.jpg)
ភ្នំពេញៈ ក្រសួងសាធារណការ និងដឹកជញ្ជូនបញ្ចប់សុពលភាពធ្វើអាជីវកម្មដឹកជញ្ជូនផ្លូវគោកចំនួន ១០ ក្រុមហ៊ុន ក្រោយក្រសួងរកឃើញថាក្រុមហ៊ុនទាំងនេះមិនបានស្នើសុំបន្តសុពលភាព ធ្វើអាជីវកម្មជាច្រើនឆ្នាំ។
ក្រសួងសាធារណការបញ្ជាក់ក្នុងសេចក្តីប្រកាសចុះថ្ងៃទី ៩ ខែកុម្ភៈ ថា ក្រសួងបានពិនិត្យឃើញក្រុមហ៊ុនដឹកជញ្ជូនទាំង ១០ នេះមិនបានស្នើសុំបន្តសុពលភាពលិខិតអនុញ្ញាតឱ្យនីតិបុគ្គលធ្វើអាជីវកម្មដឹកជញ្ជូនផ្លូវគោកក្នុងប្រទេសជាច្រើនឆ្នាំកន្លងមក។
ក្រសួងបញ្ជាក់ថា៖ «ហេតុដូចនេះក្រសួងសម្រេចបញ្ចប់សុពលភាពវិញ្ញាបនបត្រចុះបញ្ជីធ្វើអាជីវកម្មដឹកជញ្ជូនផ្លូវគោកចំនួន ១០ ក្រុមហ៊ុន ចាប់ពីថ្ងៃចេញសេចក្ដីប្រកាសនេះតទៅ»។
ក្រសួងបន្តថា ក្រុមហ៊ុនដែលត្រូវបានបញ្ចប់សុពលភាពនេះត្រូវដោះស្រាយរាល់បំណុល និងបញ្ហាផ្សេងៗដែលពាក់ព័ន្ធនឹងការធ្វើអាជីវកម្មដឹកជញ្ជូនផ្លូវគោកក្នុងប្រទេស ក្នុងករណីមានការតវ៉ាកើតឡើងជាយថាហេតុពាក់ព័ន្ធនឹងការបញ្ចប់សុពលភាពនេះ៕
