.jpg)
កំពង់ធំៈ ក្រុមអង្កេតតាមដានជីវៈចម្រុះបានប្រទះឃើញសត្វស្លាបទឹកចំនួន ៤៥ ប្រភេទ ដែលរួមមាន ប្រភេទជិតផុតពូជ និងប្រភេទកំពុងទទួលរងការគំរាមកំហែងផងដែរ ក្នុងការសិក្សារយៈពេល ៨ ខែចុងក្រោយនៅតំបន់ផ្សោតនៃតំបន់រ៉ាមសារស្ទឹងសែន។ នេះបើយោងតាមអង្គការជីវិតធម្មជាតិនៅកម្ពុជា (NatureLife Cambodia Organization)។
អង្គការបានឱ្យដឹងថា ថ្មីៗកន្លងទៅ អង្គការជីវិតធម្មជាតិនៅកម្ពុជាបានធ្វើការស្នើសុំការអនុញ្ញាតពីអគ្គនាយកដ្ឋានតំបន់ការពារធម្មជាតិ នៃក្រសួងបរិស្ថាន ដើម្បីសិក្សាស្រាវជ្រាវ និងអង្កេតតាមដានជីវៈចម្រុះនៅតំបន់ផ្សោតនៃតំបន់រ៉ាមសារស្ទឹងសែន ដោយមានការចូលរួមពីប្រជាពលរដ្ឋក្នុងតំបន់ផ្សោតផ្ទាល់តែម្ដង។
តាមរយៈការសិក្សានេះក្នុងរយៈពេល៨ ខែចុងក្រោយនេះ (ពីខែឧសភា រហូតដល់ ខែធ្នូ ឆ្នាំ ២០២២) ក្រុមអង្កេតតាមដានជីវៈចម្រុះនេះបានប្រទះឃើញសត្វស្លាបទឹកចំនួន៤៥ប្រភេទ។ ក្នុងនោះ រួមមាន៖ ប្រភេទជិតផុតពូជចំនួន១ ប្រភេទគឺត្រដក់ធំ ប្រភេទកំពុងទទួលរងការគំរាមកំហែងចំនួន១ប្រភេទ គឺត្រដក់តូច ប្រភេទជិតទទួលរងការគំរាមកំហែងចំនួន៤ប្រភេទដូចជាទុងប្រផេះ រនាលពណ៌ អកត្រីក្បាលប្រផេះ ស្មោញ និងប្រភេទរងគ្រោះតិចតួចចំនួន ៣៩ ប្រភេទផងដែរ។
ផ្សោត គឺជាភូមិឧបសម្ព័ន្ធនៃភូមិទួលនាងសាវ ឃុំផាត់សណ្តាយ ស្រុកកំពង់ស្វាយខេត្តកំពង់ធំ ដែលមានប្រជាជនរស់នៅប្រមាណ ៥០ គ្រួសារប្រកបរបរជាអ្នកនេសាទត្រី។ តំបន់ផ្សោតត្រូវបានកំណត់ជាទីតាំងមួយក្នុងតំបន់រ៉ាមសារស្ទឹងសែន ដែលមានសក្តានុពលធនធានធម្មជាតិ និងវត្ដមានជីវៈចម្រុះជាច្រើនប្រភេទ ជាពិសេសសត្វស្លាបទឹកដែលកំពុងជិតផុតពូជ។
អង្គការបានបន្តថា ទិន្នន័យនេះនឹងត្រូវបានចែករំលែកជាធាតុចូលសំខាន់មួយសម្រាប់ដំណើរការរៀបចំផែនការ និងការបែងចែកតំបន់គ្រប់គ្រងរបស់តំបន់រ៉ាមសារស្ទឹងសែន៕
