​កំពង់ធំៈ ផាត់​សណ្តាយ ជា​សហគមន៍​អេកូ​ទេសចរណ៍ធម្មជាតិ​ស្ថិត​លើ​ផ្ទៃ​ទឹក​បឹង​ទន្លេសាប​មាន​សក្តានុពល​ធម្មជាតិ​ដូចជា​ធនធាន​ជីវជម្រុះ​ដ៏​សម្បូរបែប កន្លែង​កម្សាន្ត​សម្រាក​លម្ហែកាយ​បែប​ធម្មជាតិ​រួមជាមួយ​នឹង​ផ្ទាំងទស្សនីយភាព​ស្រស់ស្អាត​នៃ​ផ្ទះ​បណ្តែត​ទឹក ព្រៃ​លិច​ទឹក​រាប់ម៉ឺន​ហិកតា ដើម​ស្តី ដែលជា​ប្រភេទ​ឈើ​ព្រៃ​លិច​ទឹក ដែលមាន​ទំហំ​ដ៏​ធំ (១២​ ឱប​មនុស្សពេញវ័យ​) និង​មាន​អាយុកាល​ជាង ២០០ ​ឆ្នាំ​។​

​សហគមន៍​អេកូ​ទេសចរណ៍​ផាត់​សណ្តាយ ត្រូវបាន​បង្កើតឡើង​តាំងពី​ឆ្នាំ​២០១៩ ដែលមាន​ទីតាំង​ស្ថិតនៅ​ឃុំ​ផាត់​សណ្តាយ ស្រុក​កំពង់ស្វាយ ខេត្តកំពង់ធំ​។ សហគមន៍​ទេសចរណ៍​មួយ​នេះ​ស្ថិតក្នុង​សហគមន៍​នេសាទ ផាត់​សណ្តាយ ដែល​ដើមឡើយ ប្រជាជន​ប្រមាណ​១​ពាន់​គ្រួសារ​ដែល​រស់នៅ​ទីនោះ​ពឹងផ្អែក​លើ​របរ​នេសាទ​ស្ទើរតែ​ទាំងស្រុង តែ​ក្រោយពី​ការបង្កើត​សហគមន៍​អេកូ​ទេសចរណ៍ធម្មជាតិ​មក ប្រជា​សហគមណ៍​នៅ​ទីនោះ​បាន​ងាក​មក​រួមចំណែក​ផ្តល់​សេវាកម្ម​ទេសចរណ៍​ដែល​វា​បាន​លើកកម្ពស់​ជីវភាព​រប​ស់​ពួកគេ​មួយកម្រិត​ទៀត​។​

​បើតាម​លោក ហ៊ួ​ត ស៊ី​ណាត ប្រធាន​កម្មវិធី​សម្របសម្រួល​ជីវភាព FACT’s Livelihood Program Coordinator ដែលជា​អង្គការ​មួយ​សហការ​ជាមួយ​សហគមន៍​អេកូ​ទេសចរណ៍​ផាត់​សណ្តាយ​បាន​ឱ្យដឹងថា​ ប្រជា​សហគមន៍​ដែល​រួមចំណែក​ផ្ទាល់​ក្នុង​វិស័យ​ទេសចរណ៍​មាន​ភាពប្រសើរ​ជាង​មុន ពោលគឺ​ប្រាក់ចំណូល​របស់គាត់​មានការ​កើនឡើង​។​

​លោក ហ៊ួ​ត ស៊ី​ណាត បាន​បញ្ជាក់ថា​៖ «​តាមរយៈ​ការផ្តល់​សេវាកម្ម​ទេសច​រណ៍ ពួកគាត់​បានរៀបចំ​ផ្ទះ ឱ្យ​ភ្ញៀវ គាត់​បាន​ចម្អិន​អាហារ​ឱ្យភ្ញៀវ អ៊ីចឹង​ទៅ​ទាំងអស់នេះ​សុទ្ធតែជា​ចំណូល មួយទៀត​ពួកគាត់​មាន​ទូក នៅពេលដែល​គាត់​ដឹក​ភ្ញៀវ​ក៏បាន​ចំណូល​១ផ្នែក​ទៀត​»​។​

​ប្រភព​ដដែល​នេះ​បាន​បន្តថា​៖ «​នៅក្នុង​នោះ​ផងដែរ​ក៏​ពួកគាត់​មាន​លក់​នូវ​វត្ថុ​អនុស្សាវរីយ៍ ជា​កាបូប​កែច្នៃ​ពី​កំប្លោក​អ៊ីចឹង​ទៅ ហើយ​មួយទៀត​ពាក់ព័ន្ធ​នឹង​ការលក់​ផលិតផល​កែច្នៃ​ត្រី ឧទាហរណ៍​ត្រីងៀត ត្រីឆ្អើរ ប្រហុក ផ្អក អ៊ីចឹ​ង​ក៏​គាត់​ទទួលបាន​ចំណូល​បន្ថែម​ដែរ​»​។​

​ បន្ថែម​ពីលើ​នេះ ប្រធាន​កម្មវិធី​សម្របសម្រួល​ជីវភាព រូបនេះ​បាន​ឱ្យ​ដឹង​ទៀតថា នៅពេល​ដែលមាន​វេទិកា​អេកូ​ទេសចរណ៍​ថ្នាក់ជាតិ ឬក៏​ថ្នាក់​ខេត្ត ខាង​សហគមន៍​តែង​ជំរុញ​ឱ្យប្រជា​សហគមន៍​ចូលរួម ដាក់លក់​ផលិតផល​របស់ខ្លួន ដែល​ពួកគាត់​អាច​ទាញយក​ប្រាក់ចំណូល​១ផ្នែក ដែល​ទាំងអស់នេះ​ពុំទាន់​បូក​បញ្ចូល​នូវ​ចំណូល​ដែល​បានមកពី​ក​ម្រោ​ង​ស្ថានីយ​ទឹកបរិសុទ្ធ​នៅឡើយ​។​

