សកម្មភាពហ្វឹកហ្វឺនរបស់ទាហាននៅខេត្តកំពង់ស្ពឺកាលពីខែតុលា ឆ្នាំមុន ។ រូបថត Hun Manet page
ភ្នំពេញៈ កម្ពុជាជ្រើសរើសនាយសិក្ខាកាមសិក្សាយោធាក្នុងឆ្នាំ ២០២៣ ដើម្បីបណ្តុះបណ្តាលធនធានមនុស្សឱ្យបន្តវេនក្នុងវិស័យការពារជាតិជំនួសនាយទាហានវ័យចំណាស់ដែលចូលនិវត្តន៍ បន្ទាប់ពីបានខកខានជ្រើសរើសអស់រយៈពេលជាង ៣ ឆ្នាំ ដោយសារវិបត្តិជំងឺឆ្លងកូវីដ ១៩។
ក្រសួងការពារជាតិបានចាប់ផ្តើមចែកពាក្យដល់និស្សិត សិស្ស ដើម្បីបំពេញបែបបទស្នើសុំប្រឡងចូលក្នុងក្របខ័ណ្ឌជាកងយោធពលខេមរភូមិន្ទចាប់ពីថ្ងៃទី ១ រហូតថ្ងៃទី ១៥ ខែកុម្ភៈ ដើម្បីជ្រើសរើសនាយសិក្ខាកាមយោធាជំនាន់ថ្មីនៅតាមបណ្តាអង្គភាពនានាសម្រាប់ឆ្នាំ ២០២៣ បន្ទាប់ពីបានខកខានអស់រយៈពេលជាង៣ឆ្នាំ ដោយសារវិបត្តិកូវីដ ១៩។
ពិធីចែកនេះដឹកនាំដោយលោកឧត្តមសេនីយ៍ឯក ខៀវ សុផាត អគ្គលេខាធិការរងនៃអគ្គលេខាធិការដ្ឋានក្រសួងការពារជាតិ,នាយឧត្តមសេនីយ៍ ជា តារា សាកលវិទ្យាធិការនៃសាកលវិទ្យាល័យការពារជាតិ និងលោកឧត្តមសេនីយ៍ឯក ដោក សុផា សាកលវិទ្យាធិការរង កាលពីដើមខែកុម្ភៈនេះ។
លោក ជា តារា ទីប្រឹក្សានាយករដ្ឋមន្ត្រីនិងជាសាកលវិទ្យាធិការនៃសកលវិទ្យាល័យការពារជាតិបានឱ្យដឹងថា ក្រុមការងារជ្រើសរើសនិងត្រួតពិនិត្យលក្ខណសម្បត្តិសិស្ស និស្សិត បានសហការដ៏ល្អជាមួយសាកលវិទ្យាល័យការពារជាតិដោយបានចាប់ផ្តើមដំណើរការពិនិត្យកាយសម្បទានិងផ្ដល់ពាក្យដល់សិស្សនិស្សិតដែលមានសញ្ញាបត្រមធ្យមសិក្សាទុតិយភូមិ ដើម្បីបំពេញឯកសារទៅតាមលក្ខខណ្ឌនៃការជ្រើសរើសចូលបម្រើក្នុងក្របខ័ណ្ឌជាកងយោធពលខេមរភូមិន្ទសម្រាប់វគ្គហ្វឹកហ្វឺននាយទាហានសកម្ម,នាយទាហានទ័ពជើងគោក,នាយទាហានបន្តវេន និងវគ្គនាយទាហានបច្ចេកទេសយោធាឆ្នាំ ២០២៣។
លោកបានបញ្ជាក់ថា៖ «ក្នុងរយៈពេលជិត ៣ ឆ្នាំកន្លងមកនេះ ដោយសារប្រទេសកម្ពុជាក៏ដូចជាពិភពលោកទាំងមូលជួបបញ្ហាប្រឈមចំពោះរោគរាតត្បាត ជាសាកលនៃជំងឺឆ្លងកូវីដ ១៩ បានធ្វើឱ្យសកម្មភាពការងារជ្រើសរើសសិស្សនិស្សិតនៃសង្គមស៊ីវិលឱ្យចូលបម្រើក្នុងជួរកងយោធពលខេមរភូមិន្ទដើម្បីបន្តវេនពីនាយទាហានដែលមានវ័យចាស់ៗ ត្រូវចូលនិវត្តន៍លើវិស័យការពារជាតិរបស់កម្ពុជា ត្រូវបានអាក់ខានមួយរយៈ»។
លោក ជា តារា បានបន្ថែមថា ក្នុងឆ្នាំ ២០២៣ នេះ ក្រសួងការពារជាតិបានចាប់ផ្តើមជ្រើសរើសសិក្ខាកាមយោធាជាថ្មី ហើយលោកក៏បានអំពាវនាវដល់បណ្តាសិស្ស និស្សិត ដែលបញ្ចប់ការសិក្សា ជាប់សញ្ញាបត្រមធ្យមសិក្សាទុតិយភូមិដែលមានបំណងចូលបម្រើការកងទ័ពរួសរាន់មកបំពេញបែបបទសុំប្រឡងដើម្បីចូលហ្វឹកហ្វឺនក្នុងវគ្គបណ្ដុះបណ្ដាលនាយទាហានសកម្មជំនាន់ទី២៤ វគ្គនាយទាហានទ័ពជើងគោកជំនាន់ទី១៣ វគ្គនាយទាហានបន្តវេនជំនាន់ទី១៤ និងវគ្គនាយទាហានបច្ចេកទេសយោធាសម្រាប់ឆ្នាំនេះ។
