ភ្នំពេញៈ លោកនាយក​រដ្ឋមន្ត្រី​ ហ៊ុន សែន លើកឡើងថា បច្ចុប្បន្ននេះ​ទំនាក់ទំនង​កម្ពុជា​សហរដ្ឋអាមេរិក មាន​ភាព​ប្រសើរឡើង​ល្អ​ជាង​ពេលណាៗ​ទាំង​​អស់​។ លោក​ ហ៊ុន សែន បានបញ្ជាក់​បែបនេះ ក្នុងឱកាស​ដែល​លោក​ជួបពិភាក្សា​ការងារ​ជាមួយ​គណៈប្រតិភូ​នៃ​ក្រុមប្រឹក្សា​ធុរកិច្ច​សហរដ្ឋអាមេរិក​-​អាស៊ាន ដែល​ដឹកនាំ​ដោយ​លោក ម៉ៃ​ឃើ​ល មីឆា​ឡាក់ ( Michael Michalak) កាលពី​រសៀល​ថ្ងៃទី​ ២៨ ខែកុម្ភៈ ឆ្នាំ​ ២០២៣ នៅ​វិមាន​សន្តិភាព​។​

​នេះ​បើ​យោងតាម​ការបញ្ជា​ក់រប​ស់លោក ​អ៊ាង សុផល្លែត ជំនួយការ​ផ្ទាល់​លោក​ ហ៊ុន សែន ដែល​បាន​ស្រង់​ប្រសាសន៍​ដែល​លោក​ ហ៊ុន សែន ថ្លែង​ទៅកាន់​ប្រតិភូ​នៃ​ក្រុមប្រឹក្សា​ធុរកិច្ច​សហរដ្ឋអាមេរិក​-​អាស៊ាន ។​

​លោក ​អ៊ាង សុផល្លែត បាន​ដកស្រង់​ប្រសាសន៍​របស់លោក ​ហ៊ុន សែន ដែល​ថ្លែងថា ទំនាក់ទំនង​កម្ពុជា​និង​សហរដ្ឋ​អាមេរិក​កាន់​តែមាន​ភាពប្រសើរ​ពី​ ១ ​ថ្ងៃ ទៅ​ ១ ​ថ្ងៃ តាមរយៈ​ទិដ្ឋភាព​ទំហំ​ពាណិជ្ជ​កម្ម​ទ្វេភាគី ដែលមាន​ការកើនឡើង​។​

​លោក ហ៊ុន សែន បញ្ជាក់ថា​៖ «​កម្ពុជា និង​អាមេរិក ត្រូវ​បន្ត​យកចិត្តទុកដាក់​បន្ថែម លើ​ការធ្វើ​ពាណិជ្ជកម្ម​ជាមួយគ្នានេះ​»​។​

​គណៈប្រតិភូ​នៃ​ក្រុមប្រឹក្សា​ធុរកិច្ច​សហរដ្ឋអាមេរិក​លោក ម៉ៃ​ឃើ​ល មីឆា​​ឡាក់ បាន​កោតសរសើរ​កម្ពុ​ជា ដែល​ទទួលជោគជ័យ​ក្នុងការ​ធ្វើជា​ប្រធាន​អាស៊ាន​ ២០២២ ដែល​បាន​ជួយ​បង្កើន​ទំនាក់ទំនង​ទ្វេភាគី​កម្ពុជា​-​អាមេរិក​លើ​គ្រប់​វិស័យ ព្រមទាំង​លើកកម្ពស់​ដល់​ទំនាក់ទំនង​អាមេរិក​និង​អាស៊ាន​ផង​។​

