ការស្វែងរកឈ្មោះ និងកាលបរិច្ឆេទនៃការចាក់វ៉ាក់សាំងតាម APP។ ហេង ជីវ័ន
ភ្នំពេញៈ កម្ពុជាអនុញ្ញាតឱ្យពលរដ្ឋរកមើលព័ត៌មានស្ដីពីការចាក់វ៉ាក់សាំងកូវីដ ១៩ របស់ពួកគេ តាម APP របស់ធនាគារជាតិឈ្មោះបាគង។ ក្រសួងសុខាភិបាល និងធនាគារជាតិនៃកម្ពុជា បានប្រកាសដាក់ឱ្យប្រើប្រាស់តំណភ្ជាប់ សម្រាប់ស្វែងរកមើលព័ត៌មានចាក់វ៉ាក់សាំងកូវីដ ១៩ របស់សាមីបុគ្គល តាមរយៈប្រព័ន្ធបាគង ដើម្បីទទួលបានភាពច្បាស់លាស់ពីការចាក់វ៉ាក់សាំង និងព្រមទាំងការលើកកម្ពស់ប្រព័ន្ធ ១ ដែលអភិវឌ្ឍដោយស្នាដៃកូនខ្មែរផងដែរ។
ការប្រកាសដាក់ឱ្យប្រើប្រាស់តំណភ្ជាប់ សម្រាប់ស្វែងរកមើលព័ត៌មានចាក់វ៉ាក់សាំងកូវីដ ១៩ របស់សាមីបុគ្គលតាមរយៈប្រព័ន្ធបាគងត្រូវបានធ្វើឡើងនាថ្ងៃទី ២០ ខែកុម្ភៈ ឆ្នាំ ២០២៣ ដោយមានការចូលរួមពី លោកស្រី ជា សិរី អគ្គនាយកបច្ចេកទេសធនាគារជាតិនៃកម្ពុជា និងលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ច ចាក់វ៉ាក់សាំងបង្ការជំងឺកូវីដ ១៩ ក្របខ័ណ្ឌទូទាំងប្រទេស។
លោកស្រី ឱ វណ្ណឌីន បានឲ្យដឹងថា គណៈកម្មការចំពោះកិច្ច ចាក់វ៉ាក់សាំងបង្ការជំងឺកូវីដ១៩ សហការជាមួយធនាគារជាតិនៃកម្ពុជា ដើម្បីរៀបចំឱ្យមានជាតំណភ្ជាប់ តាមរយៈប្រព័ន្ធបាគងនិងប្រព័ន្ធចាក់វ៉ាក់សាំងកូវីដ១៩។
លោកស្រី ថ្លែងថា ការប្រើប្រាស់ប្រព័ន្ធនេះ គឺវាជាការជំរុញឱ្យបងប្អូនប្រជាពលរដ្ឋខ្មែរក្នុងការប្រើប្រាស់ប្រព័ន្ធបាគង ដែលជាស្នាដៃកូនខ្មែរ ។លោកស្រីបន្តថា ប្រជាពលរដ្ឋខ្មែរ កាន់តែស្រួលក្នុងការចូលមើលព័ត៌មានចាក់វ៉ាក់សាំងកូវីដ១៩របស់ខ្លួនឯង ប្រសិនបើបុគ្គល ឬបងប្អូនប្រជាពលរដ្ឋខ្មែរទាំងនោះបានប្រើប្រាស់ប្រព័ន្ធបាគង និងចង់ដឹងពីព័ត៌មានការចាក់វ៉ាក់សាំង ដោយមិនចាំបាច់ចូលមើលប្រព័ន្ធចាក់វ៉ាក់សាំងផ្សេងទៀតនោះទេ។
លោកស្រីបន្ថែមថា៖« ការសម្រួលធ្វើប្រព័ន្ធនេះ វាក៏ជាការរួមចំណែកជួយដល់ប្រជាពលរដ្ឋខ្មែរ និងអតិថិជន ដែលពួកគាត់អាចទទួលបាននូវព័ត៌មានត្រឹមត្រូវ ក៏ដូចជាពួកគាត់អាចដឹងបានពីស្ថានភាពនៃការចាក់រ៉ាក់សាំងកូវីដ១៩របស់ពួកគាត់ និងអាចដឹងបានថា ខ្លួនរបស់ពួកគាត់កំពុងចាក់វ៉ាក់សាំងកូវីដ១៩ បានដល់ដូសទីប៉ុន្មាន ហើយដូសដែលពួកគាត់ចាក់ បានចាប់ផ្ដើមពីថ្ងៃណាជាដើម»។
