លោកហ៊ុន សែន ក្នុងឱកាសទិវាជាតិទីក្រុងស្អាតលើកទី១១ ពីថ្ងៃទី២៧ កុម្ភៈ ។ រូបថត SPM
ភ្នំពេញៈ ក្នុងឱកាសទិវាជាតិទីក្រុងស្អាតលើកទី១១ លោកនាយករដ្ឋមន្ត្រី ហ៊ុន សែន បានស្នើការងារអាទិភាព ៥ ចំណុច ដល់ក្រសួងស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងប្រជាពលរដ្ឋ ចាំបាច់ត្រូវធ្វើ ដើម្បីកែលម្អទីក្រុងនានាឱ្យស្អាត បៃតង ទាក់ទាញទេសចរ នៅចំពេលកម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមខាងមុខ។
លោកហ៊ុន សែន បានស្នើការងារអាទិភាពចំនួន៥ចំណុច ទៅដល់ក្រសួងស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងប្រជាពលរដ្ឋដើម្បីចូលរួមកែលម្អទីក្រុងឱ្យស្អាត ខណៈកម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមក្នុងឆ្នាំ២០២៣ នេះ។
លោកបញ្ជាក់ថា ការងារទាំង៥នោះរួមមាន៖ ទី១ ធានាឱ្យបានសន្តិសុខ ស្ថិរភាព និងវិបុលភាព ទី២បន្តពង្រឹង និងលើកកម្ពស់ភាពជាដៃគូស្ថាប័នរដ្ឋនិងឯកជនដើម្បីជំរុញការអភិវឌ្ឍនៅតាមគោលដៅទេសចរណ៍។ទី៣ ជំរុញការអនុវត្តវិធានការគោលនយោបាយ “ឆ្នាំទស្សនាកម្ពុជា ២០២៣” (Visit Cambodia Year 2023) ដើម្បីពង្រឹងកិត្តិនាមកម្ពុជាទៅកាន់ទីផ្សារទេសចរណ៍ពិភពលោក។ ទី៤ ពង្រឹងភាពជាដៃគូក្នុងការអភិវឌ្ឍទីក្រុង តាមរយៈការជំរុញកិច្ចសហការជាតិ និងអន្តរជាតិ។ ទី៥បំផុសឱ្យមានការចូលរួមយ៉ាងសកម្មពីសំណាក់ប្រជាពលរដ្ឋគ្រប់រូបតាមរយៈការពង្រឹងភាពជាម្ចាសផ្ទះនៅក្នុងការអភិវឌ្ឍនិងថែរក្សាទីក្រុងស្អាតប្រកបដោយបរិស្ថានល្អ ស្អាត ឆ្លាត និងបៃតង។
ទាក់ទងនឹងចំណាត់ការនេះដែរ លោក ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជាបានថ្លែងថា ចក្ខុវិស័យរៀបចំលើកកម្ពស់ទីក្រុងស្អាត និងការប្រណាំងប្រជែងទីក្រុងស្អាតមិនត្រឹមទាក់ទាញតែក្នុងរដូវកាលជាម្ចាស់ផ្ទះស៊ីហ្គេម និងអាស៊ានប៉ារ៉ាហ្គេមប៉ុណ្ណោះទេដែលអាចទាក់ទាញឱ្យភ្ញៀវបរទេសមកកាន់កម្ពុជាលើកក្រោយៗទៀតផង។
លោកឈត ប៊ុនថង បន្តថា៖ ថ្មីៗនេះ រដ្ឋាភិបាលបានត្រៀមលក្ខណៈច្រើនណាស់ទោះបីស្ថិតក្នុងដំណាក់កាលកូវីដ១៩ក្តី រដ្ឋាភិបាលបានព្យាយាមកសាងហេដ្ឋារចនាសម្ព័ន្ធដ៏ច្រើននៅក្រុងសៀមរាប ក្រុងព្រះសីហនុ ក្រៅពីនោះរដ្ឋាភិបាលបានប្រឹងប្រែងកសាងកែច្នៃព្រលានយន្តហោះទាំងភ្នំពេញ សៀមរាប កោះកុង ជាដើម ហើយមានវិធានការជាច្រើនទៀតដែលនៅសេសសល់ត្រូវពង្រឹងសន្តិសុខ សណ្តាប់ធ្នាប់ អនាម័យ បរិស្ថានឱ្យល្អដើម្បីបម្រើភ្ញៀវឱ្យល្អ។
លោកបន្ថែមថា ក្រៅពីការត្រៀមខ្លួនរបស់រដ្ឋាភិបាល ប្រជាជនកម្ពុជាក៏ត្រូវមានភារកិច្ចចូលរួមផងដែរតាមរយៈការរក្សាសីលធម៌រស់នៅ អាកប្បកិរិយាល្អ ថែរក្សាសណ្តាប់ធ្នាប់ បរិស្ថាន ដើម្បីទទួលភ្ញៀវទេសចរបរទេសដែលនឹងមានវត្តមាននៅកម្ពុជាក្នុងព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេមខាងមុខនេះ។
សូមជម្រាបផងដែរថាទិវាជាតិទីក្រុងស្អាតលើកទី១១ នៅឆ្នាំ២០២៣នេះ ធ្វើឡើងក្រោមប្រធានបទ“ទីក្រុងស្អាត បដិសណ្ឋារកិច្ចល្អ ម្ចាស់ផ្ទះកម្ពុជាផ្តល់ភាពកក់ក្តៅ”ដែលមានលោកហ៊ុន សែន ជាប្រធានកិត្តិយសនៃគណៈកម្មាធិការជាតិវាយតម្លៃទីក្រុងស្អាត៕
.jpg)
