លោកស្រី ម៉ែន នារីសោភ័គ ពេលចុះសួរសុខទុក្ខកុមារ និងមនុស្សចាស់ គ្មានទីពឹងនៅថ្ងៃទី៩ មេសា ។ រូបថត កាកបាទក្រហមកម្ពុជា
ភ្នំពេញៈកាកបាទក្រហមកម្ពុជា បាន និងកំពុងបន្តផ្តល់ស្បៀងអាហារថវិកា និងរៀបចំអាហារ ព្រមទាំងមានការយកចិត្តទុកដាក់លើកុមារកំព្រា និងចាស់ឥតទីពឹង ដែលពួកគេចាំបាច់ត្រូវទទួលបានការថែទាំបីបាច់រក្សាផ្ដល់ភាពកក់ក្ដៅ។
ជាក់ស្តែងយោងតាមកាកបាទក្រហមកម្ពុជានៅថ្ងៃទី៩ខែមេសាលោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងជាអនុប្រធានអចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិបានចុះផ្តល់ស្បៀងអាហារថវិកានិងរៀបចំអាហារដ៏ឈ្ងុយឆ្ងាញ់ជាលើកទី៩ ដល់កុមារកំព្រា និងចាស់ឥតទីពឹងនៅអង្គការសង្គ្រោះជនអស់សង្ឃឹម។
លោកស្រី ម៉ារី អិន ទីប្រឹក្សាអង្គការសង្គ្រោះជនអស់សង្ឃឹមបានលើកឡើងថា ទារក និងកុមារចាំបាច់ណាស់ ត្រូវទទួលបានការថែទាំបីបាច់រក្សាផ្ដល់ភាពកក់ក្ដៅតែជាអកុសលទារកនិងកុមារ ១ ភាគតូច បែរជាកើតមកភ្លាមត្រូវម្ដាយ-ឪពុក យកទៅបោះបង់ចោល មិនទទួលបានសូម្បីតែការអាណិតស្រឡាញ់ និងសុខទុក្ខរស់ឬក៏ស្លាប់ផង។
លោកស្រីបានបន្តថា៖«ជាក់ស្ដែងទារកនិងកុមារជាច្រើននាក់ ដែលរស់នៅអង្គការសង្គ្រោះជនអស់សង្ឃឹមសុទ្ធសឹងតែជាក្មេងត្រូវឪពុកម្ដាយបោះបង់ចោលខ្លះត្រូវម្ដាយយកទៅចោលនៅធុងសំរាមខ្លះត្រូវគ្រួសារបោះបង់ចោលព្រោះគ្មានលទ្ធភាពចិញ្ចឹមហើយខ្លះទៀតឪពុកម្ដាយស្លាប់ចោលទាំងខ្លួនមិនទាន់បាត់ក្លិនទឹកដោះផង»។
តាមការបញ្ជាក់របស់លោកស្រី ម៉ារី អិន បានឱ្យដឹងទៀតថា៖ «ក្មេងដែលមកស្នាក់នៅទីនេះ ខ្លះជាកុមារតូចខ្លះជាទារកទើបនឹងកើត ដែលត្រូវបានបោះបង់ចោល ខ្លះទៀតម្ដាយជួបបញ្ហាច្រើនទៅជាសរសៃប្រសាទកូន នៅតូចគ្មានទីពឹង,គ្រួសារគ្មានលទ្ធភាព ខ្លះម្ដាយឪពុកស្លាប់ចោលនិងម្ដាយញៀនគ្រឿងញៀន សម្រាលកូនមកទុកចោលយើងរើសមកចិញ្ចឹមជាដើម»។
នៅក្នុងអង្គការសង្គ្រោះជនអស់សង្ឃឹមនេះ មានកន្លែងស្នាក់នៅអាហារនិងផ្ដល់ការសិក្សាដោយទទួលបានការឧបត្ថម្ភពីសប្បុរសជនក្រៅ និងក្នុងប្រទេស ពិសេសលោកស្រី ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែជួយឧបត្ថម្ភជាបន្ដបន្ទាប់ជាស្បៀង សម្ភារសិក្សា ថវិកា និងរៀបចំអាហារដ៏ឈ្ងុយឆ្ងាញ់ ១ ពេលជារៀងរាល់ឆ្នាំ។
លោកស្រី ម៉ែន នារីសោភ័គ បានចុះមកសួរសុខទុក្ខកុមារ និងអ្នកគ្មានទីពឹងក្នុងអង្គការនេះ ដោយបាននាំស្បៀងអាហារ និងថវិកាពិសេស បានរៀបចំអាហារសាមគ្គី ១ ពេលជូនដល់បុគ្គលិក និងកុមារកំព្រាតូចធំប្រមាណ៣៥០ នាក់ ផងដែរ។
ក្នុងឱកាសនោះលោកស្រីបានថ្លែងថា៖«សម្ដេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនផ្តាំផ្ញើដល់ក្មួយៗចៅៗត្រូវចេះសាមគ្គីភាពគ្នាស្រឡាញ់គ្នាដូចបងប្អូនក្នុងគ្រួសារតែមួយក្រោមដំបូលរបស់អង្គការនិងត្រូវខិតខំរៀនសូត្រពិសេសត្រូវរស់នៅជាពលរដ្ឋល្អសិស្សល្អកូនល្អចៀសឆ្ងាយពីគ្រឿងញៀន»។
លោកស្រី ម៉ែន នារីសោភ័គ បានបន្តថា៖ «ដោយសារកុមារមួយចំនួនធ្លាប់ឃើញឪពុកម្ដាយនិងក្រុមគ្រួសារជួបផលអាក្រក់ដោយសារគ្រឿងញៀននេះដូច្នេះសូមចៀសឱ្យផុតនិងកុំប្រើអំពើហិង្សាក្នុងគ្រួសារនិងត្រូវអភិវឌ្ឍខ្លួនឱ្យទៅជាធនធានដ៏ល្អសម្រាប់ប្រទេសជាតិយើង»។
លោកស្រីក៏បានបញ្ជាក់ដែរថា កាកបាទក្រហមកម្ពុជា បានជួយឧបត្ថម្ភដល់អង្គការសង្គ្រោះជនអស់សង្ឃឹម តាំងពីឆ្នាំ២០១៣មក និងបានផ្តល់អំណោយរួមជាមួយការរៀបចំ អាហារដ៏ឈ្ងុយឆ្ងាញ់ជូនដល់កុមារ និងបុគ្គលិកនៅទីនេះជាលើកទី៩ ផងដែរ៕
A
