លោកនាយករដ្ឋមន្ត្រី ហ៊ុន សែន។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានណែនាំដល់លោក គី តិច ប្រធានក្រុមមេធាវីស្ម័គ្រចិត្តសម្តេចតេជោសែន ឱ្យការពារផ្លូវច្បាប់ចំពោះស្ត្រីបម្រើសេវាកម្សាន្តនៅទូទាំងប្រទេស ដើម្បីការពារសិទ្ធិស្រី្តដែលបម្រើការងារក្នុងវិស័យនេះ ខណៈដែលស្ត្រីមួយចំនួនតែងរងការបៀតបៀន។ នោះបើតាមការបង្ហោះរបស់រដ្ឋមន្ត្រីក្រសួងព័ត៌មានលោក ខៀវ កាញារីទ្ធ។
តាមរយៈសារដែលបានបង្ហោះនៅលើហ្វេសប៊ុកនោះលោកខៀវ កាញារីទ្ធ បានលើកឡើងថា៖ «សម្តេចតេជោ លើកគំនិតពីការផ្តល់មេធាវីដើម្បីការពារនារីក្នុងសេវាកម្សាន្ត (ខារ៉ាអូខេ បៀរហ្គាកាដេន អ្នករត់តុ …) ក៏ដូចជាជួយក្នុងការផ្តល់បណ្ណ ប.ស.ស. (បេឡាជាតិរបបសន្តិសុខសង្គម) ដល់ពួកគេផងដែរ»។
មតិណែនាំរបស់លោកនាយករដ្ឋមន្ត្រី ហ៊ុន សែន បានធ្វើឡើងក្នុងសម័យមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជន នៅវិមាន ៧ មករា ថ្ងៃទី ២៩ ខែមករា ឆ្នាំ ២០២៣។
ប្រធានក្រុមមេធាវីស្ម័គ្រចិត្តសម្តេចតេជោសែន លោក គី តិច បានថ្លែងប្រាប់នៅថ្ងៃទី២៩ ខែមករានេះថា បច្ចុប្បន្ននេះ ក្រុមការងារបានរៀប និងចាត់ចែងមេធាវីនៅតាមបណ្តាខេត្តរួចជាស្រេច ដើម្បីចាំជួយដល់អ្នកបម្រើការងារក្នុងវិស័យសេដ្ឋកិច្ចក្រៅប្រព័ន្ធ ជាពិសេសនោះអ្នកបម្រើការងារនៅផ្នែកសេវាកម្សាន្ត។
លោកថ្លែងថា៖ «យើងមានមេធាវីស្ម័គ្រចិត្តសម្តេចតេជោសែន និងមានការបែងចែកឱ្យទទួលបន្ទុកផ្តល់សេវា តាមខេត្ត តាមតំបន់ រួចជាស្រេច។ យើងក៏មានការរៀបចំ មធ្យោបាយសម្រាប់ទំនាក់ទំនង ដើម្បីទទួលបានសេវាការពារផ្សព្វផ្សាយជាសាធារណ: រួចរាល់»។
លោកបញ្ជាក់បន្ថែមថា ក្រុមមេធាវីស្ម័គ្រចិត្តទទួលការពារ និងជួយចំពោះស្ត្រីរងគ្រោះ ទទួលរងនូវការរំលោភបំពានសិទ្ធិ ដែលច្បាប់បានការពារ។
លោក គី តិច បានឱ្យថ្លែងនៅក្នុងកិច្ចប្រជុំបូកសរុបការងារ និងលើកទិសដៅការងារឆ្នាំ ២០២៣ ថាក្នុងរយៈពេល៤ឆ្នាំកន្លងមកនេះមេធាវីរបស់សម្តេចតេជោសែន បានធ្វើសកម្មភាពជួយជនរងគ្រោះក្រីក្រទូទាំងប្រទេសយ៉ាងផុសផុល។
