ក្មេងស្រីម្នាក់ពុលអាហារស្លាប់ នៅខេត្តបន្ទាយមានជ័យ កាលពីឆ្នាំ ២០២១។ រូបថត នគរបាល
ភ្នំពេញៈ មនុស្សយ៉ាងហោចណាស់ ៨២ នាក់ បានបាត់បង់ជីវិតដោយសារការពុលចំណីអាហារ ជាពិសេស ការពុលស្រាស ក្នុងចំនួនអ្នកពុលសរុបជាង ១ ៥០០ នាក់ ក្នុងរយៈពេល ៥ ឆ្នាំ។ នេះបើតាមរបាយការណ៍របស់ក្រសួងសុខាភិបាលដែលទើបចេញផ្សាយ។
នៅក្នុងរបាយការណ៍បូកសរុបរយៈពេល ៥ ឆ្នាំ រវាងឆ្នាំ ២០១៨ ដល់ឆ្នាំ ២០២២ ករណីពុលចំណីអាហារសរុបមានចំនួន ១ ៥៣៤នាក់ ហើយនៅក្នុងចំនួននៃការពុលនោះមានអ្នកឈឺធ្ងន់ធ្ងរចំនួន ៨១៨ នាក់ និងស្លាប់ ៨២ នាក់។
ទោះបីជារបាយការណ៍របស់ក្រសួងសុខាភិបាលនេះ មិនបានបញ្ជាក់ពីមូលហេតុដែលបណ្តាលឱ្យអ្នកពុលស្លាប់ ប៉ុន្តែយោងតាមរបាយការណ៍របស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ (ក.ប.ប.) របស់ក្រសួងពាណិជ្ជកម្មបានបង្ហាញថា ឆ្នាំ ២០២០ និងឆ្នាំ ២០២១ មានអ្នកស្លាប់ដោយសារការពុលស្រាសច្រើន។
របាយការណ៍របស់ ក.ប.ប. ដែលចេញផ្សាយនៅថ្ងៃទី ១២ ខែកក្កដា ឆ្នាំ ២០២១ បានបង្ហាញពីការកើតឡើងផ្ទួនៗគ្នាលើករណីស្លាប់ដោយសារការពុលស្រា ដែលក្នុងរយៈពេល ១ ឆ្នាំ ចន្លោះខែមិថុនា ឆ្នាំ ២០២០ រហូតដល់ដើមខែកក្កដា ឆ្នាំ ២០២១ មានអ្នកស្លាប់រហូតដល់ ៧០ នាក់។
របាយការណ៍នោះបង្ហាញថា ក្នុងខែមិថុនា ឆ្នាំ ២០២០ ប្រជាពលរដ្ឋ ៧ នាក់ស្លាប់នៅក្នុងស្រុកម៉ាឡៃ ខេត្តបន្ទាយមានជ័យ ដោយសារផឹកស្រាថ្នាំតាំងកួយ។ នៅខែវិច្ឆិកាឆ្នាំ ២០២០ នៅស្រុកទឹកផុស ខេត្តកំពង់ឆ្នាំង មានអ្នកស្លាប់ចំនួន ១៥ នាក់ ដោយសារផឹកស្រា ស។
រីឯនៅខែឧសភា ឆ្នាំ ២០២១ នៅស្រុកល្វាឯម ខេត្តកណ្ដាល ស្លាប់ ១៤ នាក់ ដោយសារផឹកស្រាស និងស្រាថ្នាំ។ ចំណែកនៅខែឧសភា ឆ្នាំ ២០២១ នៅស្រុកកំពង់ត្រាច ខេត្តកំពត ក៏មានអ្នកស្លាប់ចំនួន ១០ នាក់ដោយសារផឹកស្រាថ្នាំផងដែរ។
ដោយឡែកនៅខែមិថុនា ឆ្នាំ ២០២១ នៅឃុំអន្សាចំបក់ ស្រុកក្រគរ ខេត្តពោធិ៍សាត់ មនុស្ស ៧ នាក់បានស្លាប់ ដោយសារផឹកស្រា ស និងស្រាថ្នាំ ខណៈនៅខែមិថុនា ឆ្នាំ ២០២១ ដដែល នៅស្រុកពារាំង ខេត្តព្រៃវែង មានអ្នកស្លាប់ចំនួន ៤ នាក់ ដោយសារតែផឹកស្រា ស និងស្រាថ្នាំ។
