ភ្នំពេញៈ លោក នេត្រ ភក្ត្រា រដ្ឋលេខាធិការក្រសួងបរិស្ថាន បានឱ្យដឹងថា ការប្រគល់ជូនប្រព័ន្ធស្រោចស្រពដល់ឧទ្យានជាតិជួរភ្នំក្រវាញ ពីសំណាក់ក្រុមហ៊ុន កូកា-កូឡាកម្ពុជា ជាការរួមចំណែកដល់និរន្តរភាពភាពធន់នឹងអាកាសធាតុ និង ការកសាងអនាគតរួមគ្នា កាន់តែប្រសើរសម្រាប់សហគមន៍មូលដ្ឋាន។
លោកបានឱ្យដឹងបែបនេះក្នុងពិធី ប្រគល់ - ទទួល អំណោយប្រព័ន្ធស្រោចស្រពដល់ឧទ្យានជាតិជួរភ្នំក្រវាញរួមជាមួយសមាជិកសហគមន៍មូលដ្ឋាន និងក្រុមការងារមកពី ក្រុមហ៊ុនកូកា-កូឡាកម្ពុជា នៅថ្ងៃទី៤ ខែកុម្ភៈ ឆ្នាំ ២០២៣នេះ។
លោកថ្លែងថា៖ «ក្នុងនាមក្រសួងបរិស្ថាន ខ្ញុំសូមថ្លែងអំណរគុណ ចំពោះក្រុមហ៊ុន កូកា-កូឡាកម្ពុជា ដែលបានចូលរួមជាមួយ ក្រសួងបរិស្ថានក្នុងកិច្ចការពារធម្មជាតិ និងបរិស្ថានតាមរយៈការផ្តល់ប្រព័ន្ធស្រោចស្រពថ្នាលបណ្តុះកូនឈើ»។
លោកបន្តថា កូនឈើដែលបណ្តុះបាននឹងត្រូវចែកជូនដល់អាជ្ញាធរ បងប្អូនប្រជាពលរដ្ឋសហគមន៍ដើម្បីយកទៅដាំនៅតាមសហគមន៍ និងជាពិសេស ដើម្បីផ្តល់ជូនដល់ភ្ញៀវទេសចរដែលមកកាន់តំបន់ខ្នងផ្សារ ចូលរួមដាំបង្កើតភាពបៃតង ក្រោមទិសស្លោក «ទេសចរម្នាក់ ដើមឈើមួយដើម»។
ប្រភពដដែលបន្តថា កម្ពុជាបានស្ថិតក្នុងរបត់ថ្មីមួយដែលទទួលបានប្រាក់ចំណូលពីការអភិរក្សតាមរយៈការលក់ឥណទានកាបូន និងទេសចរណ៍ធម្មជាតិ។ ទេសចរណ៍ធម្មជាតិដែលកំពុងផ្តល់ចំណូលដល់ប្រជាសហគមន៍នៅតាមតំបន់ការពារធម្មជាតិនានា។
ប្រព័ន្ធស្រោចស្រពដែលបានប្រគល់ជូន ឧទ្យានជាតិជួរភ្នំក្រវាញនេះ គឺជាដំណោះស្រាយប្រកបដោយប្រសិទ្ធភាពមួយដែលមានម៉ាស៊ីនបូមទឹកប្រើថាមពលពន្លឺព្រះអាទិត្យ (សូឡា) និង ទុយោទឹកដែលរំពឹងថា នឹងបង្កើនអត្រាប្រជែងរស់សម្រាប់កូនឈើដែលចាប់ពន្លកថ្មីចំនួន ៤០ ០០០ដើម នៅក្នុងឧទ្យានជាតិក្នុងរយៈកាល ៤ឆ្នាំខាងមុខ។
លោកថ្លែងថា៖ «កូនឈើទាំងនេះ នឹងត្រូវយកទៅដាំនៅទីតាំងចាំបាច់នានា ដែលអាជ្ញាធរ ឧទ្យានជាតិជាអ្នកកំណត់ ដែលជាវិធានការ ដ៏សំខាន់មួយក្នុងការកាត់បន្ថយផលប៉ះពាល់នៃការប្រែប្រួលអាកាសធាតុ»។
