.jpg)
សៀមរាបៈ រដ្ឋបាលខេត្តសៀមរាបបានជួបជាមួយនឹងលោកស្រី ម៉ារីយាណា ហ្ការ៉ូហ្វាឡូ ប្រធានផ្នែកកិច្ចការពារកុមារនៃអង្គការយូនីសេហ្វ ដែលធ្វើទស្សនកិច្ចសិក្សា ពីកិច្ចសហប្រតិបត្តិការរវាងរដ្ឋបាលខេត្ត ជាមួយអង្គការ UNICEF លើការអនុវត្តកម្មវិធីកិច្ចការពារកុមារ ដើម្បីស្វែងយល់បន្ថែមអំពីដំណើរការនៃប្រព័ន្ធកិច្ចការពារកុមារ និងកិច្ចសហការ សម្របសម្រួលរវាងស្ថាប័នរដ្ឋាភិបាល ជាមួយអង្គការដៃគូអភិវឌ្ឍ លើសកម្មភាពគាំពារកុមារនៅថ្នាក់ក្រោមជាតិនាថ្ងៃទី១៦ខែមីនា។
លោកស្រី ម៉ារីយាណា ហ្ការ៉ូហ្វាឡូ ប្រធានផ្នែកកិច្ចការពារកុមារនៃអង្គការយូនីសេហ្វ និងក្រុមការងារប្រតិភូមកពីតំណាងអង្គការUSAID និងអង្គការFCF បានលើកឡើងអំពីបញ្ហាមួយចំនួន ដែលពាក់ព័ន្ធនឹងដំណើរការនៃប្រព័ន្ធកិច្ចការពារកុមារ។ ក្នុងនោះបានផ្តោតសំខាន់ទៅការប្រើប្រាស់យន្តការទំនាក់ទំនង សម្របសម្រួល អន្តរាគមន៍ ការគ្រប់គ្រងករណី និងការផ្តល់សេវាកិច្ចការពារកុមារ ដែលមានពិការភាព កុមារដែលស្នាក់នៅក្នុងមណ្ឌលថែទាំជំនួស កុមារតាមម្តាយក្នុងពន្ធនាគារ និងបញ្ហានៃការបង្វែរកុមារពីក្នុងមណ្ឌលទៅសហគមន៍វិញស្របតាមផែនការរបស់រាជរដ្ឋាភិបាល។ នេះបើយោងតាមរដ្ឋបាលខេត្តសៀមរាប។
លោកស្រី យូ សុភា អភិបាលរងខេត្ត និងជាប្រធានក្រុមការងារកិច្ចការពារកុមារថ្នាក់ខេត្ត បានលើកឡើងថា រដ្ឋបាលខេត្តបាននិងកំពុងអនុវត្តដោយបានប្តេជ្ញាចិត្តខ្ពស់ក្នុងការអនុវត្តទាំងច្បាប់ជាតិ អន្តរជាតិ ព្រមទាំងមានគោលនយោបាយ ផែនការយុទ្ធសាស្ត្រជាតិ និងសេចក្តីណែនាំជាច្រើន ដើម្បីធ្វើការការពារផលប្រយោជន៍ឧត្តមប្រយោជន៍ និងការគោរពសិទ្ធិរបស់កុមារ ការកាត់បន្ថយ និងលុបបំបាត់នូវបញ្ហាដែលកើតមាន។ ការងារនេះមានការចូលរួមពីគ្រប់ក្រសួង-ស្ថាប័ន និងអង្គការដៃគូពាក់ព័ន្ធដោយប្រើប្រាស់នូវកិច្ចអន្តរាគមន៍ជាពហុវិស័យ ព្រមទាំងពលរដ្ឋ ដែលជាអាណាព្យាបាលកុមារ និងកុមារខ្លួនឯងផ្ទាល់ផងដែរ។
លើសពីនោះ ដើម្បីឱ្យការងារកាន់តែមានប្រសិទ្ធភាព និងជាក់លាក់ ក្នុងការជួយជនរងគ្រោះ ដោយអំពើហិង្សាទាក់ទងនឹងយេនឌ័រ ពិសេសកុមាររងគ្រោះ និងងាយរងគ្រោះនោះ រដ្ឋបាលសាលាខេត្តបានរៀបចំបង្កើតក្រុមការងារកិច្ចការពារកុមារកាលពីខែតុលា ឆ្នាំ២០២១ ព្រមទាំងបានរៀបចំជាផែនការសកម្មភាព និងផែនការថវិកាប្រចាំឆ្នាំ និងរយៈពេល ៣ ឆ្នាំ (២០២៣-២០២៥)។
នេះស្របតាមកម្មវិធីនយោបាយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ផែនការយុទ្ធសាស្ត្រអភិវឌ្ឍន៍ជាតិ (២០១៩-២០២៣) និងគោលនយោបាយជាតិស្តីពីប្រព័ន្ធកិច្ចការពារកុមារ (ឆ្នាំ២០១៩-២០២៩) ដោយមានការគាំទ្រជាបច្ចេកទេស និងថវិកាពីក្រសួងមហាផ្ទៃ ក្រសួងសង្គមកិច្ច ក្រសួងពាក់ព័ន្ធ រដ្ឋបាលសាលាខេត្ត មន្ទីរអង្គភាពជំនាញ អង្គការយូនីសេហ្វ និងអង្គការដៃគូមួយចំនួនផងដែរ ដើម្បីពង្រឹងប្រព័ន្ធកិច្ចការពារកុមារ ការសម្របសម្រួលជាមួយអ្នកពាក់ព័ន្ធ ដែលមានកាតព្វកិច្ចលើ ការបង្ការ ទប់ស្កាត់ ការអន្តរាគមន៍ និងការផ្តល់សេវាឆ្លើយតប៕
