លោកស ខេង នៅក្នុងពិធីបុណ្យបញ្ចុះខណ្ឌសីមាព្រះវិហារ នៅភូមិព្រៃត្បែង ឃុំត្របែក ស្រុកកំចាយមារ នៅថ្ងៃទី១៩ ខែកុម្ភៈ។ រូបថត ផេកហ្វេសប៊ុកលោក ស ខេង
ព្រៃវែងៈ រដ្ឋមន្រ្តីក្រសួងមហាផ្ទៃលោក ស ខេង ក្រើនរំឭកជាថ្មីទៀតឱ្យអាជ្ញាធរមូលដ្ឋាន ត្រូវរួមសហការគ្នាជាមួយ ប្រជាពលរដ្ឋ ដើម្បីជំរុញការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព និងការដោះស្រាយបញ្ហាប្រឈម និងសំណូមពរនានារបស់ប្រជាពលរដ្ឋឱ្យទាន់ពេលវេលា និងមានប្រសិទ្ធភាព។
ការលើកឡើងជាថ្មី ធ្វើឡើងក្នុងឱកាសអញ្ជើញជាអធិបតីក្នុងពិធីបុណ្យបញ្ចុះខណ្ឌសីមាព្រះវិហារ និងឆ្លងសមិទ្ធផលនានា នៅវត្តមុនីរស្មីព្រៃត្បែង ស្ថិតនៅភូមិព្រៃត្បែង ឃុំត្របែក ស្រុកកំចាយមារ ខេត្តព្រៃវែង នៅថ្ងៃទី១៩ ខែកុម្ភៈ ឆ្នាំ ២០២៣។
ក្នុងនាមក្រុមការងាររាជរដ្ឋាភិបាល និងក្រុមការងារគណបក្សប្រជាជនកម្ពុជាខេត្តព្រៃវែង លោក ស ខេង បានថ្លែងកោតសរសើរចំពោះកិច្ចខិតខំប្រឹងប្រែងរបស់រដ្ឋបាលស្រុកកំចាយមារ និងរដ្ឋបាលឃុំ ព្រមទាំងអាជ្ញាធរភូមិ និងប្រជាពលរដ្ឋដែលបានខិតខំរួមគ្នាការពារសុខសន្តិភាព សុខសុវត្ថិភាព រួមគ្នាអភិវឌ្ឍមូលដ្ឋានរបស់ខ្លួនទទួលបានលទ្ធផលគួរជាទីមោទនៈ។
សមិទ្ធផលនានានៅក្នុងវត្តនេះរួមទាំងសាលាបឋមសិក្សា ដែលបានថវិកាពីព្រះចៅអធិការ អាចារ្យគណៈកម្មការវត្ត ពុទ្ធបរិស័ទចំណុះជើងវត្ត និងសប្បុរសជន ពិតជារួមចំណែកយ៉ាងសំខាន់សម្រាប់ការកសាងសង្គមជាតិ ក្នុងឱកាសដែលកម្ពុជាកំពុងមានសុខសន្តិភាពទាំងស្រុង មានស្ថិរភាព និងជំរុញការអភិវឌ្ឍសេដ្ឋកិច្ច សង្គមឱ្យកាន់តែរីកចម្រើន។
ទន្ទឹមនោះដែរលោក ស ខេង បានណែនាំឱ្យអាជ្ញាធរមូលដ្ឋាន ត្រូវសហការរួមគ្នាជាមួយប្រជាពលរដ្ឋក្នុងការអនុវត្តគោលនយោបាយភូមិ ឃុំ មានសុវត្ថិភាព ប្រកបដោយជោគជ័យ ដើម្បីឆ្លើយតបចង្ខុកវិស័យរបស់រដ្ឋាភិបាលក្នុងការកសាងប្រទេសជាតិឱ្យមានការរីចកម្រើន និងមានសន្តិភាព។
លោកណែនាំថា៖« អាជ្ញាធរមូលដ្ឋាន រួមសហការគ្នាជាមួយប្រជាពលរដ្ឋ ដើម្បីជំរុញការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព និងការដោះស្រាយបញ្ហាប្រឈម សំណូមពរនានារបស់ប្រជាពលរដ្ឋ»។
លោកស ខេង បានទាញការកត់សម្គាល់ថា សុខសន្តិភាព និងស្ថិរភាពជាតិ ជាសមិទ្ធផលស្នូល ដែលនាំឱ្យកើតមានវឌ្ឍនភាពនូវសមិទ្ធផលសំខាន់ៗផ្សេងទៀតរបស់ជាតិ រួមទាំងសមិទ្ធផលដែលបានប្រារព្ធពិធីសម្ពោធនាថ្ងៃនេះ។
នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត សង្កេតឃើញថា សម្រាប់គោលនយោបាយភូមិ ឃុំ សង្កាត់មានសុវត្ថិភាព របស់រាជរដ្ឋាភិបាល គឺជាគោលនយោបាយល្អ ក្នុងគោលបំណងធ្វើឱ្យប្រជាពលរដ្ឋក្នុងមូលដ្ឋានអាចរស់នៅប្រកបដោយភាពសុខដុមរមនា មានសន្តិសុខ សុវត្ថិភាព និងរិស្ថានល្អ។
ប៉ុន្តែលោកលើកឡើងថា ការអនុវត្តជាក់ស្តែងរបស់មន្ត្រីអាជ្ញាធរមូលដ្ឋានមួយចំនួន មិនទាន់ឆ្លើយតបទៅតាមគោលនយោបាយនេះនៅឡើយទេ ខណៈប្រជាពលរដ្ឋខ្លះ នៅតែលើកឡើងពីបញ្ហាមួយចំនួន ដូចជាករណីគ្រឿងញៀនដែលបច្ចុប្បន្នគឺរាលដាលដល់ជនបទ ល្បែងស៊ីសង និងចោរកម្មមួយចំនួន នៅតែកើតមានឡើង។
លោកថា៖«ដូច្នេះដើម្បីឱ្យគោលនយោបាយភូមិ ឃុំ សង្កាត់ មានសុវត្ថិភាព មានប្រសិទ្ធភាព ទាល់តែមន្ត្រីមូលដ្ឋានត្រូវចូលរួមអនុវត្តឱ្យបានពេញលេញ និងមានការចូលរួមពីប្រជាពលរដ្ឋ និងមានទំនុកចិត្តពីពលរដ្ឋ»។
សូមជម្រាបថា រាជរដ្ឋាភិបាលកម្ពុជា បានសម្រេចកែលម្អលក្ខណសម្បត្តិគោលនយោបាយ «ភូមិ-ឃុំ-សង្កាត់មានសុវត្ថិភាព» ឡើងវិញ ដែលមាន៧ចំណុច និងបានដាក់ចេញឱ្យអនុវត្តកាលពីខែមករា ឆ្នាំ ២០២១ ដែលមានក្រសួងមហាផ្ទៃជាសេនាធិការ។ គោលនយោបាយនេះ ត្រូវបានយកទៅផ្សព្វផ្សាយយ៉ាងទូលំទូលាយទាំងក្នុងវិស័យសាធារណៈទាំងក្នុងវិស័យឯកជន ដើម្បីធ្វើឱ្យភូមិ ឃុំ សង្កាត់មានសន្តិសុខ មានសុវត្ថិភាពនិងបរិស្ថានល្អ៕
