លោកស៊ុន ចាន់ថុល(ស្ដាំ) ក្នុងជំនួបជាមួយឯកអគ្គរាជទូតថៃថ្មីប្រចាំកម្ពុជា កាលពីថ្ងៃទី២០ កុម្ភៈ ។ រូបថត ក្រសួងសាធារណការ
ភ្នំពេញៈ រដ្ឋមន្ត្រីក្រសួងសាធារណការនិងដឹកជញ្ជូនបានស្នើដល់ភាគីថៃឱ្យជួយបណ្តុះបណ្តាលធនធានមនុស្សដោយការចែករំលែកចំណេះដឹងបន្ថែមដល់វិស្វករកម្ពុជាឱ្យចេះកសាងផ្លូវ ស្ពាន និងហេដ្ឋារចនាសម្ព័ន្ធជាច្រើនទៀត ដូចជា កំពង់ផែ ផ្លូវរថភ្លើង និងផ្លូវក្រោមដីជាដើម។ សំណើនេះបានធ្វើឡើងក្នុងកិច្ចពិភាក្សាការងារទ្វេភាគី ជាមួយលោក Cherdkiat ATTHAKOR ឯកអគ្គរាជទូតថៃថ្មីប្រចាំកម្ពុជា កាលថ្ងៃទី ២០ ខែកុម្ភៈ ឆ្នាំ ២០២៣។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនបានកោតសរសើររាជរដ្ឋាភិបាលថៃ ដែលកន្លងមកបានពង្រឹងចំណងមិត្តភាព និងកិច្ចសហប្រតិបត្តិការល្អរវាងប្រទេសទាំង២ ជាពិសេសការផ្តល់ជំនួយលើការអភិវឌ្ឍវិស័យហេដ្ឋារចនាសម្ព័ន្ធខេត្តនៅតាមខ្សៃបន្ទាត់ព្រំដែន ដូចជា ផ្លូវជាតិលេខ៤៨ លេខ៦៧ និងលេខ៦៨ ជាដើម ដែលរក្សាបាននូវសន្តិសុខសណ្តាប់ធ្នាប់តាមបណ្តោយព្រំដែននិងបម្រើឱ្យផលប្រយោជន៍របស់ប្រជាជននិងប្រទេសទាំង២។
តាមរយៈឯកអគ្គរាជទូតថៃ លោក ស៊ុន ចាន់ថុល ក៏បានស្នើឱ្យរាជរដ្ឋាភិបាលថៃជួយពិនិត្យលទ្ធភាពក្នុងការចាត់តាំងសាស្ត្រាចារ្យឬអ្នកជំនាញការដើម្បីរៀបចំវគ្គបណ្តុះបណ្តាលខ្លីៗដោយផ្ទាល់ឬតាមប្រព័ន្ធonline ក៏ដូចជាពិនិត្យលទ្ធភាពជួយជ្រោមជ្រែងដល់ដំណើរការរបស់វិទ្យាស្ថានតេជោសែនសាធារណការ និងដឹកជញ្ជូន ដើម្បីបណ្តុះបណ្តាលវិស្វករកម្ពុជាឱ្យមានជំនាញច្បាស់លាស់និងមានសមត្ថភាពគ្រប់គ្រាន់ក្នុងការចូលរួមចំណែក
អភិវឌ្ឍហេដ្ឋារចនាសម្ព័ន្ធកម្ពុជាឱ្យកាន់តែមានការរីកចម្រើនថែមទៀត។
ជាការឆ្លើយតប លោក Cherdkiat ATTHAKOR ឯកអគ្គរាជទូតថៃថ្មីប្រចាំកម្ពុជា បានឱ្យដឹងថា ជំនួបនេះ ធ្វើឡើងដើម្បីពង្រឹងពង្រីកចំណងមិត្តភាពការទូតនិងកិច្ចសហប្រតិបត្តិការល្អក្នុងវិស័យហេដ្ឋារចនាសម្ព័ន្ធដឹកជញ្ជូនរវាងប្រទេសទាំង២ ស្របពេលទំនាក់ទំនងការទូតផ្លូវការរវាងកម្ពុជា និងថៃ គិតមកទល់ពេលនេះ គឺមានរយៈពេល៧២ឆ្នាំហើយ។តាមរយៈបេសកកម្មការទូតក្នុងអាណត្តិនេះលោកប្តេជ្ញានឹងខិតខំអនុវត្តឱ្យសម្រេច
បានសមិទ្ធផលថ្មីៗដែលរួមចំណែកដល់ការពង្រឹងពង្រីកទំនាក់ទំនងមិត្តភាពនិងកិច្ចសហប្រតិបត្តិការដ៏ល្អរវាងរាជរដ្ឋាភិបាល និងប្រជាជននៃប្រទេសទាំង២ឱ្យកាន់តែល្អប្រសើរថែមទៀត។
គួរបញ្ជាក់ដែរថាបើតាមការសិក្សារបស់អង្គការជប៉ុនJICAដែលធ្វើការនៅកម្ពុជាកាលពីពេលថ្មីៗនេះ បានឱ្យដឹងថា ចាប់ពីឆ្នាំ២០១៨-២០២០ កម្ពុជាត្រូវការកម្លាំងវិស្វករជំនាញប្រមាណ ៣៥ ០០០នាក់ សម្រាប់បម្រើការងារក្នុងវិស័យឧស្សាហកម្ម ហេដ្ឋារចនាសម្ព័ន្ធ កម្មន្តសាលសំណង់ កសិកម្ម សេវាកម្ម ទេសចរណ៍ និងអចលនទ្រព្យក្នុងប្រទេសរបស់ខ្លួន។
វិទ្យាស្ថានតេជោសែន សាធារណការ និងដឹកជញ្ជូន ធ្លាប់បានអះអាងថា ពី១ឆ្នាំទៅ១ឆ្នាំចំនួនសិស្សនិស្សិត មានការកើនឡើងនៅតាមបណ្តាសាលាបណ្ដុះបណ្ដាលទាំងវិស័យរដ្ឋនិងឯកជនលើជំនាញវិស្វកម្មប៉ុន្តែក្រសួងថា ទោះជាយុវជនចាប់អារម្មណ៍ច្រើនលើផ្នែកនេះ ក៏កម្ពុជាត្រូវការកម្លាំងពលកម្មដែលមានជំនាញវិស្វកម្ម និងវិជ្ជាជីវៈបច្ចេកទេសរួមទាំងជំនាញការជាច្រើនបន្ថែមទៀតដើម្បីឆ្លើយតបនឹងទីផ្សារការងារក្នុងវិស័យសាធារណការ និងដឹកជញ្ជូននាពេលបច្ចុប្បន្ន៕