លោកថ្លែងថា៖ «មេធាវីទាំងអស់ទទួលការពារក្តីជូនស្ត្រី ដែលមានជីវភាពខ្វះខាត ខ្វះការការពារសិទ្ធិតាមផ្លូវច្បាប់ ឬស្ត្រីងាយរងគ្រោះ គឺក្រុមមេធាវីសម្តេចតេជោ ការពារដោយមិនទទួលថវិកាជាសេវាអ្វីនោះទេ។ សូម្បីការតបស្នងតាមរយៈការជូនអ្វីមួយរបស់ជនរងគ្រោះពេលការពារក្តីរួចហើយ ក៏មិនអនុញ្ញាតឱ្យទទួលនោះឡើយ គឺក្រុមមេធាវីបានជួយដោយស្មោះ និងអនុវត្តតាមបទបញ្ជាររបស់សម្តេចតេជោ ហ៊ុន សែន»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ ថ្លែងថា ការផ្តល់អនុសាសន៍របស់លោកនាយករដ្ឋមន្ត្រី គឺជាចំណុចប្រសើរ ១ ដែលជាផ្នែក ១ ជួយការពារសិទ្ធិដល់ស្ត្រីបម្រើការងារនៅផ្នែកសេវាកម្សាន្ត។
ប៉ុន្តែលោកថា ដើម្បីឱ្យកាន់តែប្រសើរជាងនេះទៀត រដ្ឋគួរតែជំរុញឱ្យអនុវត្តច្បាប់តែម្ដង គឺច្បាប់ស្ដីពីការងារដោយទី១ ផ្តល់សិទ្ធិឱ្យគាត់មានឱកាសក្នុងការចូលរួមចងក្រងបង្កើតទៅជាសហជីព ទី២ អាចបង្កើតជាឯកសារគតិយុត្តពិសេស១ដើម្បីគាំពារគាត់ដែលនេះវាជាចំណុចល្អបន្ថែមទៅនឹងអ្វីដែលជាការលើកឡើងរបស់ប្រមុខរាជរដ្ឋាភិបាល។
លោកថា៖«យើងគួររៀបចំជាច្បាប់ពិសេសមួយសម្រាប់ការពារអ្នកបម្រើសេវាកម្សាន្តតែម្តងទៅ ព្រោះនេះជាចំណុចល្អ បង្កើតទៅជាយន្តការច្បាប់វាមានលក្ខណៈយូរអង្វែង ជាពិសេជំរុញឱ្យថៅកែក្លិបកម្សាន្ត ឬផ្នែកសេវាកម្សាន្តទាំងអស់ឱ្យថៅកែទទួលខុសត្រូវសុវត្ថិភាពសន្តិសុខសម្រាប់ពួកគាត់ និងជំរុញឱ្យថៅកែផ្តល់កិច្ចគាំពារសង្គមតាមរយៈរបបសន្តិសុខសង្គម ព្រោះនេះជាការទទួលខុសត្រូវរបស់ថៅកែ និងអាជ្ញាធររដ្ឋ»។
លោកថ្លែងថា បច្ចុប្បន្នស្ត្រីបម្រើការងារផ្នែកសេវាកម្សាន្តជួបបញ្ហាប្រឈមច្រើន ទី១ ប្រឈមនឹងការបៀតបៀនផ្លូវភេទ ទី២ ប្រឈមការប្រើអំពើហិង្សាពីសំណាក់ភ្ញៀវឬពីសំណាក់និយោជករបស់គាត់ ដោយការបង្ខំគ្រប់បែបយ៉ាងឱ្យទទួលភ្ញៀវនិងទី៣គឺជាការបង្ខំឱ្យគាត់ផឹកស្រា។លោកបន្តថា ចំណុចប្រឈមខ្លាំងមួយទៀតជាពិសេសស្ត្រីបម្រើនៅក្លិបកម្សាន្ត