ទិដ្ឋភាពនៅកំពង់ផែរាម នាពេលកន្លងមក។ រូបថត សហការី
ភ្នំពេញៈ លោកនាយករដ្ឋមន្ត្រី ហ៊ុន សែន ប្រាប់បរទេសឱ្យបញ្ឈប់ការធ្វើយុទ្ធនាការប្រឆាំងបង្ខូចកេរ្តិ៍ឈ្មោះកម្ពុជាពាក់ព័ន្ធនឹងការសាងសង់មូលដ្ឋានកងទ័ពជើងទឹកនៅឆ្នេរសមុទ្ររាម ហើយលោកបញ្ជាក់សាជាថ្មីថា កម្ពុជាមិនមានវត្តមានកងទ័ពចិន ឬកងទ័ពបរទេសនោះទេ។
លោក ហ៊ុន សែន ថ្លែងថា៖ «ខ្ញុំគួរតែដាស់តឿនចំពោះអ្នកទាំងឡាយនៅខាងក្រៅ។ យុទ្ធនាការបង្ខូចកេរ្តិ៍ឈ្មោះកម្ពុជាតាមរយៈកំពង់ផែរាម កំពុងបានចាប់ផ្តើមឡើងវិញ។ ខ្ញុំជូនសារទៅអ្នកទាំងឡាយ មិនចាំបាច់ថតពីផ្កាយរណបអីទេ។ កម្ពុជាបានប្រកាសហើយតើ! ទៅបើកការដ្ឋាន សម្តេចពិជ័យសេនា ទៀ បាញ់ ទៅបើកការដ្ឋានតើ! ហើយបើបើកការដ្ឋានហើយ គេធ្វើហើយ កុំខ្វល់ពេក។ ម៉េចក៏ចាំបាច់ថា អាហ្នឹងជាព័ត៌មានចារកម្មបើគេបើកម៉ាចំហហើយ។ លើកលែងតែអ្នកឯងចង់រករឿងខ្ញុំ។ កំពុងពង្រឹងសមត្ថភាពកំពង់ផែយោធារបស់កម្ពុជាមានអីខុស»។
លោកនាយករដ្ឋមន្ត្រីបានថ្លែងបែបនេះក្នុងពិធីចែកសញ្ញាបត្រដល់និស្សិតសាកលវិទ្យាល័យបៀលប្រាយនាថ្ងៃទី ១៦ មីនា។
លោកថា ទឹកដីនេះជាទឹកដីកម្ពុជា។ កម្ពុជាមានសិទ្ធិនឹងធ្វើពង្រីកសមត្ថភាពកងទ័ពជើងទឹករបស់ខ្លួន។ ជម្រៅទឹកដើមនៅកំពង់ផែនេះត្រឹមតែ ២,៧ ម៉ែត្រ ទេ តែពេលនេះត្រូវតែបូមវាឱ្យជ្រៅ និងធ្វើមូលដ្ឋានកងទ័ពឱ្យច្បាស់លាស់ ដោយមិនទៅគំរាមកំហែងអ្នកណានោះទេ។ លោកថា គួរឱ្យចង់សើច ដែលមានអ្នកខ្លះលើកឡើងថា កំពង់ផែរាមអាចដាក់បាននូវនាវាចុះចតយន្តហោះរបស់ចិនរហូតដល់ទៅ ២ គ្រឿង។
លោក ហ៊ុន សែន ឆ្លើយតបថា៖ «ខ្ញុំសុំប្រាប់ទៅអ្នកឯងវិញ ខួរក្បាលអ្នកឯងអន់ណាស់ អន់យ៉ាងម៉េច? ខ្ញុំគ្រាន់តែចង្អុលប្រាប់ថា អ្នកឯងសំណាងគ្រាន់តែអ្នកឯងបានកើតនៅក្នុងប្រទេសអ្នកមានតែប៉ុណ្ណោះប៉ុន្តែខួរក្បាលអ្នកឯងអន់ណាស់ដែលអ្នកឯងសរសេរ និងនិយាយបែបនេះ វិភាគបែបនេះ។ ចាំបាច់ទៅចុះលើនាវាធើអី! បើអាព្រលានយន្តហោះកងកេងវានៅក្បែរហ្នឹង ចុះនៅអាលើគោកហ្មងទៅមើលៗនឹងស្រួល បើសិនជាចង់ចុះ។ បើសិនជាចង់ចុះហើយ យើងឯកភាពឱ្យចិនចុះ ចាំបាច់ទៅចុះអាក្នុងទឹកធើអី ម៉េចក៏ភ្លើម្ល៉េះ។ អ៊ីចឹងបានខ្ញុំតែងនិយាយថា ពួកអ្នកឯងសំណាងបានកើតនៅក្នុងប្រទេសអ្នកមាន អ្នកឯងប្រដៅខ្ញុំ តែខួរក្បាលរបស់ពួកអ្នកឯងមិនប្រាកដថា ពូកែជាងខ្ញុំកើតក្នុងប្រទេសអ្នកក្រទេ»។
