ប្រធានកាកបាទក្រហមកម្ពុជាលោកស្រី ប៊ុន រ៉ានី ហ៊ុន សែន អំពាវនាវឱ្យក្រសួងសុខាភិបាល រួមជាមួយដៃគូសហការដទៃទៀត ទាំងនៅថ្នាក់ជាតិនិងថ្នាក់ក្រោមជាតិរួមកម្លាំងគ្នានិងផ្ដោតការយកចិត្តទុកដាក់ឱ្យកាន់តែខ្លាំងជាងមុន ក្នុងការពង្រឹងការផ្តល់សេវាសុខភាពបន្តពូជ សុខភាពមាតា ទារក និងកុមារ។
ការអំពាវនាវនេះ ធ្វើឡើងក្នុងឱកាសទិវាជាតិសុខភាពមាតា ទារក និងកុមារ ដែលនឹងប្រព្រឹត្តឡើងនៅថ្ងៃទី ២១ ខែកុម្ភៈ ឆ្នាំ ២០២៣ ក្រោមប្រធានបទ “រួមគ្នាពង្រឹងសេវាសុខភាពបន្តពូជ សុខភាពមាតា ទារក កុមារ យុវវ័យ និង អាហារូបត្ថម្ភ ដើម្បីឈានទៅសម្រេចគោលដៅអភិវឌ្ឍន៍ប្រកបដោយចីរភាពនៅឆ្នាំ ២០៣០”។
ក្នុងសារលិខិតរបស់ប្រធានកាកបាទក្រហមកម្ពុជាលោកស្រី ប៊ុន រ៉ានី ហ៊ុន សែន និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ បានកោតសរសើរចំពោះថ្នាក់ដឹកនាំ និងមន្ត្រីនៃក្រសួងសុខាភិបាលទាំងនៅថ្នាក់ជាតិ និងថ្នាក់ក្រោមជាតិ ដែលបានយកចិត្តទុកដាក់ និងខិតខំប្រឹងប្រែងប្រកបដោយស្មារតីទទួលខុសត្រូវខ្ពស់ ជម្នះគ្រប់ការលំបាកក្នុងការបន្តប្រយុទ្ធទប់ស្កាត់ការរីករាលដាលជំងឺកូវីដ ១៩ និងក្នុងការលើកកម្ពស់គុណភាពសុខាភិបាលគ្រប់ផ្នែកទាំងអស់ ជាពិសេសក្នុងការពង្រឹងការផ្តល់សេវាសុខភាពបន្តពូជ សុខភាពមាតា ទារក និងកុមារ។
សារលិខិតបន្តថា ការយកចិត្តទុកដាក់ក្នុងការផ្ដល់ការគាំពារ ការថែទាំសុខភាព ការព្យាបាល និងជួយសង្គ្រោះអាយុជីវិតប្រជាពលរដ្ឋរហូតបានសម្រេចនូវវឌ្ឍនភាពគួរឱ្យកត់សម្គាល់ពោលគឺ អត្រានៃស្ត្រីដែលបានទទួលការថែទាំផ្ទៃពោះពីគ្រូពេទ្យជំនាញមុនពេលសម្រាលបានកើនពី ៩៥ ដល់ ៩៩% អត្រាមរណភាពមាតាបានថយចុះពី ១៧៤ មកនៅ ១៥៤ ក្នុងចំណោម ១ សែនកំណើតរស់អត្រាមរណភាពទារកទើបកើតបានថយចុះពី ១៨ មកនៅ ៨ ក្នុងចំណោម ១ ពាន់កំណើតរស់ជាដើម។
ប៉ុន្តែប្រភពដដែលបញ្ជាក់ថា៖ «ទន្ទឹមនឹងវឌ្ឍនភាពនេះ ក៏នៅមានក្ដីកង្វល់មួយចំនួនទៀតដែលទាមទារឱ្យក្រសួងសុខាភិបាល រួមជាមួយដៃគូសហការដទៃទៀតទាំងនៅថ្នាក់ជាតិនិងថ្នាក់ក្រោមជាតិ រួមកម្លាំងគ្នានិងផ្ដោតការយកចិត្តទុកដាក់ឱ្យកាន់តែខ្លាំងជាងមុន ក្នុងការលើកកម្ពស់គុណភាពឱ្យបានកាន់តែល្អប្រសើរឡើងថែមទៀត មានដូចជា សេវា/មធ្យោបាយពន្យារកំណើតសម្រាប់ស្ត្រីក្នុងវ័យបន្តពូជ សេវាផ្តល់ការថែទាំដល់ស្ត្រី ជាមាតាក្រោយសម្រាល រួមជាមួយសេវាគាំពារ ថែទាំទារក/កុមារ និងការផ្ដល់អាហារូបត្ថម្ភឱ្យបានគ្រប់គ្រាន់ ដល់ទារក/កុមារ ការលើកកម្ពស់សេវាទប់ស្កាត់ការចម្លងមេរោគអេដស៍ពីម្ដាយមកកូនជាដើម»។