​លោក មីឆា​ឡាក់ បញ្ជាក់​ដូច្នេះ​ថា​៖ «​គោលបំណង​មកកាន់​កម្ពុជា​នាពេលនេះ​គឺ​សម្តែង​ការគាំទ្រ​ចំពោះ​កិច្ច​ប្រឹង​ប្រែង​របស់​កម្ពុជា ក្នុងការ​ស្តារ​សេដ្ឋកិច្ច​ឡើងវិញ ក្រោយ​វិបត្តិ​ជំងឺ​កូ​វីដ​ ១៩​។ ក្នុងនោះ ក្រុមប្រឹក្សា​ធុរកិច្ច​អាមេរិក​-​អា​ស៊ាន នឹង​ស្វែងរក​មធ្យោបាយ​កែលម្អ​លទ្ធភាព​ទទួលបាន​ហិរញ្ញវត្ថុ​សម្រាប់​សហគ្រាស​ធុន​តូច និង​មធ្យម​ក្នុងស្រុក និង​ឧស្សាហកម្ម​ដែល​រងគ្រោះ​ខ្លាំង ក៏ដូចជា​លើកកម្ពស់​វិស័យ​ឯកជន​របស់​អាមេរិក​»​។​

​គួរ​បញ្ជាក់ថា លោក​លោក ម៉ៃ​ឃើ​ល មីឆា​ឡាក់ (Michael Michalak) ដែល​បាន​ដឹកនាំ​គណៈប្រតិភូ​ធុរកិច្ច​អាមេរិក​-​អាស៊ាន មាន​តួនាទី​ជា​អនុប្រធាន​ជាន់​ខ្ពស់ ជា​នាយក​គ្រប់គ្រង​ប្រចាំ​តំបន់ និង​សមាជិក​រួមមាន​បណ្តា​ក្រុមហ៊ុន​ជាច្រើន​តួយ៉ាង ក្រុមហ៊ុន​Conoco Phillips , ក្រុមហ៊ុន Ford, ក្រុមហ៊ុន RMA Group,​ក្រុមហ៊ុន Pfizer, ក្រុមហ៊ុន Visa, ក្រុមហ៊ុន Vriens& Partners​។​

​លោក ​រ៉ូ វណ្ណៈ អ្នកសិក្សា​ស្រាវជ្រាវ​ភូមិសាស្ត្រ​នយោបាយ យល់ថា ទំនាក់​ទំនង​កម្ពុជា​-​សហរដ្ឋអាមេរិក នាពេល​បច្ចុប្បន្ន​ហាក់​មិនសូវមាន​ភាពល្អប្រសើរ​ឡើយ ហើយ​ការលើកឡើង​របស់លោក​នាយករដ្ឋមន្ត្រី​ជា​ភាសា​ការទូត​មួយ​។

​លោក​បាន​លើកឡើងថា​៖ «​ទំនាក់ទំនង​ប្រទេស​ទាំង​ ២ ​នៅមាន​រកាំរកូស​ច្រើន​ដោយ​មូល​ហេតុដែល​អាមេរិក​ថា កម្ពុជា​ធ្លាក់ចុះ​នៃ​ប្រជាធិបតេយ្យ លម្ហ​សេរីភាព​នយោបាយ សហជីព សារព័ត៌មាន​។ កម្ពុជា​នៅក្នុង​ជម្លោះ​នៃ​ការ​ប្រជែង​ភូមិ​​សាស្ត្រ​នយោបាយ​រវាង​សហរដ្ឋ​អា​​មេ​រិ​ក និង​ចិន​ក្នុង​តំបន់ ខណៈ​អាមេរិក​នៅ​បន្ត​ចោទ​កម្ពុជា​ថា រណប​ចិន ជា​​ពិសេស​ការ​ចោទ​លើ​លទ្ធភាព​នៃ​វត្តមាន​យោធា​ចិន នៅ​មូលដ្ឋានទ័ព​រាម ទោះបី​កម្ពុជា​បាន​ច្រានចោល​ហើយ​ក្តី​»​។​