កញ្ញា សម្បត្តិ មុនីវរលក្ខណ៍ នាយកផ្នែកទំនាក់ទំនងកិច្ចការសាធារណៈ និងចីរភាពប្រចាំប្រទេសនៃក្រុមហ៊ុន កូកា-កូឡា កម្ពុជា បានថ្លែងថា៖ «នៅក្រុមហ៊ុន កូកា-កូឡា យើង ប្តេជ្ញាចូលរួមចំណែកក្នុងសកម្មភាពកាត់បន្ថយការប្រែប្រួលអាកាសធាតុ។ ការប្រគល់ប្រព័ន្ធ ស្រោចស្រពនេះ គឺជាឧទាហរណ៍ជាក់ស្តែង មួយអំពីការប្តេជ្ញាចិត្តរបស់យើងចំពោះការកាត់បន្ថយឧស្ម័នកាបូនិករបស់ក្រុមហ៊ុនយើង ការការពារជីវចម្រុះ និងការកសាងភាពធន់នឹង អាកាសធាតុ»។
កញ្ញាបន្តថា ក្នុងគម្រោងប្រហាក់ប្រហែលគ្នានេះដែលបានប្រព្រឹត្តទៅនៅដើមឆ្នាំ ២០២១ ក្រុមហ៊ុន កូកា-កូឡាកម្ពុជា ក្រោមការសហការ ជាមួយអាជ្ញាធរជាតិអប្សរា បានប្រគល់អណ្តូង ទឹកប្រើថាមពលពន្លឺព្រះអាទិត្យ សម្រាប់ស្រោចស្រពកូនឈើនិងសួនបៃតងនៅតំបន់ អង្គរ ដែលស្ថិតនៅក្នុងភូមិលាងដៃ ស្រុក អង្គរធំ ខេត្តសៀមរាប។
ក្រៅពីសកម្មភាពទាក់ទងនឹងអាកាសធាតុ ក្រុមហ៊ុនកូកា-កូឡាកម្ពុជា ក៏បានធ្វើកិច្ចការ ដើម្បីផ្តល់ជូនទឹកស្អាតដល់សហគមន៍ មូលដ្ឋានផងដែរតាមរយៈគម្រោងដំឡើងប៉ម ចម្រោះទឹកស្អាត AquaTower និងម៉ាស៊ីន លាងសម្អាតបន្ទប់ទឹក AquaSan របស់ខ្លួន ក្រោមកិច្ចសហការជាមួយមូលនិធិ Planet Water។ ក្រុមហ៊ុន នឹងដំឡើងប៉មចម្រោះទឹកស្អាត និងផ្តល់ជូនម៉ាស៊ីនលាងសម្អាតបន្ទប់ទឹក AquaSan AquaTowers ទី៤៣ និងទី៤៤ ក្នុងពេលឆាប់ៗនេះ នៅក្នុងពិធីមួយ ស្ថិតក្នុងខេត្តកំពង់ស្ពឺ។ ប៉មចម្រោះទឹកស្អាត AquaTower និង ម៉ាស៊ីនលាងសម្អាត បន្ទប់ទឹក AquaSan ចំនួន៤២ ឈុត ដែលបានផ្តល់ជូនសហគមន៍នាពេលកន្លងមក កំពុងផ្តល់ជូនទឹកស្អាតដល់ប្រជាជនជាង ៧៣ ០០០ នាក់។
ក្រុមហ៊ុនកូកា-កូឡា ប្តេជ្ញាចិត្ត សម្រេចឱ្យបាន គោលដៅរបស់ខ្លួនក្នុងការកាត់បន្ថយការ បញ្ចេញឧស្ម័នផ្ទះកញ្ចក់ ២៥% នៅត្រឹម ឆ្នាំ២០៣០ និងមានគោលដៅសម្រេចឱ្យបាន ការបំភាយឧស្ម័នកាបូនិចសូន្យ នៅត្រឹម ឆ្នាំ២០៥០។ ក្រុមហ៊ុនសម្រេចបានគោលដៅ ឆ្នាំ២០២០ របស់ខ្លួនជាមួយនឹងការកាត់បន្ថយ ការបញ្ចេញឧស្ម័នកាបូនិចរបស់ខ្លួន ចំនួន ២៥% នៅដំណាច់ឆ្នាំ២០២០ ធៀបនឹង ទិន្នន័យគោល នៅឆ្នាំ២០១០៕