តាមរយៈសារលិខិតនេះ លោកស្រី ប៊ុន រ៉ានី យល់ឃើញថា កត្តាគន្លឹះដ៏សំខាន់មួយទៀត ដែលនឹងជំរុញឱ្យកម្ពុជាសម្រេចបានគោលដៅអភិឌ្ឍន៍ប្រកបដោយចីរភាពនោះ គឺការចូលរួម ពីបងប្អូនរួមជាតិទាំងអស់ ក្នុងការទៅទទួលយកសេវាសុខាភិបាលដែលមានវិជ្ជាជីវៈត្រឹមត្រូវ ធានាបានគុណភាព និងសុវត្ថិភាព។ ក្នុងឱកាសទិវាជាតិសុខភាពមាតា ទារក និងកុមារ លោកស្រីអំពាវនាវឱ្យស្ត្រីមានផ្ទៃពោះទាំងអស់ទៅពិនិត្យសុខភាព និងពិគ្រោះយោបល់ជាមួយគ្រូពេទ្យជំនាញនៅមណ្ឌលសុខភាព ឬមន្ទីរពេទ្យ ឱ្យបានទៀងទាត់ចំនួន ៤ ដង តាមពេលវេលាកំណត់ ទៅទទួលថ្នាំបង្ការជំងឺតេតាណូស និងទៅចាក់វ៉ាក់សាំងជំងឺកូវីដ ១៩ ទៅទទួលយកសេវាបង្ការ/ព្យាបាលទាំងអស់ ពិសេសការស្ម័គ្រចិត្ត ធ្វើតេស្តឈាមរកមេរោគអេដស៍ ស្វាយ រលាកថ្លើមប្រភេទបេ ដើម្បីទប់ស្កាត់ការចម្លងមេរោគពីម្ដាយទៅកូន។ ទៅសម្រាលកូននៅមណ្ឌលសុខភាព ឬមន្ទីរពេទ្យមានគ្រូពេទ្យជំនាញដែលទទួលបានការបណ្តុះបណ្តាលត្រឹមត្រូវ និងទៅពិនិត្យសុខភាពក្រោយពេលសម្រាលទាំងម្តាយ ទាំងកូន យកកូនទៅចាក់វ៉ាក់សាំងបង្ការជំងឺ ១១ មុខ តាមពេលវេលាកំណត់និងត្រូវយកចិត្តទុកដាក់ពិនិត្យតាមដានសុខភាពនិងការលូតលាស់ របស់កូន រហូតដល់កូនមានអាយុពីរឆ្នាំ។ ស្នើគ្រប់ស្ថាប័នពាក់ព័ន្ធទាំងអស់ ទាំងជាតិ-អន្តរជាតិ បន្តវិនិយោគក្នុងការងារសុខភាពបន្តពូជ សុខភាពមាតា ទារក កុមារ យុវវ័យ និងអាហារូបត្ថម្ភ ពិសេសសូមជួយឧបត្ថម្ភគាំទ្រដល់ការងារបណ្តុះបណ្តាលជំនាញ និងវិក្រឹតការដល់មន្ត្រី/បុគ្គលិកសុខាភិបាល រួមទាំងអាជ្ញាធរមូលដ្ឋាន អ្នកអប់រំផ្សព្វផ្សាយនៅសហគមន៍ ឱ្យទទួលបានចំណេះដឹង និងជំនាញពិតប្រាកដ។
ក្នុងសារលិខិតរបស់លោកស្រី ប៊ុន រ៉ានី ហ៊ុន សែន បញ្ជាក់ថា៖ «ខ្ញុំសូមឧទ្ទិសខ្លឹមសារនិងអត្ថន័យនៃទិវាជាតិសុខភាពមាតា ទារក និងកុមារ ឱ្យស្ថិតនៅក្នុងការចងចាំ និងយកចិត្តទុកដាក់ប្រែក្លាយប្រធានបទនេះឱ្យទៅជាការពិតជាក់ស្ដែង ផ្ដល់ក្ដីសង្ឃឹមដល់បងប្អូនរួមជាតិទាំងអស់ ដែលជាកម្លាំងដ៏មានសក្តានុពលជំរុញព្រះរាជាណាចក្រកម្ពុជាឱ្យសម្រេចបានគោលដៅធំៗ ដែលបានកំណត់ ជាពិសេសគោលដៅអភិវឌ្ឍន៍ប្រកបដោយចីរភាពនៅឆ្នាំ ២០៣០»៕