រឹមត្រូវ​ដោយ​ចៀសវាង​ការប្រើប្រាស់​ក្នុង​គោលបំណង​បម្រើឱ្យ​អបាយមុខ​ផ្សេងៗ​ដែលនាំឱ្យ​ប៉ះ​ពាល់​ដល់​ការអនុវត្ត​គោលនយោបាយ​របស់​រាជ​រដ្ឋាភិបាល​ក្នុងការ​ផ្តល់​ការអន្តរាគមន៍​ជំនួយ​ជា​សាច់ប្រាក់​នេះ​។​

​ក្រសួង​សង្កត់ធ្ងន់ថា «​ក្នុងករណី​ពិនិត្យ​រកឃើញ​មាន​អ្នកទទួលផល​ដែល​ប្រើប្រាស់​ខុស​គោលដៅ​បែបនេះ ស្នើឱ្យ​អាជ្ញាធរ​មូលដ្ឋាន​ធ្វើការ​អប់រំ​ដល់​អ្នកទទួលផល​ទាំងនោះ​ជា​លាយលក្ខណ៍អក្សរ​។ បើ​ក្នុងករណី​អ្នកទទួលផល​ទាំងនោះ​មិន​រាងចាល​នោះទេ មេឃុំ​ចៅសង្កាត់ ត្រូវធ្វើ​ការប្រជុំ​ពិភាក្សា​ជាមួយ​ក្រុមប្រឹក្សា​ក្នុងការ​ធ្វើ​បច្ចុប្បន្នភាព​បណ្ណ​ក្រីក្រ​នោះ​ឡើងវិញ​»​។​

​លោក យង់ គិ​ម​អេង ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍​និង​សន្ដិភាព បាន​ថ្លែងថា ការបន្ត​ផ្តល់ប្រាក់​ឧបត្ថម្ភ​ដល់​ជន​ងាយ​រងគ្រោះ​អំឡុងពេល​ប្រយុទ្ធ​ប្រឆាំងនឹង​ជំងឺ​កូ​វីដ​ ១៩ រហូតមកទល់​ពេលនេះ បាន​​បង្ហាញ​ពី​ការយកចិត្តទុកដាក់រ​បស់​រដ្ឋាភិបាល​ក្នុង​ការជួយ​ឱ្យ​ពលរដ្ឋ​មានលទ្ធភាព​ស្តារ​សេដ្ឋកិច្ច​គ្រួសារ​ឡើងវិញ​បន្តិច​ម្តងៗ​។​

​លោក​បាន​បញ្ជាក់ថា​៖ «​ខ្ញុំ​មានការ​ត្រេកអរ ដែល​រដ្ឋាភិបាល​នៅ​បន្ត​ជួយ​គាត់ ទោះបី​កូ​វីដ​រាង​ស្បើយ​បន្តិច​ក៏ដោយ ប៉ុន្តែ​ជីវភាព​ពលរដ្ឋ​នៅតែមាន​ការលំបាក​នៅឡើយ​។ អ្នកខ្លះ​មិនទាន់​អាច​ចាប់ផ្តើម​មុខរបរ​បានច្បាស់លាស់ អ្នកខ្លះ​ចាប់ផ្តើម​ហើយ​ដួល​ទៅវិញ​ជាពិសេស​អ្នករកស៊ី​តូចតាច​។ អ៊ីចឹង​បើ​រដ្ឋ​មិន​ផ្តល់​ការឧបត្ថម្ភ​ទេ បញ្ហា​នេះ​នឹង​ប៉ះពាល់​ដល់​ជីវភាព​រស់នៅ​ពលរដ្ឋ​ខ្លាំងណាស់​»​។​

​អគ្គនាយក​មូលនិធិ​ជាតិ​ជំនួយ​សង្គម​នៃ​ក្រសួង​សង្គមកិច្ច អតីតយុទ្ធជន និង​យុវនីតិសម្បទា លោក ឈួ​រ សុ​បញ្ញា ធ្លាប់បាន​ពន្យល់ថា ការឧបត្ថម្ភ​សាច់ប្រាក់​ដល់​ជនក្រីក្រ​បាន​ចែកចេញជា ៣ ​ប្រភេទ គឺ​ជនក្រីក្រ​នៅ​ទីប្រជុំជន​ក្នុង​រាជធានី​ភ្នំពេញ ជនក្រីក្រ​នៅ​ទីប្រជុំជន​ក្រៅ​រាជធានី​ភ្នំពេញ និង​ជនក្រីក្រ​នៅ​ជនបទ​ហើយ​គ្រួសារ​នីមួយៗ​នឹង​ទទួលបាន​សាច់ប្រាក់​ទៅតាម​ទំហំ​គ្រួសារ​។​

​លោក​ថា​៖ «​ជា​មធ្យម​នៅ​ជនបទ​ទទួលបាន ២០ ​ម៉ឺន​រៀល​ក្នុង​ ១ ​ខែ សម្រាប់ ​១ ​គ្រួសារ​។ ចំណែក​អ្នក​នៅ​ទីក្រុង​ជា​មធ្យម​ ៨០​ ទៅ​ ១០០ ​ដុល្លារ​។​ ការដែល​ផ្តល់​នេះ​មិនមែន​សុខៗ​យើង​ឱ្យ​សាច់ប្រាក់​ខុសគ្នា​ទេ ផ្តល់​នេះ​ផ្អែកលើ​មូលដ្ឋាន​នៃ​ការសិក្សា​លើ​ប្រាក់ចំណូល​។ ការសិក្សា​នេះ​មានការ​ចូលរួម​ពី​ធនាគារពិភពលោក និង​ធនាគារអភិវឌ្ឍន៍អាស៊ី​»៕