​ជាមួយនឹង​សម្រស់​ធម្មជាតិ ព្រៃ​លិច​ទឹក បូករួម​នឹង​ទេសភាព​ដ៏​ស្រល់​ត្រកាល​ជាច្រើន សហគមន៍​អេកូ​ទេសចរណ៍ធម្មជាតិ​នៅលើ​បឹង​ទន្លេសាប​មួយ​នេះ​បាន​ស្រូប​ទាញ​អ្នកទេសចរ​ទស្សនា​កម្សាន្ត មិន​លស់​ថ្ងៃ​ឡើយ ពោលគឺ​ជាប្រចាំ​ទេសចរ​ដែល​មក​ទស្សនា​កម្សាន្ត​មាន​ប្រមាណ ៩​ទៅ​១០​នាក់​ក្នុង​១ថ្ងៃ​។​

​ លោក ហ៊ួ​ត ស៊ី​ណាត​ បាន​បន្ត​ឱ្យដឹង​ទៀតថា​៖ «​ចំនួន​ទេសចរ​ទៅ​ទស្សនា​សហគមន៍ ផាត់​សណ្តាយ បើ​គិត​ក្នុង​១ថ្ងៃ​ប្រហែលជា ១០​នាក់ នេះ​បើ​គិតតែ​តាម​ភ្ញៀវ​ដែល​គាត់​មក​តាមរយៈ​សហគម​ន៍ តែបើ​សិន​គាត់​ទៅ​ទស្សនា​ផ្សេងៗ ឬ​តាម​ក្រុមហ៊ុន Tour ផ្សេងៗ រឿង​ហ្នឹង​យើង​ក្តាប់​អត់​បានទេ នេះ​ខ្ញុំ​និយាយ​តែ​គាត់​មក​តាម​សហគមន៍ បានន័យថា​គាត់​មក​តាមរយៈ​សហគម​ន៍​អេកូ​ទេសចរណ៍ ផាត់​សណ្តាយ​»​។

​ក្នុងចំណោម​ទេសចរ​ដែ​ល​មក​ទស្សនា​សហគមន៍​អេកូ​ទេសចរណ៍ ផាត់​សណ្តា​យ លោក ស៊ី​ណាត បាន​ឱ្យដឹងថា មាន​ទាំង​ភ្ញៀវទេសចរ​ជាតិ និង​អន្តជាតិ ប៉ុន្តែ​យ៉ាងណា​មួយរយៈ​ចុងក្រោយ​នេះ​លោក​សង្កេតឃើញថា ​ភ្ញៀវ​បរទេស​ហាក់​មាន​ចំនួន​ច្រើនជាង​ភ្ញៀវ​ខ្មែរ​ ក៏ប៉ុន្តែ​ពួកគេ​មិន​និយម​ស្នាក់​នៅក្នុង​សហគមន៍​ប៉ុន្មាន​ទេ​គឺ​ដោយសារ​កត្តា​អាកាសធាតុ​។​

លោក ហ៊ួ​ត ស៊ី​ណាត ថ្លែងថា៖ «​មួយរយៈ​ចុងក្រោយ​នេះ មាន​ភ្ញៀវ​បរទេស​មក​ច្រើន​។ ពួកគាត់​ចាប់អារម្មណ៍​តែ​គ្រាន់តែ​ថា ភ្ញៀវ​បរទេស​គាត់​មក​ទស្សនា​ហើយ​ភាគច្រើន​គាត់​ឡើង​ទៅលើ​វិញ​ព្រោះ​ដោយសារ​គាត់​អត់​ស៊ាំ​ជាមួយនឹង​អាកាសធាតុ​នៅទីនេះ នៅក្នុង​ទឹកអ៊ី​ចឹ​ង គាត់​ពិបាក​បត់​ដៃ​បត់ជើងអ៊ី​ចឹ​ង​ទៅ​។ យ៉ាងណា​ក៏មាន​ស្នាក់ការ​ដែរ មិនមែន​អត់​ទាំងអស់​ទេ ដូច​ថ្មីៗ​ហ្នឹង​គឺមាន ១​ក្រុម ២​ក្រុម គាត់​មក​ស្នាក់នៅ ២​យប់ បាន​គាត់​អញ្ជើញ​ឡើងទៅ​វិញ​»​។​

​គួរ​ជម្រាប​ដែរ​ថា សហគមន៍​អេកូ​ទេសចរណ៍ធម្មជាតិ​ផាត់​សណ្តាយ មាន​ចម្ងាយ​ប្រមាណ​ជាង​៥០​គីឡូម៉ែត្រ ពី​ទី​រួម​ខេត្ត កំពង់ធំ ហើយ​អ្នកទេសចរ​មាន​ជម្រើស​ក្នុងការ​ធ្វើដំណើរ​ចំនួន​២ ពោលគឺ​ផ្លូវគោក ប្រើប្រាស់​មធ្យោបាយ​ដោយ​រថយន្ត​ឬ​ម៉ូតូ និង​តាមរយៈ​កាណូត​របស់​សហគមន៍​ចេញពី​ទី​រួម​ខេត្ត​តាម​ស្ទឹងសែន មកកាន់​សហគមន៍​បាន​៕