ភ្នំពេញៈ ត្រីគល់រាំងចំនួន ៤ ក្បាល នឹងត្រូវលែងចូលទៅក្នុងជម្រកធម្មជាតិវិញ ក្នុងរដូវទឹកឡើងបន្ទាប់ពីក្រុមអ្នកនេសាទ ប្រគល់ឱ្យគម្រោងអច្ឆរិយភាពនៃទន្លេមេគង្គនាពេលថ្មីៗនេះ។
យោងតាមគម្រោងអច្ឆរិយភាពនៃទន្លេមេគង្គបានឱ្យដឹងថា ដោយមើលឃើញពីសមកម្មភាពអភិរក្សរបស់គម្រោងអច្ឆរិយភាពនៃទន្លេមេគង្គ និងដោយចង់ចូលរួមចំណែកក្នុងការងារអភិរក្សនេះ អ្នកនេសាទឧស្សាហកម្មដាយត្រី នៅគន្លងទី ៤ ដេ បានបរិច្ឆាគត្រីគល់រាំងចំនួន ៤ ក្បាលដល់គម្រោងកាលពីថ្ងៃទី ៩ មីនា ឆ្នាំ ២០២៣ នេះ។
ត្រីគល់រាំងទាំង ៤ ក្បាល នោះមានទម្ងន់ខុសៗគ្នា ដែលរួមមានដូចជា ទម្ងន់ ១៥ គីឡូក្រាមចំនួន ២ ក្បាល ទម្ងន់ ១៧ គីឡូក្រាមចំនួន ១ ក្បាល និង ទម្ងន់ ២១ គីឡូក្រាម ចំនួន ១ ក្បាល។
គម្រោងអច្ឆរិយភាពនៃទន្លេមេគង្គបានឱ្យដឹងថា ដោយសារតែបច្ចុប្បន្ននេះ គឺជារដូវទឹកសម្រក មិនអាចលែងត្រីទាំងនោះភ្លាមៗបាន គម្រោងបានសហការជាមួយវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប និងមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាបរបស់រដ្ឋបាលជលផល ដើម្បីដឹកជញ្ជូនត្រីទាំង ៤ ក្បាលនេះ ទៅថែបំប៉ននៅក្នុងស្រះ នៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាប ស្ថិតនៅក្នុងឃុំពាមរក៏ ស្រុកពាមរក៏ ខេត្តព្រៃវែង។
គម្រោងអច្ឆរិយភាពនៃទន្លេមេគង្គបានបញ្ជាក់ថា៖ «ត្រីគល់រាំងទាំង ៤ ក្បាលនេះ នឹងត្រូវលែងចូលទៅក្នុងធម្មជាតិវិញ នាពេលសមស្រប ក្នុងរដូវទឹកតដំឡើងនាឆ្នាំក្រោយ»៕
.jpg)