​ទោះជា​យ៉ាងណាក្តី លោក រ៉ូ វណ្ណៈ ថា ការធ្វើ​ពិពិធ​កម្ម​ការទូត គឺជា​រឿង​សំខាន់​ដែល​កម្ពុជា​គួរផ្តោត​លើ​ន​យោ​បាយ​ការទូត​សេដ្ឋកិច្ច ជាមួយ​មហា​អំណាច​នានា ដែលជា​ក្តីសង្ឃឹម​នៃ​ការ​អភិវឌ្ឍ​សង្គមជាតិ ហើយ​អាច​កាត់​បន្ថយ​អរិភាព​ជាមួយ​មហាអំណាច​តួយ៉ាង​សហរដ្ឋអាមេរិក​ជាដើម​។ កម្ពុជា​គួរ​លើកកម្ពស់​នយោបាយ​ផ្ទៃក្នុង​ខ្លួន ដោយ​ផ្អែកលើ​គោលការណ៍​លទ្ធិ​ប្រជាធិបតេយ្យ សិទ្ធិមនុស្ស សេរីភាព​ខាង​នយោបាយ​និង​សង្គម​ស៊ីវិល ដែលជា​កត្តា​ជំរុញ​ទំនាក់ទំនង​នឹង​មហា​អំណាច​។​

​ប៉ុន្តែលោក​ គិ​ន ភា ប្រធាន​វិទ្យាស្ថាន​ទំនាក់ទំនង​អន្តរជាតិ​នៃ​រាជបណ្ឌិត្យ​សភា​កម្ពុជា បញ្ជាក់ថា នៅក្នុង​ការ​សង្កេត​ពី​កម្រិត​ទំនាក់ទំនង​រដ្ឋ​និង​រដ្ឋ គេ​អាច​ពិនិត្យមើល​លើ​ទិដ្ឋភាព​ច្រើន​ជ្រុង តួយ៉ាង នយោបាយ សេដ្ឋកិច្ច​ពាណិជ្ជកម្ម សង្គម​​វប្បធម៌ ទំនាក់ទំនង​រវាង​មេដឹកនាំ​និង​មេដឹកនាំ និង​ជ្រុង​នានា​ទៀត​។ សម្រាប់​ទំនាក់ទំនង​ក​ម្ពុ​ជា​-​សហរដ្ឋអាមេរិក លោក​ គិ​ន ភា ឯកភាព​ចំពោះ​ការលើកឡើង​របស់លោក ហ៊ុន​ សែន​។

​លោក ​គិ​ន ភា គូសបញ្ជាក់ថា​៖ «​ខ្ញុំ​ឯកភាព ចំពោះ​ការលើកឡើង​របស់​សម្តេច ព្រោះ​ទំហំ​ពាណិជ្ជកម្ម​ទ្វេភាគី រវាង​ប្រទេស ​២​ មានការ​កើន​ឡើងជា​លំដាប់ សូម្បី​ក្នុងដំណាក់កាល​កូ​វីដ ​១៩ ក្តី ជាក់ស្តែង​ការនាំ​ចេញពី​កម្ពុជា​ទៅ​សហរដ្ឋអាមេរិក​ក្នុង​រង្វង់​ទឹកប្រាក់​ជិត​ ១​ ម៉ឺន​លាន​ដុល្លារ​ ដែលជា​ទំហំ​ពាណិជ្ជកម្ម​មួយ​ធំ ដែលជា​សូចនាករ​សម្រាប់​វាស់វែង​ពី​កម្រិត​ទំនាក់ទំនង​កម្ពុជា​-សហរដ្ឋអាមេរិក​»​។​

ទោះជា​យ៉ាងណា​លោក​ គិ​ន ភា យល់ថា ភាគី​ទាំង​ ២ ត្រូវការ​ស្វែងយល់​ពីគ្នា​បន្ថែមទៀត ទៅលើ​ទិដ្ឋភាព​ន​យោ​បាយ ដែល​អាមេរិក​តែង​លើកឡើង​ពី​កង្វល់​នានា ចំណែក​កិច្ចការបរទេស សហរដ្ឋអាមេរិក​នៅតែ​សង្ស័យ​លើ​វត្ត​​មាន​យោធា​ចិន​នៅ​កម្ពុជា​៕

វីដេអូ៖