ភ្នំពេញៈ រដ្ឋសភា​កម្ពុជា បាន​លើកឡើងថា សេចក្តីសម្រេច​របស់​ស​ភា​អឺរ៉ុប បានបង្ហាញ​ពី​ការមិន​គោរព​មកលើ​ឯករាជ​ភាព និង​អធិបតេយ្យភាព​របស់​ព្រះរាជាណាចក្រ​កម្ពុជា ដោយបាន​ធ្វើឱ្យ​កម្ពុជា​មានការ​ខកចិត្ត​យ៉ាងខ្លាំង​លើស​ភា​អឺរ៉ុប​។​

​សភា​កម្ពុជា​បង្ហាញ​ពី​ការ​ខក​ចិត្ត​នេះ កាលពី​ថ្ងៃទី​ ១៧ ​មីនា តាមរយៈ​ការចេញ​សេចក្តី​ថ្លែង​ការណ៍​ឆ្លើយតប​ទៅនឹង​សេចក្តី​សម្រេចចិត្ត​លេខ 2023/2589 (RSP) របស់​សភា​អឺរ៉ុប​មាន ​៧ ​ចំណុច ដែល​ក្នុងនោះ​ក៏មាន​ការ​ទាក់ទង​នឹង​ការកាត់ទោស​លោក កឹម សុខា និង​គំរាម​លើ​ការដក​ប្រព័ន្ធ​អនុគ្រោះ​ពន្ធ​ «​គ្រប់មុខ​​ទំនិញ​ទាំងអស់​លើកលែងតែ​អាវុធ (EBA)» ​ពី​កម្ពុជា​បន្ថែមទៀត​ផងដែ​រ​។

​រដ្ឋសភា​កម្ពុជា​បាន​សង្កត់ធ្ងន់ថា​៖ «​យើង​សូម​ច្រាន​ចោល សេចក្តីសម្រេចចិត្ត​រប​ស់​សភា​អឺរ៉ុប ដែលមាន​ខ្លឹមសារ​រំលោភបំពាន​យ៉ាងធ្ងន់ធ្ងរ មកលើ​សិ​ទិ្ធ​អធិបតេយ្យ​របស់​រដ្ឋ​ជា​សមាជិក​មួយ​នៃ​អង្គការ​សហ​​ប្រជាជាតិ​»​។

យោង​លើ​រដ្ឋ​ធម្ម​នុ​ញ្ញ​នៃ​ព្រះរាជាណាចក្រ​កម្ពុជា និង​ទិដ្ឋភាព​ច្បាប់​រួមទាំង​បទ​ប្ប​ញ្ញត្តិ​ជាតិ​ជា​ធរមាន​ទាំងឡាយ ជាពិសេស​ក្រមរដ្ឋប្បវេណី និង​ក្រមព្រហ្មទណ្ឌ​សភា​កម្ពុជា​បានបញ្ជាក់​សាជាថ្មី​ម្ដងទៀត​នូវ​ជំហរ​ស្របគ្នា​ជាមួយនឹង​ការឆ្លើយតប និង​សេចក្តីថ្លែងការណ៍​ទាំងឡាយ របស់​ក្រសួងការបរទេស និង​សហប្រតិបត្តិការ​អន្តរជាតិ រួម​ទាំង​សេចក្តីថ្លែងការណ៍​ដែល​បានចេញ​ផ្សាយ កាលពី​ថ្ងៃទី​ ៣ មីនា ឆ្នាំ​ ២០២៣ ដែល​សេចក្តី​ថ្លែងការណ៍​នោះបាន​សង្កត់ធ្ងន់ថា «​ឧក្រិដ្ឋកម្ម គឺជា​ឧក្រិដ្ឋកម្ម ហើយ​ឧក្រិដ្ឋកម្ម​មិនអាច​កែតម្រូវ​ដើម្បី​បុព្វហេតុ​ផ្សេង​នោះទេ​»​។​

​សភា​កម្ពុជា​បញ្ជាក់ថា​៖ «​យើង​សូម​ច្រានចោល​ទាំងស្រុង​នូវ​ការចោទប្រកាន់​ទាំងឡាយ​ក្នុង​សេចក្តីសម្រេចចិត្ត​នេះ ហើយក៏​សូម​បរិហារ​ទៅលើ​ទង្វើ​របស់​ក្រុម​សមាជិកសភា​ឆ្វេងនិយម​នៃ​សភា​អឺរ៉ុប​មួយចំនួន ចំពោះ​ការ​បំពាន​នយោបាយ និង​ជ្រៀត​ជ្រែកចូល​កិច្ចការ​ផ្ទៃក្នុង​កម្ពុជា ដែលជា​រដ្ឋ​តូច​ជាង និង​ទន់ខ្សោយ​ជាង ដោយ​មើលរំលង​ទាំងស្រុង​នូវ​គុណ​តម្លៃ​នៃ​លទ្ធិប្រជាធិបតេយ្យ យុត្តិធម៌ និង​នីតិរដ្ឋ​ដែល​កម្ពុជា​បាន​ប្រកាន់ខ្ជាប់​យ៉ាង​ម៉ឺងម៉ាត់​»​។​

«​សភា​អឺរ៉ុប ជាពិសេស​ក្រុម​អ្នក​​នយោបាយ​ឆ្វេងនិយម​ជ្រុល បាននិងកំពុង​បំពង​សំឡេង ក្នុងការ​យក​កិច្ចការ​ផ្ទៃក្នុង​របស់​ប្រទេស​ដទៃ​ទៅធ្វើ​នយោបាយ​ទោះបីជា​ត្រូវ​លះបង់ សន្តិភាព ស្ថិរភាព​ភាពសុខដុមរមនា​ស​ង្គ​ម និង​វឌ្ឍន​​ភាព​សេដ្ឋកិច្ច​សង្គម​របស់ ប្រទេស​នោះ​ក៏ដោយ​»​។ នេះ​បើតាម​សេចក្តីថ្លែងការណ៍​សភាក​ម្ពុ​ជា​។​

