លោកនាយករដ្ឋមន្ត្រីហ៊ុន សែន ក្នុងពិធីមួយនៅខណ្ឌជ្រោយចង្វារកាលពីឆ្នាំ២០២២។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន បានធ្វើការអំពាវសាជាថ្មីទៀត ឱ្យពលរដ្ឋគ្រប់រូបចូលរួមទប់ស្កាត់បដិវត្តន៍ពណ៌និងថែរក្សាសុខសន្តិភាព និងបានប្រកាសមិនលើកលែងឱ្យជនណាក៏ដោយ ដែលមានបំណងបំផ្លាញសន្តិភាពរបស់កម្ពុជា។
លោកនាយករដ្ឋមន្ត្រីអំពាវនាវដូច្នេះ នៅក្នុងពិធីប្រគល់សញ្ញាបត្រដល់សិក្ខាកាម និងនិស្សិតនៃវិទ្យាស្ថានខ្មែរជំនាន់ថ្មី ជិត ២ ពាន់នាក់ នាមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារនៅព្រឹកថ្ងៃទី ៦ ខែមីនា ឆ្នាំ ២០២៣។
លោកមានប្រសាសន៍ថា៖ «យើងនឹងមិនអត់ឱនឱ្យអ្នកណាក៏ដោយ មិនថាខ្មែរ ឬបរទេស ដែលធ្វើសកម្មភាពប្រឆាំងនឹងឯករាជ្យ អធិបតេយ្យរបស់យើងក្រោមហេតុផលប្រជាធិបតេយ្យ និងសិទ្ធិមនុស្ស ហើយធ្វើឱ្យប្រទេសរបស់យើងមានសង្គ្រាមឡើងវិញនោះទេ។ យើងស្លាប់មនុស្សច្រើនណាស់ហើយ គ្រប់គ្រាន់ហើយ វាលើសពីការគ្រប់គ្រាន់ ដូច្នេះត្រូវចូលរួមការពារសន្តិភាពប្រសើរជាង» ។
ពាក់ព័ន្ធនឹងបញ្ហានេះ លោក អ៊ូ ច័ន្ទរ័ត្ន សហស្ថាបនិកគណបក្សកែទម្រង់កម្ពុជា យល់ថា គ្មាននរណាម្នាក់ចង់ឱ្យមានបដិវត្តន៍ពណ៌នៅកម្ពុជាឡើយ មិនថា ពលរដ្ឋទូទៅ មន្ត្រីរដ្ឋាភិបាល ឬអ្នកនយោបាយក្រៅរដ្ឋាភិបាលសុទ្ធតែមានគោលដៅជ្រោមជ្រែងសង្គមជាតិ ស្របតាមលទ្ធិប្រជាធិបតេយ្យ។
លោកថា ក៏គ្មានដែរប្រទេសបរទេស ដែលចង់ឃើញកម្ពុជាធ្លាក់ទៅក្នុងភ្នក់ភ្លើងសង្គ្រាម ព្រោះបរទេសទាំងនោះ ក៏បានជួយកម្ពុជា ដើម្បីបញ្ចប់សង្គ្រាម ចរចារកសន្តិភាព និងកសាងជាតិឡើងវិញផងដែរ កាលពីកិច្ចអន្តរាគមន៍របស់អង្គការសហប្រជាជាតិកាលពីឆ្នាំ ១៩៩១ លើកលែងតែប្រទេសដែលចង់ឆ្លៀតយកឱកាសឈ្លានពានកម្ពុជាប៉ុណ្ណោះ។
