អ្នកចូលរួមវគ្គបណ្ដុះបណ្ដាល ស្ដីពី ការធ្វើបច្ចុប្បន្នភាពរបបសន្ដិសុខសង្គម កាលពីថ្ងៃទី៣ ខែមេសា។ រូបថត NSSF
ភ្នំពេញៈបេឡាជាតិសន្តិសុខសង្គម (ប.ស.ស) កាលពីថ្ងៃទី ៣ ខែមេសា បានបើកវគ្គបណ្ដុះបណ្ដាល ស្ដីពី ការធ្វើបច្ចុប្បន្នភាពរបបសន្ដិសុខសង្គម ពង្រឹងសមត្ថភាពបន្ថែម ១ កម្រិតទៀត និងជាមូលដ្ឋានគ្រឹះ ចំណេះដឹង និងចំណេះធ្វើលើការងារស្នូលរបស់ ប.ស.ស. ដើម្បីថ្នាក់ដឹកនាំគ្រប់លំដាប់ថ្នាក់ យល់ដឹងកាន់តែច្បាស់បន្ថែម ទៀតពាក់ព័ន្ធនឹងការវិវត្តប្រព័ន្ធសន្ដិសុខសង្គមថ្មី។
លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានលើកឡើងថា ការធ្វើការងារក្នុងអង្គភាព មិនមែនចេះត្រឹមតែការងារផ្ទាល់ ការងារស្នូលរបស់ខ្លួនទេ តែត្រូវចេះការងាររួមរបស់អង្គភាពទាំងមូល។
លោកថា វគ្គបណ្ដុះបណ្ដាលនាពេលនេះ ជាការបង្ហាញចំណេះដឹងថ្មីៗ ពីការងាររួមក្នុងអង្គភាព ដោយកន្លងមកថ្នាក់ដឹកនាំក្នុងអង្គភាពនីមួយៗធ្វើការទៅតាមជំនាញដោយផ្ដោតទៅលើភារកិច្ចប្រចាំថ្ងៃរបស់ខ្លួនរៀងៗខ្លួន ក៏ប៉ុន្ដែការយល់ដឹងអំពីគោលការណ៍រួម លិខិតបទដ្ឋានរួមរបស់អង្គភាព នៅមានកម្រិតនៅឡើយ។
លោក អ៊ុក សមវិទ្យា បានថ្លែងថា៖«វគ្គបណ្ដុះបណ្ដាលនាពេលនេះ ជាឱកាសពង្រឹងសមត្ថភាពបន្ថែម១កម្រិតទៀត និងជាមូលដ្ឋានគ្រឹះ ចំណេះដឹង និងចំណេះធ្វើលើការងារស្នូលរបស់ ប.ស.ស ដើម្បីថ្នាក់ដឹកនាំគ្រប់លំដាប់ថ្នាក់ យល់ដឹងកាន់តែច្បាស់បន្ថែមទៀត ពាក់ព័ន្ធនឹងការវិវត្តប្រព័ន្ធសន្ដិសុខសង្គមថ្មី»។
បន្ថែមពីលើនេះ លោកបានជំរុញលើកទឹកចិត្ត ឱ្យមានការរៀបចំការបណ្តុះបណ្តាលទាក់ទងនឹងការធ្វើបច្ចុប្បន្នភាពរបបសន្ដិសុខសង្គមនេះ រៀងរាល់ ៣ខែម្ដង ដើម្បីធ្វើបច្ចុប្បន្នភាពព័ត៌មាននានា ទាក់ទងនឹងការវិវត្តនៃការអនុវត្តរបបសន្ដិសុខសង្គម ដល់ថ្នាក់ដឹកនាំ មន្ត្រីក្រោមឱវាទ ពង្រឹងសមត្ថភាពបន្ថែម ឱ្យកាន់តែទូលំទូលាយ និងរិះរកនីតិវិធីថ្មីៗ សំដៅលើកកម្ពស់ ការងារប្រចាំថ្ងៃឱ្យកាន់តែប្រសើរឡើង។
លោកបានបង្ហាញពីក្តីសង្ឃឹមយ៉ាងដូច្នេះថា៖«ថ្នាក់ដឹកនាំគ្រប់លំដាប់ដែលចូលរួមក្នុងវគ្គបណ្ដុះបណ្ដាលនេះ នឹងព្យាយាមចូលរួមសួរសំណួរពីបញ្ហានានាដែលខ្លួនកំពុងខ្វះខាត ដើម្បីយកទៅបំពេញបន្ថែម ក្នុងការបំពេញការងារ ការផ្សព្វផ្សាយបន្ដ ប្រកបដោយទំនួលខុសត្រូវ ប្រកបដោយវិជ្ជាជីវ: គុណភាព និងប្រសិទ្ធភាព»។
ប្រធានសម្ព័ន្ធសហជីពចលនាកម្មករកម្ពុជាលោក ប៉ាវ ស៊ីណា បាននិយាយថា បច្ចុប្បន្ន ការប្រើប្រាស់បណ្ណ ប.ស.ស របស់កម្មករនិយោជិត មានលក្ខណៈល្អប្រសើរច្រើន ដោយមួយរយៈចុងក្រោយនេះ លោកមិនសូវទទួលបានការរិះគន់ពីកម្មករនិយោជិត ចំពោះការប្រើប្រាស់សេវា ប.ស.ស នោះទេ ប៉ុន្តែព័ត៌មានដែលលោកបានទទួល គឺទាក់ទងនឹងឥរិយាបថរបស់បុគ្គលិកពេទ្យ។
លោកបានប្រាប់ថា៖«ចំពោះអ្នកផ្តល់សេវាសុខាភិបាលនេះ កន្លែងខ្លះ គាត់នៅតែមិនយកចិត្តទុកដាក់លើអ្នកជំងឺ ដែលប្រើប្រាស់បណ្ណប.ស.ស គឺនៅមានភាពចន្លោះប្រហោង ប៉ុន្តែការប្រើប្រាស់បណ្ណជាទូទៅមិនមានឧបសគ្គអ្វីទេ ខាងស្ថាប័ន ប.ស.ស ជួយសម្រួលបានច្រើន»។
ទោះជាបែបនេះក្តីលោក ប៉ាវ ស៊ីណា នៅតែទទូចដល់បេឡាជាតិ សន្តិសុខសង្គម ពង្រីកវិសាលភាព នៃការទទួលខុសត្រូវបញ្ហាសុខភាពរបស់កម្មករ និយោជិតទាំងស្រុង ដោយមិនមានលក្ខខណ្ឌ ខណៈដែលកន្លងទៅពិនិត្យនិងព្យាបាលជំងឺរបស់កម្មករនិយោជិតនៅមានការកំណត់ប្រភេទជំងឺនៅឡើយ៕
