ក្រុមការងារកំពុងដាក់របាំងសំណាញ់ការពារសត្វប្រចៀវកុំឱ្យតោងប្រាសាទ នៅប្រាសាទអង្គរវត្ត។ រូបថត អាជ្ញាធរជាតិអប្សរា
សៀមរាបៈ អាជ្ញាធរជាតិអប្សរាបានដាក់សំណាញ់ការពារសត្វប្រចៀវកុំឱ្យតោងនៅតាមទីតាំងមួយចំនួនបន្ថែមទៀតនៃដំបូលប្រាសាទអង្គរវត្ត ពីព្រោះទឹកនោម និងលាមកសត្វប្រចៀវ វាធ្វើឱ្យថ្មប្រាសាទពុកផុយ និងធុំក្លិនមិនល្អដល់ភ្ញៀវទេសចរ។
លោក សយ សុភារិន្ទ អ្នកទទួលបន្ទុកកិច្ចការអភិរក្សនៅប្រាសាទអង្គរវត្ត នៃនាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរា បានឱ្យដឹងថា ការងាររៀបចំដាក់សំណាញ់ការពារសត្វប្រចៀវ នៅប្រាសាទអង្គរវត្ត ក្រុមការងារបានរៀបចំច្រើនកន្លែងមកហើយ។
កន្លងមកក្រុមការងារ បានធ្វើនៅរួតបាកាណ និងរួតព្រះពាន់នៃប្រាសាទអង្គរវត្ត។ ប៉ុន្តែដោយសង្កេតឃើញថា ខ្លោងទ្វារខាងលិចប្រាសាទអង្គរវត្ត មានសត្វប្រចៀវមករស់នៅច្រើន ហើយបាននោម និងលាមកធ្វើឱ្យថ្មប្រាសាទពុកផុយ និងធុំក្លិនដល់ភ្ញៀវទេសចរផងទើបក្រុមការងារបានដាក់សំណាញ់ការពារនៅទីនេះទៀត។
បើតាមអាជ្ញាធរជាតិអប្សរា ការដាក់សំណាញ់ការពារសត្វប្រចៀវពេលនេះ សរុបមានចំនួន ១៦០ ម៉ែត្រការ៉េ ដែលអនុវត្តក្នុងខែកុម្ភៈឆ្នាំ២០២៣ និងបញ្ចប់នៅខែមីនា ឆ្នាំ២០២៣៕