លោក អ៊ូ ច័ន្ទរ័ត្ន បញ្ជាក់ដូច្នេះថា៖«ការលើកឡើងដូច្នេះនឹងមិនមានបញ្ហាធំដុំដល់កម្ពុជាប៉ុន្មានឡើយ ខណៈទំនាក់ទំនងជាអន្តរជាតិម្តងក្តៅ ម្តងត្រជាក់ ជាប្រពៃណីស្រាប់ហើយ។ ប៉ុន្តែវានឹងអាចជះឥទ្ធិពលដល់ទំនុកចិត្តរបស់សហគមន៍អន្តរជាតិមកលើកម្ពុជាយើង ដោយសារយើងចេះតែអនុវត្តវោហារសាស្ត្រនយោបាយ និងលើកឡើងដោយឃ្លីងឃ្លោងបែបនេះ»។
សម្រាប់លោក ឯម សុវណ្ណារ៉ា អ្នកវិភាគ និងជាសាស្ត្រាចារ្យផ្នែកវិទ្យាសាស្ត្រនយោបាយ មើលឃើញថា ការអំពាវនាវរបស់ក្រុមប្រទេសលោកខាងលិចកន្លងមក ជុំវិញការធ្លាក់ចុះនូវលទ្ធិប្រជាធិបតេយ្យនៅកម្ពុជា ជាពិសេសករណីកាត់ទោសលោកកឹម សុខា ដែលគេយល់ថា ជាអំពើអយុត្តិធម៌បានក្លាយទៅជាចរន្តដែលធ្វើឱ្យលោកនាយករដ្ឋមន្ត្រី ខ្លាចឥទ្ធិពលនៃសម្ទុះរបស់លោកខាងលិច ចំពោះលោក កឹម សុខា ដែលជាអ្នកនយោបាយប្រឆាំង ខណៈបញ្ហាបដិវត្តន៍ពណ៌វិញនោះ គ្រាន់តែអំណះអំណាងរបស់រដ្ឋាភិបាល ដែលគេមិនទាន់មានភ័ស្តុតាងអាចទទួលយកបាន។
ប៉ុន្តែ លោក សុខ ឥសាន អ្នកនាំពាក្យគណបក្សប្រជាជនថ្លែងថា ការលើកឡើងរបស់លោកនាយករដ្ឋមន្ត្រីជាការព្រួយបារម្ភជុំវិញបទពិសោធន៍ជូរចត់កន្លងមក ដែលកម្ពុជាធ្លាប់ហែលឆ្លងក្នុងសម័យសង្គ្រាមស៊ីវិល និងគំរូផលលំបាក ពីបដិវត្តន៍ពណ៌កើតមានជុំវិញពិភពលោកផ្សារភ្ជាប់ស្ថានភាពកម្ពុជា។
លោក សុខ ឥសាន បន្តថា៖«ព្រោះតែមានការព្រួយបារម្ភខ្លាចកម្ពុជាធ្លាក់ទៅក្នុងមហន្តរាយដូចអតីតកាល បានជាសម្តេចធ្វើការអំពាវនាវឱ្យប្រជាជនយើងរួបរួមគ្នាដើម្បីកុំឱ្យកើតមានបដិវត្តន៍ពណ៌ក្នុងទឹកដីកម្ពុជា ហើយខ្លាចក្រែងបានសម្រេចដូចនៅបណ្តាប្រទេសមួយចំនួន តួយ៉ាងលីប៊ី អេហ្ស៊ីប ទុយនេស៊ី ជាដើម ដែលជួបផលលំបាកមកដល់បច្ចុប្បន្ន ថាតើវាចំណេញ ឬខាតដល់ប្រជាជាតិទាំងនោះ?»។
លោកលើកឡើងថា៖«យើងឃើញហើយ សម្រាប់កម្ពុជាដែលធ្លាប់ឆ្លងកាត់សង្គ្រាមផ្ទៃក្នុង សង្គ្រាមឈ្លានពានរបស់បរទេស ឆ្លងកាត់របបប្រល័យពូជសាសន៍ យើងហែលឆ្លងវិនាសកម្មខ្លាំងក្លាណាស់ ទម្រាំស្តារប្រទេសបាន»។
លោក សុខ ឥសាន បន្ថែមថា រដ្ឋាភិបាលដែលដឹកនាំដោយគណបក្សប្រជាជនកម្ពុជានឹងមិនអនុញ្ញាតឱ្យជនណាប្រើលេសសាបព្រោះប្រជាធិបតេយ្យ និងសិទ្ធិមនុស្សមកបំផ្លាញគុណតម្លៃសន្តិភាពរបស់កម្ពុជាបាននោះទេ ព្រោះករណីខ្លះ វាជាមហិច្ឆិតាប្រតិកិរិយារបស់ក្រុមប្រទេសបរទេស មកលើកម្ពុជា។
