ទិដ្ឋភាពទីតាំងដែលមានបទល្មើសទន្ទ្រានយកដីរដ្ឋនៅក្នុងស្រុកអូររាំង ខេត្តមណ្ឌលគិរីកាលពីថ្ងៃទី១៩ មីនា ។ រូបថត ប៉ូលិស
មណ្ឌលគិរីៈនៅពេលនេះ ក្រុមសមត្ថកិច្ចជំនាញកំពុងបន្តស្រាវជ្រាវរកអត្តសញ្ញាណក្រុមជនប្រព្រឹត្តបទល្មើសកាប់រាន និងឈូសឆាយដីព្រៃក្នុងតំបន់ការពារខេត្តមណ្ឌលគិរី ដើម្បីកសាងសំណុំរឿងបញ្ជូនឱ្យតុលាការចាត់វិធានការទៅតាមផ្លូវច្បាប់។ នេះបើតាមមន្ត្រីមូលដ្ឋាន។
លោក ចាស់ ណា មេឃុំដាក់ដាំ បានប្រាប់ភ្នំពេញប៉ុស្តិ៍ នៅថ្ងៃទី២០ ខែមីនា ឆ្នាំ២០២៣ថា ដោយមានការចូលរួមពីមន្ត្រីនៃមន្ទីរបរិស្ថាន និងរដ្ឋបាលព្រៃឈើខេត្តមណ្ឌលគិរី និងមានការសម្របសម្រួលផ្នែកច្បាប់ពីតំណាងអយ្យការអមសាលាដំបូងខេត្តមណ្ឌលគិរី រដ្ឋបាលស្រុកអូររាំង កាលព្រឹកថ្ងៃទី១៩ ខែមីនា ឆ្នាំ២០២៣ បានចុះពិនិត្យទីតាំងដីព្រៃរដ្ឋនៅចំណុចភូមិពូឡេះ ឃុំដាក់ដាំ ស្រុកអូររាំង ខេត្តមណ្ឌលគិរី ហើយបានរកឃើញបទល្មើសកាប់រាន និងឈូសឆាយដីព្រៃរបស់រដ្ឋអស់ជាង ៥០ ហិកតា។
លោកថ្លែងថា៖«នៅក្នុងទីតាំងដែលមានការកាប់រាន និងឈូសឆាយដីព្រៃនោះ សមត្ថកិច្ចយើងមិនបានប្រទះឃើញជនប្រព្រឹត្តបទល្មើសណាម្នាក់ឡើយ ហើយក៏ពុំឃើញមានគ្រឿងចក្រឈូសឆាយនោះដែរ»។
បើតាមលោក ចាស់ ណា កន្លងមកមានអ្នកភូមិមួយចំនួន បានកាប់រានដីព្រៃ ដើម្បីពង្រីកផ្ទៃដីចម្ការរបស់ពួកគេ ដើម្បីដាំដុះដំណាំរួមផ្សំ ប៉ុន្តែករណីនេះ ត្រូវបានអាជ្ញាធរភូមិ-ឃុំ និងមន្ត្រីជំនាញ ចុះផ្សព្វផ្សាយអប់រំ ណែនាំ និងបង្ក្រាបជាបន្តបន្ទាប់ ហើយក៏មានភាពស្ងប់ស្ងាត់មួយរយៈធំផងដែរ។
ទោះយ៉ាងណា នៅពេលនេះ សមត្ថកិច្ចជំនាញកំពុងស្រាវជ្រាវលើករណីនេះ ដើម្បីកំណត់អត្តសញ្ញាណជនសង្ស័យ និងកំសាងសំណុំរឿងបញ្ជូនទៅតុលាការចាត់វិធានការបន្តតាមនីតិវីធី។ នេះបើតាមការប្រាប់ឱ្យដឹងពីលោក ស៊ាវ ងីឈាន់ អ្នកនាំពាក្យអយ្យការអមសាលាដំបូងខេត្តមណ្ឌលគិរី កាលពីល្ងាចថ្ងៃទី២០ ខែមីនា ឆ្នាំ២០២៣។
លោកបានប្រាប់ភ្នំពេញប៉ុស្តិ៍ថា ទីតាំងដីព្រៃរដ្ឋ ដែលត្រូវបានរកឃើញមានការកាប់រាន និងឈូសឆាយក្នុងគោលបំណងហ៊ុមព័ទ្ធធ្វើជាកម្មសិទ្ធិឯកជន ដោយខុសច្បាប់នោះ គឺស្ថិតនៅក្នុងដីសម្បទានសេដ្ឋកិច្ច នៃក្រុមហ៊ុន វូជីសាន្ត និងក្រុមហ៊ុនហូលីង ស្ថិតក្នុងភូមិសាស្ត្រ ឃុំដាក់ដាំ ស្រុកអូររាំង។
លោកបានបញ្ជាក់ថា៖«សំណុំរឿងបទល្មើសកាប់រាន និងឈូសឆាយដីព្រៃរបស់រដ្ឋនេះ គឺតំណាងអយ្យការយើង បានចុះត្រួតពិនិត្យឃើញដល់់ទីកន្លែងដោយផ្ទាល់ ដូច្នេះសមត្ថកិច្ចជំនាញ និងអាជ្ញាធរដែនដីត្រូវស្រាវជ្រាវរកឱ្យឃើញអំពីអត្តសញ្ញាណនៃក្រុមជនប្រព្រឹត្តបទល្មើស ហើយកសាងសំណុំរឿងបញ្ជូនមកតុលាការ ដើម្បីចាត់វិធានការបន្តតាមនីតិវិធី»។
ជុំវិញករណីនេះ លោក ឆៅ ប៊ុនធឿន ប្រធានមន្ទីរបរិស្ថានខេត្តមណ្ឌលគិរី បានប្រាប់ភ្នំពេញប៉ុស្តិ៍ថា យោងតាមនិយាមការទីតាំងដែលបានរកឃើញបទល្មើស កាប់រាន និងឈូសឆាយដីព្រៃរដ្ឋខុសច្បាប់នោះ គឺមិនស្ថិតក្រោមការគ្រប់គ្រងរបស់មន្ទីរបរិស្ថានខេត្តមណ្ឌលគិរីនោះទេ។ លោកថ្លែងថា៖«ទីតាំងនោះ គឺស្ថិតក្រោមការគ្រប់គ្រងរបស់ខណ្ឌរដ្ឋបាលព្រៃឈើមណ្ឌលគិរី »។
យ៉ាងណាក៏ដោយ កាលពីរសៀលថ្ងៃទី២០ ខែមីនា ឆ្នាំ២០២៣ មន្ត្រីសង្កាត់រដ្ឋបាលព្រៃឈើអូររាំងម្នាក់ បានប្រាប់ភ្នំពេញប៉ុស្តិ៍ ក្នុងលក្ខខណ្ឌមិនបញ្ចេញឈ្មោះថា ករណីនេះសមត្ថកិច្ចជំនាញបានរកឃើញ និងកំណត់អត្តសញ្ញាណជនសង្ស័យដែលបានប្រព្រឹត្តបទល្មើសកាប់រាន និងឈូសឆាយដីព្រៃរដ្ឋនោះបានមួយចំនួនហើយ និងកំពុងបន្តស្រាវជ្រាវរកមេខ្លោង ដើម្បីកសាងសំណុំរឿងបញ្ជូនទៅតុលាការចាត់វិធានការបន្តតាមនីតិវិធី៕
វីដេអូ៖