​សភា​កម្ពុជា​ក៏​ទទូច​ឱ្យ​សមា​ជិ​ក​សភា​អឺរ៉ុប​ទាំងអស់​ដែល​មកពី​ក្រុម​ផ្សេងៗ​គ្នា​ខិតខំ​ប្រឹងប្រែង​លើកកម្ពស់​នូវ​កិច្ចសន្ទនា​ស្មោះ​​ត្រង់ បើកចំហ និង​បរិ​យា​ប័ន្ន ជាមួយ​កម្ពុជា​ដោយ​ផ្អែកលើ​គោល​​ការណ៍​នៃ​ការគោរព​គ្នា ការជឿ​ទុកចិត្ត​គ្នា ការយោគយល់​គ្នា និង​ផលប្រយោជន៍​គ្នា ទៅវិញទៅមក ដើម្បី​បុព្វហេតុ​នៃ​សន្តិភាព សន្តិ​សហ​វិជ្ជមាន និង​វិបុលភាព​រួម​។​

​សូមបញ្ជាក់ថា កាលពី​ថ្ងៃទី​ ១៦ មីនា សភា​អឺរ៉ុប បានចេញ​សេចក្តីសម្រេច​អនុម័ត​ជា​ផ្លូវការ ចំនួន​ ៧ ​ចំណុច ដោយ​ក្នុងនោះ​មានការ​ព្រមាន​ពី​ការដក​ប្រព័ន្ធ​អនុ​គ្រោះ​ពន្ធ EBA ពី​កម្ពុជា ក្នុងករណី​ការបោះឆ្នោតជាតិ​នា​ខែកក្កដា​ខាងមុខ ប្រព្រឹត្តទៅ​មិន​ស្របតាម​ស្តង់ដា​អន្តរជាតិ​។​

​សេចក្តីសម្រេច​នេះ ក៏បាន​អំពាវនាវ​ឱ្យមាន​ការដោះលែង​លោក កឹម សុខា ជាបន្ទាន់ និង​ដោយ​គ្មាន​លក្ខខណ្ឌ និង​មន្ត្រី និង​សកម្មជន​គណបក្សប្រឆាំង​ទាំង​អស់​ដែល​ត្រូវបាន​កាត់ទោស ឬ​ឃុំខ្លួន ក្រោម​បទចោទប្រកាន់​ពាក់ព័ន្ធ​នយោបាយ​។​

​លោក យង់ ពៅ អគ្គលេខាធិការ​នៃ​រាជបណ្ឌិត្យសភាកម្ពុជា លើកឡើងថា ការចេញ​សេចក្តី​​សម្រេច​របស់​សភា​អឺរ៉ុប បង្ហាញ​ពី​ការ​លូកលាន់​កិច្ចការ​ផ្ទៃក្នុង​របស់​ប្រទេស​កម្ពុជា ព្រោះ​បាន​រំលោភ​លើ​អធិបតេយ្យ​របស់​កម្ពុជា​។ លោក​ថ្លែង​នៅ​ថ្ងៃទី​ ១៩ មីនា ថា​៖ «​បើ​រដ្ឋាភិបាល​កម្ពុជា ព្រមធ្វើ​តាម​សភា​អឺរ៉ុប មានន័យថា រដ្ឋា​ភិ​បាល​មិនបាន​អនុវត្ត​នីតិរដ្ឋ​ទេ តែ​ជាការ​ធ្វើតាម​ការបង្គាប់​បញ្ជា​ហើយ​លូកលាន់​ទៅលើ​កិច្ចការ​តុលាការ​ដែល​នេះ​ជា​អ្វីដែល​រដ្ឋា​ភិ​បាល​មិនអាច​ធ្វើបាន​នោះទេ​»​។​

​លោក យង់ ពៅ បន្ថែមថា សភា​អឺរ៉ុប មិនគួរ​ដាក់​ការ​គំរាម ឬ​កំណត់ឱ្យ​រាជរដ្ឋាភិបាល​កម្ពុជា​ធ្វើ​នេះ​ឬ​ធ្វើ​នោះ​តាម​ទេ ដែល​នេះ​វា​បង្ហាញថា ​«​រដ្ឋាភិបាល​ខ្មែរ​ជា​ក្មេង ជា​កូនង៉ែត ជា​កុមារ ឬ​ជាម​នុស្ស​ដែល​ចាំតែ​ធ្វើតាម​ការ​បង្គាប់បញ្ជា​ដោយ​មិន​អនុលោម​តាមផ្លូវ​ច្បាប់ វិធាន​ផ្ទៃក្នុង​របស់ខ្លួន​ឡើយ​»​។

​លោក​សង្កត់ធ្ងន់ថា​៖ «​តាម​ការយល់ឃើញ​រប​ស់​ខ្ញុំ រដ្ឋាភិបាល​មិនអាច​ធ្វើតាម​ការ​ស្នើ​របស់​សភា​អឺរ៉ុប​នោះទេ តែ​រដ្ឋាភិបាល​នឹងធ្វើ​ការ​ជាធម្មតា​ទៅលើ​ការបោះឆ្នោត ហើយ​ករណី​របស់លោក កឹម សុខា គឺ​អនុ​លោម​ទៅតាម​សាលក្រម​របស់​តុលាការ​»៕

វីដេអូ៖