បន្ថែមពីនេះ លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា ប្រាប់ភ្នំពេញប៉ុស្តិ៍នាថ្ងៃទី៦ មីនា ថា មេរៀនកម្ពុជាដែលគេគួរសិក្សាផងដែរនោះ គឺបដិវត្តន៍ពណ៌ដែលកើតមាននៅពិភពអារ៉ាប់កន្លងទៅថ្មីៗនៅសតវត្សរ៍ទី២១នេះ ដែលនៅជាមេរៀនក្តៅនៅឡើយទេ នៅក្នុងប្រទេសដូចជាស៊ីរី លីប៊ី ទុយនេស៊ី ដែលរងនូវបដិវត្តន៍ផ្កាម្លិះ ឬបដិវត្តន៍ពិភពអារ៉ាប់។
ឥឡូវនេះ ប្រទេសទាំងនេះ មិនទាន់ស្រោចស្រង់ប្រទេសបាននៅឡើយទេ ដោយសារតែការជឿទៅលើការញុះញង់នយោបាយ និងការលូកលាន់ពីបរទេស ធ្វើឱ្យប្រជាជន និងយុវជនជឿ ហើយធ្វើការផ្ដួលរំលំរដ្ឋាភិបាល នាំឱ្យប្រទេសជួបនូវអសន្តិសុខ និងបំផ្លាញសន្ដិភាព។
លោកថ្លែងថា៖ «អ៊ីចឹង នេះជាមេរៀនដែលកម្ពុជាត្រូវតែចៀសវាងឱ្យបាន ហើយថែរក្សាសន្ដិភាព ពីព្រោះការអនុវត្តប្រជាធិបតេយ្យ វាមានមូលដ្ឋានខុសគ្នា សម្រាប់បច្ចិមប្រទេស និងពិភពអាស៊ីយើងហ្នឹងវាខុសគ្នា ដោយសារតែឥរិយាបថសង្គម ដោយសារតែប្រព័ន្ធដឹកនាំរដ្ឋអីជាដើម។ អ៊ីចឹង យើងមិនអាចប្រៀបធៀបឱ្យដូចគ្នាបានទេ។ ដូច្នេះ ការការពារសន្តិភាព ការពារស្ថិរភាពសង្គម ដែលទើបតែរកបានពីឆ្នាំ១៩៩៨នេះគឺជាការចាំបាច់»។
កាលពីថ្ងៃទី ៣ ខែមីនា ឆ្នាំ ២០២៣ សាលាដំបូងរាជធានីភ្នំពេញបានចេញសាលក្រមសម្រេចផ្តន្ទាទោសលោក កឹម សុខា ប្រធានអតីតគណបក្សសង្គ្រាះជាតិឱ្យជាប់ពន្ធនាគាររយៈពេល ២៧ ឆ្នាំ ពីបទ «ក្បត់ជាតិ» ក្នុងសំណុំរឿងសន្ទិដ្ឋភាពជាមួយបរទេស ដោយត្រូវឃុំខ្លួននៅក្នុងផ្ទះ ព្រមទាំងដកសិទ្ធិពលរដ្ឋ និងសិទ្ធិធ្វើនយោបាយ ពាក់ព័ន្ធនឹងការប៉ុនប៉ងផ្តួលរំលំរដ្ឋាភិបាល ឬបដិវត្តន៍ពណ៌ដែលទទួលជំនួយពីរដ្ឋបរទេស។
គួរជម្រាបជូនផងដែរថា លោក ហ៊ុន សែន ក៏បានប្រកាសជារឿយៗផងដែរប្រាប់ដល់បណ្តាបរទេសកុំឱ្យលូកលាន់កិច្ចការផ្ទៃក្នុងរបស់កម្ពុជា៕
វីដេអូ៖