លោកស្រីឱ វណ្ណឌីន ថ្លែងថា៖ «ដូច្នេះនៅពេលដែលពួកគាត់ឃើញ ពួកគាត់អាចគិតបានហើយថា ឥឡូវដល់វេនដែលត្រូវចាក់ដូសបន្ទាប់ ឬក៏មិនទាន់ដល់វេននោះ។ អ៊ីចឹងអាហ្នឹងវាជាជំនួយមួយ ដើម្បីសម្រួលឱ្យពួកគាត់បានដឹងពីពេលវេលានូវតម្រូវការនៃចាក់ដូសជាបន្តបន្ទាប់ ដែលជាអ្វីយើងតែងតែណែនាំ តែងតែប្រកាសជូនឱ្យពួកគាត់នៅតែបន្តចាក់ដូសជំរុញជាបន្តបន្ទាប់នេះ»។
លោកស្រី ជា សិរី បានថ្លែងថា ប្រជាពលរដ្ឋដែលបានចុះឈ្មោះ មានអត្តសញ្ញាណពេញលេញ អាចស្វែងរកព័ត៌មានចាក់វ៉ាក់សាំងកូវីដ១៩ បានឆាប់រហ័ស ទោះបីពុំបានយកបណ្ណចាក់វ៉ាក់សាំងដាក់តាមខ្លួនក៏ដោយ។លោកស្រីបានបន្ដថា ធនាគារជាតិនៃកម្ពុជា សូមលើកទឹកចិត្តដល់អ្នកប្រើប្រាស់ប្រព័ន្ធបាគង ទៅចុះឈ្មោះបំពេញអត្តសញ្ញាណ ឱ្យបានពេញលេញជាមុន។
លោកស្រីជា សិរី ថ្លែងថា៖ «ធនាគារជាតិនៃកម្ពុជា សង្ឃឹមថា ការដាក់ឱ្យប្រើប្រាស់ជាផ្លូវការ នឹងក្លាយជាសមិទ្ធផលដ៏សំខាន់មួយទៀត រវាងធនាគារជាតិនៃកម្ពុជា និងក្រសួងសុខាភិបាល ហើយស្ថាប័ននឹងបន្ដកិច្ចសហប្រតិបត្តិការល្អបន្ថែមទៀត ដើម្បីធ្វើឱ្យការប្រើប្រាស់ ប្រព័ន្ធបច្ចេកវិទ្យាឌីជីថល កាន់តែប្រសើរឡើង ក៏ដូចជាជំរុញការប្រើប្រាស់ប្រព័ន្ធកត់ត្រា ការចាក់វ៉ាក់សាំងកូវីដ១៩ កាន់តែមានប្រសិទ្ធភាព»។
សូមបញ្ជាក់ថា បាគង ជាប្រព័ន្ធដែលបង្កើតឡើងដោយធនាគារជាតិនៃកម្ពុជា ហើយក៏ជាប្រព័ន្ធទូទាត់បែបទំនើបថ្មីមួយ ដោយតភ្ជាប់ធនាគារ គ្រឹះស្ថានហិរញ្ញវត្ថុ និងក្រុមហ៊ុនផ្តល់សេវាទូទាត់នៅកម្ពុជា ដើម្បីអនុញ្ញាតឱ្យអតិថិជនអាចធ្វើប្រតិបត្តិការហិរញ្ញវត្ថុតាមរយៈកម្មវិធីទូរស័ព្ទ ពីធនាគារ១ទៅធនាគារ១ទៀត ឬពីក្រុមហ៊ុនផ្តល់សេវាទូទាត់ណា១ទៅសមាជិកដ៏ទៃទៀត ជាមួយនឹងភាពងាយស្រួល ឆាប់រហ័ស សុវត្ថិភាព និងចំណាយតិច។គិតត្រឹមខែកញ្ញា ឆ្នាំ២០២២ មានអតិថិជនជាង ៥០ម៉ឺននាក់ បានប្រើប្រាស់ប្រតិបត្តិការក្នុងប្រព័ន្ធបាគងគិតជាទឹកប្រាក់ចំនួ ១,២ប៊ីលានដុល្លារ៕