គួរបញ្ជាក់ថា កាលពីខែមិថុនា ឆ្នាំមុន លោក ទៀ បាញ់ រដ្ឋមន្ត្រីការពារជាតិនិងលោក វ៉ាង វិនធាន (Wang Wentian) ឯកអគ្គរដ្ឋទូតចិន ប្រចាំកម្ពុជាបានបើកការដ្ឋានសាងសង់រោងជាងជួសជុលនាវា ផែសំចត និងស្តារឃ្លងនៅមូលដ្ឋានសមុទ្ររាមក្រោមជំនួយឥតសំណងរបស់ចិន។
លោកហ៊ុន សែន បន្តថា៖ «អ៊ីចឹងសុំផ្តាំទៅអ្នកធ្វើយុទ្ធនាការប្រឆាំងបង្ខូចកេរ្តិ៍ឈ្មោះកម្ពុជាបញ្ឈប់ទៅគេធ្វើនៅតែធ្វើហ្នឹង។ អីសុទ្ធតែ Satellite [ផ្កាយរណប] ចាប់អីណា! អឺល្អអ្នកឯងទុកអា Satellite នៅហ្នឹងទៅហើយខ្ញុំនឹងធ្វើបង្ហាញអ្នកឯងថា ១ ថ្ងៃវាកើនបានប៉ុន្មានជាន់ព្រោះឥឡូវចាក់គ្រឹះរួចហើយ។ បើចាក់គ្រឹះរួចហើយ គេឡើងលឿនហើយកុំឆ្ងល់ពេក។ បើប៉ុន្មានជាន់វាឡើងទៅដល់ហ្នឹងហើយ។ ចាំបាច់អ្នកឯងមកចុះកាសែតធើអី ហើយនិយាយពីរឿងបូម គេប្រាប់ថា គេបូមតើ!»។
លោកនាយករដ្ឋមន្ត្រីបញ្ជាក់ថា ជម្រៅទឹក ២,៧ ម៉ែត្រនេះ ចូលចតបានតែកូននាវាល្បាតប៉ុណ្ណោះ ប៉ុន្តែកម្ពុជាក៏ត្រូវពង្រឹង សមត្ថភាពកងទ័ពជើងទឹករបស់កម្ពុជាផងដែរ ហើយរាជរដ្ឋាភិបាលទម្រាំតែរកទុនបានពីចិនដើម្បីយកមកធ្វើការសាងសង់នេះ គឺមិនមែនជាការងាយនោះទេ ពីព្រោះកម្ពុជាមានសិទ្ធិទៅយកទុនពីដៃគូនានាដើម្បីយកមកធ្វើ។ «អ៊ីចឹងមិនចាំបាច់ថា យកព័ត៌មានពីនេះហើយ Satellite ចាប់ម្តងឃើញអ៊ីចេះ ម្តងឃើញអ៊ីចុះ។ ខ្ញុំប្រាប់ទៅអ្នកឯងវិញថា ថ្ងៃក្រោយ អគារហ្នឹងវានឹងឡើងខ្ពស់ អ្នកឯងចាំតែមើលទៅ វាខ្ពស់មែនហើយ។ ចាំបាច់ចាប់ Satellite ធើខ្មោចអី!។ ល្ងង់អីក៏ល្ងង់ម្ល៉េះ!»។
លោកហ៊ុន សែន រំឭកថា បរទេសមួយចំនួនបានខិតខំដើរពន្យល់បណ្តាប្រទេសអាស៊ាន ឱ្យយល់អំពីនាវាមុជទឹកដើរដោយនុយក្លេអ៊ែរ តែមិនមែនជាអាវុធនុយក្លេអ៊ែរ ក្នុងពេលដែលតំបន់អាស៊ីអាគ្នេយ៍ គឺជាតំបន់គ្មាននុយក្លេអ៊ែរ ហើយលោកចោទជាសំណួរថា ហេតុអីបានជាពួកគេមកពន្យល់លោកហើយលោកក៏ទទួលការយល់ ឯលោកពន្យល់ពួកគេវិញតែពួកគេមិនព្រមយល់។