ចំណែកនៅក្នុងខែកក្កដា ឆ្នាំ ២០២១ មានអ្នកស្លាប់ចំនួន ១០ នាក់ នៅភូមិកោះជ្វាំង ឃុំស្វាយទងខាងត្បូង ស្រុកកំពង់ត្រាច ខេត្តកំពត និងនៅភូមិលើ ឃុំកោះចូរ៉ាម ស្រុកខ្សាច់កណ្តាល ខេត្តកណ្តាល ក៏កើតមានករណីពុលស្រាសស្រាថ្នាំ បណ្តាលឱ្យស្លាប់បុរសអ្នកផឹកស្រាថ្នាំចំនួន ៣ នាក់ផងដែរ។
ក្រសួងសុខាភិបាលបានអះអាងថា៖ «រាល់សំណាកនៃការពុលត្រូវបានបញ្ជូនទៅវិភាគនៅមជ្ឈមណ្ឌលជាតិពិសោធន៍សុខាភិបាល»។
ក្រោយការពុលស្រាជាបន្តបន្ទាប់ ក្រសួងបានរៀបចំវគ្គបណ្តុះបណ្តាលជនបង្គោលក្នុងការអនុវត្តគោលការណ៍ណែនាំ និងនីតិវិធីប្រតិបត្តិស្តង់ដាលើការផលិតស្រាស វិធីសាស្ត្រវិភាគរកមេតាណុលក្នុងស្រា ស ដោយប្រើតេស្តរហ័សនិងតារាងលក្ខណវិនិច្ឆ័យសម្រាប់ត្រួតពិនិត្យក្នុងខ្សែចង្វាក់ផលិតកម្មស្រាស នៅខេត្តសៀមរាបដោយមានសមាសភាពចូលរួមពីមន្ត្រីការិយាល័យសុវត្ថិភាពចំណីអាហាររួមទាំងមន្ត្រីរបស់មន្ទីរសុខាភិបាលខេត្ត និងដៃគូអភិវឌ្ឍន៍ រួមមាន HKI WHO WB និង FAO ជាដើម។
កម្ពុជាមានច្បាប់ស្តីពីសុវត្ថិភាពម្ហូបអាហារចាប់តាំងពីពាក់កណ្តាលឆ្នាំមុន បន្ទាប់ពីព្រះមហាក្សត្រព្រះបាទសម្តេចនរោត្តម សីហមុនី ឡាយព្រះហស្តលេខាដាក់ឱ្យប្រើប្រាស់នៅថ្ងៃទី ៨ ខែមិថុនា ២០២២។
ច្បាប់ដែលមាន ១១ ជំពូក និង ៤៣ មាត្រាមានវិសាលភាពអនុវត្តចំពោះការគ្រប់គ្រងគុណភាព និងសុវត្ថិភាពម្ហូបអាហារ ដែលគ្របដណ្តប់គ្រប់ដំណាក់កាលនៃខ្សែចង្វាក់ផលិតកម្មម្ហូបអាហារ និងលើអាជីវកម្មម្ហូបអាហារនៅកម្ពុជា។
នៅក្នុងពិធីបិទសន្និបាតលើកទី ៤២ ស្តីពី «ការបូកសរុបសមិទ្ធផលសុខាភិបាលរយៈពេល ៥ ឆ្នាំ (២០១៨-២០២២) និងទិសដៅឆ្នាំ ២០២៣ និងឆ្នាំបន្ត» របស់ក្រសួងសុខាភិបាលពីថ្ងៃទី ៧ ខែមីនា លោកនាយករដ្ឋមន្ត្រី ហ៊ុន សែន ស្នើក្រសួងស្ថាប័នពាក់ព័ន្ធ និងក្រសួងសុខាភិបាលលើកកម្ពស់ និងជំរុញការផ្សព្វផ្សាយ ព្រមទាំងអប់រំពីបញ្ហាម្ហូបអាហារ ដើម្បីបញ្ចៀសផលប៉ះពាល់សុខភាព និងអាយុជីវិតប្រជាជនដែលការណ៍នេះបង្កើនបន្ទុកចំណាយរបស់ប្រជាជន និងការចំណាយបន្ថែមរបស់រាជរដ្ឋាភិបាលលើវិស័យសុខាភិបាល៕
.jpg)