សូមបញ្ជាក់ថា ការជ្រើសរើសនាយទាហានចូលបណ្តុះបណ្តាលក្នុងឆ្នាំ ២០២៣ មានរយៈពេល ១៥ ថ្ងៃ ចាប់ពីថ្ងៃទី ១ រហូតដល់ថ្ងៃទី ១៥ ខែកុម្ភៈ ឆ្នាំ ២០២៣ នៅសាកលវិទ្យាល័យការពារជាតិស្ថិតក្នុងភូមិសាស្ត្រសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ទៅតាមសេចក្តីប្រកាសជូនដំណឹងរបស់ក្រសួងការពារជាតិ។
ពាក់ព័ន្ធនឹងបញ្ហានេះលោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានថ្លែងថា ការជ្រើសរើសនាយទាហានសិក្ខាកាមថ្មីជារឿងចាំបាច់ដែលប្រទេសជាតិនីមួយៗត្រូវមានទាហានបន្តវេនព្រោះមានអ្នកដែលត្រូវចូលនិវត្តន៍។បើមិនជ្រើសរើសថ្មីទេប្រទេសអាចខ្វះខាតកងកម្លាំងយោធាហើយការជ្រើសរើសនេះមិនមែនសម្រាប់តែគោលដៅសង្គ្រាមឡើយ តែទាហានអាចបម្រើការងារក្នុងសង្គមហូរហែ និងសម្រាប់អន្តរាគមន៍ពេលជាតិជួបវិបត្តិ តួយ៉ាងគ្រោះធម្មជាតិជាដើម។
លោក យង់ ពៅ បានបញ្ជាក់ថា៖«ការងារការពារជាតិនេះជារឿងចាំបាច់ដែលត្រូវមានជាបន្តបន្ទាប់ ព្រោះមិនអាចនិយាយថា ប្រទេសមានសន្តិភាព មិនត្រូវការកងម្លាំងទេ។ បើប្រទេសកាន់តែរីកចម្រើន រឹងមាំ មានសន្តិភាព វិស័យការពារជាតិ និងកងទ័ពនេះគឺត្រូវបង្កើនការពង្រឹង បើយើងក្រឡេកមើលប្រទេសជិតខាង និងសកលលោកគេសន្តិភាពមុនយើង រីកចម្រើនជាងយើង ហើយវិស័យការពារជាតិគេកាន់តែរឹងមាំ... »។
លោកបានបន្ថែមថា រដ្ឋាភិបាលគួរគិតគូរពង្រឹងនិងអភិវឌ្ឍវិស័យការពារជាតិនិងបង្កើនទំហំចំនួនទាហាន ខណៈវិស័យការពារជាតិរបស់កម្ពុជានៅទន់ខ្សោយបើធៀបនឹងបណ្តាប្រទេសជិតខាងទាំងចំនួនទាហាន សមត្ថភាពបច្ចេកវិទ្យាយោធា អាវុធយុទ្ធភណ្ឌ។
សម្រាប់លោក មាស នី អ្នកស្រាវជ្រាវការអភិវឌ្ឍសង្គមក៏បានលើកឡើងដែរថា ទោះបីប្រទេសកម្ពុជាតូចក្តី ក៏ការបង្កើនសមត្ថភាពយោធា ជារឿងចាំបាច់ខណៈសកលលោកក៏កំពុងជួបប្រទះនឹងសង្គ្រាម តួយ៉ាងសង្គ្រាមរុស្ស៊ី-អ៊ុយក្រែន និងសង្គ្រាមទីកន្លែងផ្សេងៗក្នុងពិភពលោកជាពិសេសកំណែទម្រង់វិស័យការពារជាតិដែលមិនអាចខ្វះបាននៅកម្ពុជាជាការបើកផ្លូវកសាងសមត្ថភាពធនធានមនុស្សផ្នែកការពារជាតិពិតប្រាកដនៅថ្ងៃអនាគត។
លោក មាស នី បានសង្កត់ធ្ងន់ថា៖ «កំណែទម្រង់វិស័យយោធាជារឿងចាំបាច់»។ ក៏ប៉ុន្ដែលោកអំពាវនាវឱ្យរដ្ឋាភិបាលព្យាយាមលុបបំបាត់អំពើពុករលួយក្នុងវិស័យកងទ័ព ដើម្បីជ្រើសរើសធនធានមនុស្សដែលមានសមត្ថភាពសម្រាប់បម្រើជាតិជាជាងបម្រើបក្ស
ឬការជ្រើសរើសកងទ័ពតាមរយៈខ្សែរយៈសាច់ញាតិដែលអាចជះឥទ្ធិពលអាក្រក់ដល់វិស័យការពារជាតិទាំងមូលទៅថ្ងៃមុខ៕