លោកថា៖ «ថ្ងៃមុនខ្ញុំនិយាយជាមួយទូតអូស្ត្រាលីយ៉ាងច្បាស់។ ខ្ញុំថា ខ្ញុំយល់ ខ្ញុំថា អាហ្នឹងមិនមែនអាវុធនុយក្លេអ៊ែរទេ គឺនាវាមុជទឹក ដើរដោយនុយក្លេអ៊ែរទេ។ ខ្ញុំយល់តើអាហ្នឹង!ប៉ុន្តែហេតុអីបានពួកអ្នកឯង អត់ព្រមយល់ពីខ្ញុំវិញ នូវការដែលខ្ញុំពន្យល់ថា ខ្ញុំមានការចាំបាច់ ដើម្បីកសាងសមត្ថភាពកងទ័ពជើងទឹកដើម្បីការពារអធិបតេយ្យ ប្រយុទ្ធប្រឆាំងនឹងការរត់ពន្ធមនុស្ស រត់ពន្ធគ្រឿងញៀន ការនេសាទខុសច្បាប់ ឬឧក្រិដ្ឋកម្មឆ្លងដែននៅក្នុងសមុទ្ររបស់កម្ពុជា»។
លោក ហ៊ុន សែន លើកឡើងថា កម្ពុជាមានសិទ្ធិគ្រប់គ្រាន់អនុវត្តនូវរដ្ឋធម្មនុញ្ញ និងការពារទឹកដីរបស់ខ្លួន ហើយថា៖ «កម្ពុជាសុំបញ្ជាក់សាជាថ្មី មិនមានវត្តមានកងទ័ពចិន ឬកងទ័ពបរទេសនៅកម្ពុជាទេ»។
លោកថា បន្ទាប់ពីការសាងសង់រួចកម្ពុជានឹងស្វាគមន៍គ្រប់ប្រទេសទាំងអស់ចូលចតនាវាមកក្នុងកំពង់ផែកម្ពុជា ហើយអាចធ្វើសមយុទ្ធជាមួយគ្នា ហើយថា៖ «នេះជាការចោទប្រកាន់មួយដែលមិនព្រមយល់។ បើអ្នកមិនព្រមយល់ ខ្ញុំក៏មិនព្រមយល់ដល់អ្នកណាដែរ»។
ពាក់ព័ន្ធបញ្ហានេះ លោក យង់ពៅ អគ្គលេខាធិការនៃរាជបណ្ឌិត្យសភាកម្ពុជាប្រាប់ភ្នំពេញប៉ុស្តិ៍នាថ្ងៃទី ១៦ មីនាថា អ្នកនយោបាយមិនថា ក្រៅស្រុក ក្នុងស្រុកនោះទេ មិនគួរយកបញ្ហានេះ យកមកដុតរោលនយោបាយកម្ពុជា ខណៈពេលជិតបោះឆ្នោតនោះទេ ពីព្រោះវាធ្វើឱ្យកម្ពុជាមានការខាតបង់ អាចចលាចល អាចមានការភាន់ច្រឡំដោយប្រជាពលរដ្ឋមិនបានផ្ទៀងផ្ទាត់ព័ត៌មានច្បាស់លាស់អំពីបញ្ហានេះដោយសារតែការរើសអើងជាតិសាសន៍ផងទៀត។
លោកបានថ្លែងថា៖ «យើងគួរតែបញ្ជាក់ថា យ៉ាងនេះ គឺកម្ពុជាដ្បិតតែបានបញ្ជាក់ហើយថា មិនចងសម្ព័ន្ធយោធា និងក៏មិនជ្រៀតជ្រែកកិច្ចការផ្ទៃក្នុង និងការបញ្ជូនកងទ័ពទៅក្រៅស្រុកអីជាដើម គឺកម្ពុជាមិនធ្វើទេ លើកលែងក្រោមឆត្រអង្គការសហប្រជាជាតិ។ ប៉ុន្តែកម្ពុជាមានសិទ្ធិគ្រប់គ្រាន់ ក្នុងអធិបតេយ្យរបស់ខ្លួន ក្នុងការទទួលជំនួយយោធា អភិវឌ្ឍវិស័យយោធា បច្ចេកវិទ្យាសព្វាវុធអី។ អាហ្នឹងយើងទទួលជំនួយហ្នឹង។ បើគេជួយសាងសង់ គេជួយធ្វើ គេជួយយុទ្ធោបករណ៍ កម្ពុជាទទួលយក ដើម្បីពង្រឹងសមត្ថភាពការពារជាតិរបស់ខ្លួន»៕
វីដេអូ៖