នៅពេលគាត់មានផ្ទៃពោះ គឺថៅកែគេមិនយកធ្វើការ ដែលរងការបាត់បង់ការងារ និងបញ្ឈប់ការងារដោយមិនមានប្រាក់សំណងត្រឹមត្រូវតាមផ្លូវច្បាប់។ លោកបន្ថែមថា៖«បើសិនជារដ្ឋរៀបចំគោលនយោបាយរបបសន្តិសុខសង្គមសម្រាប់ពួកគាត់ ហើយប្រកបដោយប្រសិទ្ធភាពនោះ វានឹងផ្តល់អត្ថប្រយោជន៍ដល់ស្ត្រីបម្រើការងារក្នុងសេវាកម្សាន្ត»។
ដោយឡែក ក្នុងពិធីជួបសំណេះសំណាលជាមួយបុគ្គលិកបម្រើការងារសេដ្ឋកិច្ចក្រៅប្រព័ន្ធ ផ្នែកសេវាកម្សាន្តទេសចរណ៍ មនុស្សពេញវ័យ មកពីខណ្ឌជ្រោយចង្វារ ខណ្ឌឬស្សីកែវ និងខណ្ឌព្រែកព្នៅ សរុបជិត ៣០០ នាក់ កាលពីថ្ងៃទី ១២ ខែមករា កន្លងទៅនេះ លោកស្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចថ្លែងថា បច្ចុប្បន្ននេះ រាជរដ្ឋាភិបាលបាន និងកំពុងយកចិត្តទុកដាក់ និងគិតគូរដល់បុគ្គលិកបម្រើការងារនៃសេដ្ឋកិច្ចក្រៅប្រព័ន្ធនេះ ។
លោកស្រីថ្លែងថា៖ «រាជរដ្ឋាភិបាល បានជំរុញការអនុវត្តក្របខ័ណ្ឌគោលនយោបាយ ជាតិគាំពារសង្គម តាមរយៈ ការពង្រឹង និងអភិវឌ្ឍជំនួយសង្គម និងប្រព័ន្ធ សន្តិសុខសង្គមឱ្យកាន់តែមានវិសាលភាព និងប្រសិទ្ធភាព ពង្រឹងសន្តិសុខស្បៀង និងអាហារូបត្ថម្ភ ដើម្បីធានាការលើកកម្ពស់សុខុមាលភាព សាមគ្គីភាពសង្គម និងបន្តកាត់បន្ថយភាពក្រីក្ររបស់ប្រជាជនជាអតិបរិមា»។
ជាមួយគ្នានេះដែរ ស្ត្រីបម្រើការងារនៅភោជនីយដ្ឋាន ១ កន្លែង ក្នុងរាជធានីភ្នំពេញ ថ្លែងក្នុងលក្ខខណ្ឌមិនបញ្ចេញឈ្មោះ បានសម្តែងការត្រេកអរបន្ទាប់ពីទទួលបានដំណឹងនេះ ដោយបន្ថែមថា ពួកគេពិតជាអរគុណដល់ប្រមុខរាជរដ្ឋាភិបាលកម្ពុជា ដែលបានយកចិត្តទុកដាក់សម្រាប់ពួកគេដែលបម្រើការងារនៅវិស័យសេដ្ឋកិច្ចក្រៅប្រព័ន្ធ។ ស្រី្តរូបនេះថ្លែងថា៖«នេះគឺជាដំណឹងល្អ ១ សម្រាប់ពួកយើងដែលធ្វើការផ្នែកសេវាកម្សាន្តមិនថានៅតាមរយៈរង្គសាល ខារ៉ាអូខេ ឬក៏ភោជនីយដ្ឋានផ្សេងៗ ព្រោះវាអាចនឹងការពារដល់ពួកខ្ញុំ ដោយសារតែពេលខ្លះក៏មានភ្ញៀវបៀតបៀនរាងកាយ ឈានដល់ការបង្កជម្លោះ ឈានដល់ប្រើអំពើហិង្សាក៏មានដែរ»៕
វីដេអូ៖
