រដ្ឋមន្ត្រីក្រសួងកសិកម្មដឹកនាំប្រជុំស្តីពីការពិនិត្យលើដំណើរការអនុវត្តគម្រោងវិនិយោគសម្បទានដីសេដ្ឋកិច្ច។ រូបថត ក្រសួងកសិកម្ម
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានដឹកនាំកិច្ចប្រជុំពិភាក្សាស្តីពីការពិនិត្យលើដំណើរការអនុវត្តគម្រោងវិនិយោគសម្បទានដីសេដ្ឋកិច្ចនៅទីស្តីការក្រសួង នាថ្ងៃទី១៦ ខែមីនានេះ ដើម្បីផ្តល់ការណែនាំបន្ថែមក្នុងការចូលរួមដោះស្រាយបញ្ហាដីសម្បទានសេដ្ឋកិច្ចឱ្យមានប្រសិទ្ធភាព និងផ្តល់ប្រយោជន៍ដល់សេដ្ឋកិច្ចជាតិ។
យោងតាមក្រសួងកសិកម្មបានឱ្យដឹងថា បន្ទាប់ពីទទួលស្តាប់ការបង្ហាញ និងកិច្ចពិភាក្សា លោករដ្ឋមន្ត្រី បានលើកទឹកចិត្ត និងទទួលស្វាគមន៍នូវរាល់គំនិតផ្តួចផ្តើមទាំងអស់ក៏ដូចជាធាតុចូលបន្ថែមតាមខេត្តនីមួយៗ។ ការងារនេះ ត្រូវមានការចូលរួមពីអង្គភាពពាក់ព័ន្ធ ប្តេជ្ញាធ្វើការសហការរួមគ្នាល្អ ធ្វើការរួមគ្នាដោយឆន្ទៈ និងការទទួលខុសត្រូវ តម្កល់ផលប្រយោជន៍ជាតិជាធំ ដោយត្រូវយកបញ្ហាប្រឈមដាក់លើតុ នាំគ្នាពិភាក្សារកដំណោះស្រាយឱ្យបានល្អបំផុត។ ចំពោះការវាយតម្លៃចំណាត់ថ្នាក់គម្រោង ត្រូវពិនិត្យមើលឱ្យបានគ្រប់ចំណុច ឱ្យល្អិតល្អន់ ទាន់ពេលវេលា ប្រកបដោយបច្ចេកទេស ព្រមទាំងគិតពីពេលវេលានៃការទទួលបានដីផងដែរ។
លោករដ្ឋមន្ត្រីបានណែនាំឱ្យលេខាធិការដ្ឋាន ត្រូវធ្វើចំណាត់ថ្នាក់នៃគម្រោងទាំងនោះ ដោយត្រូវជួយថែរក្សាគម្រោងដែលមានសកម្មភាពល្អឱ្យជួយអភិវឌ្ឍប្រទេសជាតិ ហើយត្រូវជួយជំរុញដល់អ្នកដែលមានសកម្មភាពតិចឱ្យបានប្រសើរឡើង។ ចំណែកគម្រោងដែលមិនមានសកម្មភាព ត្រូវជំនួសដោយគម្រោងថ្មីរបស់វិនិយោគិនថ្មីដែលមានផែនការវិនិយោគច្បាស់លាស់និងធ្វើពិតប្រាកដ ដើម្បីចូលរួមអភិវឌ្ឍខេត្ត និងលើកស្ទួយសេដ្ឋកិច្ចជាតិ។ ជាមួយគ្នានេះដែរត្រូវពង្រឹង និងជំរុញការងារចុះបញ្ជីឱ្យមានប្រសិទ្ធភាព ដោះស្រាយនិងទទួលខុសត្រូវរួមគ្នា ជាពិសេសទប់ស្កាត់ការទន្ទ្រានដីរដ្ឋ។
លោករដ្ឋមន្រ្តីក៏បានរំឭកជាថ្មីម្តងទៀតជូនដល់អង្គប្រជុំឱ្យទទួលស្គាល់ពីសារៈសំខាន់នៃសម្បទានដីសេដ្ឋកិច្ច និងភាពចាំបាច់ដែលត្រូវដោះស្រាយបញ្ហាប្រឈមដែលកើតមាន ដោយស្នើលេខាធិការដ្ឋានរៀបចំឱ្យមានកិច្ចប្រជុំទៀងទាត់រាល់ ៣ ខែម្តង ដើម្បីពិនិត្យលើវឌ្ឍនភាពនិងដោះស្រាយរាល់បញ្ហាដែលកើតមានឱ្យបានល្អនិងទាន់ពេលវេលា។ បន្ថែមលើនេះទៀត ត្រូវធ្វើការងារឱ្យបានជិតស្និទ្ធជាមួយក្រុមហ៊ុន ត្រូវមានព័ត៌មានច្បាស់លាស់ វាយតម្លៃប្រកបដោយតម្លាភាព ដើម្បីភាពរីកចម្រើនទាំងអស់គ្នា។ រីឯការទទួលចំណូលមិនមែនសារពើពន្ធ ត្រូវមានវិធានការពិន័យប្រាក់ក្នុងមួយហិកតា ៥ ដុល្លារ ចំពោះអ្នកមិនបានបង់ថ្លៃដីជូនរដ្ឋ ដោយប្រើយន្តការសន្ទនាត្រឹមត្រូវ ព្រមទាំងការកំណត់៕
