ពិធីប្រកាសជាផ្លូវការយុទ្ធនាការប្ដូរឥរិយាបថកាលពីថ្ងៃទី៨ មេសា ។ រូបថត សហការី
សៀមរាប: យុទ្ធនាការ «ប្តីខ្ញុំល្អកូនខ្ញុំឆ្លាត» ត្រូវបានបង្កើតឡើងដើម្បីលើកកម្ពស់ការចិញ្ចឹមបីបាច់របស់អ្នកថែទាំកុមាររួមទាំងបុរសនិងស្ត្រីសម្រាប់កុមារចាប់ពីមុនពេលកើតរហូតដល់អាយុ ៥ ឆ្នាំ ដើម្បីជួយពួកគេឱ្យរីកចម្រើន និងឈានដល់សក្តានុពលពេញលេញ។
យុទ្ធនាការគោលដៅទី២នេះគឺជាលទ្ធផលនៃការងាររួមគ្នារវាងគម្រោងអភិវឌ្ឍន៍កុមារតូច(IECD) ដឹកនាំអនុវត្តដោយវិទ្យាស្ថានស្រាវជ្រាវត្រីកោណ(RTI International) សហការជាមួយអង្គការហេឡែនខេលល័រ អន្តរជាតិ(Helen Keller International) អង្គការសេហ្វហេវិន (Safe Haven) និងរាជរដ្ឋាភិបាលកម្ពុជាក៏ដូចជាការគាំទ្រពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ(USAID)។
លោក ចន វីលៀមអាមេស នាយកប្រចាំប្រទេសនិងនាយកគម្រោងអភិវឌ្ឍន៍កុមារតូចនៃវិទ្យាស្ថានស្រាវជ្រាវត្រីកោណអន្តរជាតិ(RTI International)បានថ្លែងថា៖ «យុទ្ធនាការនេះមានគោលបំណងលើកកម្ពស់ការរួមចំណែកនិងការចូលរួមដោយស្មើភាពគ្នាពីបុរសនិងស្ត្រីក្នុងការចិញ្ចឹមបីបាច់កូនតូចដើម្បីជួយឱ្យកុមារសម្រេចបាននូវសក្តានុពលទៅតាមដំណាក់កាលអភិវឌ្ឍន៍សំខាន់ៗលើបញ្ញា ការគិត ភាសាសង្គមារម្មណ៍ និងការលូតលាស់ផ្នែករាងកាយ»។
គម្រោងអភិវឌ្ឍន៍កុមារតូចគឺជាកម្មវិធីដែលមានលក្ខណៈអន្តរវិស័យសម្រាប់ការជួយដល់កុមារតូចនៅកម្ពុជា ឱ្យមានការលូតលាស់ផ្នែករាងកាយ បញ្ញា ការគិត ភាសានិងសង្គមារម្មណ៍បានល្អប្រសើរ។
ប្រធានបទនៃយុទ្ធនាការ«ប្តីខ្ញុំល្អកូនខ្ញុំឆ្លាត»ត្រូវបានរៀបចំឡើងដើម្បីជម្នះនឹងកត្តាយេនឌ័រតាមរយៈការផ្សព្វផ្សាយគំនិតដែលថាបុរសអាចផ្តល់ការថែទាំល្អដល់កុមារដូចស្ត្រី។
វាក៏បានសង្កត់ធ្ងន់ផងដែរអំពីសារៈសំខាន់នៃការថែទាំប្រកបដោយប្រសិទ្ធភាព និងការរៀនសូត្រដំបូងក្នុងការជួយកុមារឱ្យអភិវឌ្ឍនិងជោគជ័យ។
«ប្តីខ្ញុំល្អកូនខ្ញុំឆ្លាត»បានលើកទឹកចិត្តអ្នកថែទាំកុមារទាំង២ភេទឱ្យប្តូរវេនគ្នាមើលថែកូនៗដើម្បីអនុញ្ញាតឱ្យមានការសម្រាក និងបង្ការការហត់នឿយ។
គម្រោងអភិវឌ្ឍន៍កុមារតូចចូលរួមគាំទ្រដល់រាជរដ្ឋាភិបាលកម្ពុជាក្នុងការលើកកម្ពស់ការចិញ្ចឹមបីបាច់ និងធ្វើឱ្យប្រសើរឡើងនូវអាហារូបត្ថម្ភដល់កុមារគ្រប់រូបដោយរាប់បញ្ចូលទាំងកុមារងាយរងគ្រោះចាប់តាំងពីនៅក្នុងផ្ទៃម្ដាយ។
គម្រោងអភិវឌ្ឍន៍កុមារតូចមានគោលដៅដោះស្រាយបញ្ហាយេនឌ័រ ការកាត់បន្ថយភាពក្រិសក្រិនរបស់កុមារនិងបង្កើនការកំណត់អត្តសញ្ញាណបឋមអំពីពិការភាព ការអភិវឌ្ឍយឺតនិងអន្តរាគមន៍ទាន់ពេលវេលាដោយចាប់ពីនៅក្នុងផ្ទៃម្ដាយរហូតដល់អាយុក្រោម៥ឆ្នាំ។
បុគ្គលជិត២០០នាក់បានប្រមូលផ្តុំគ្នានៅវិទ្យាល័យកំពង់ក្តី ខេត្តសៀមរាប សម្រាប់កម្មវិធីយុទ្ធនាការផ្លាស់ប្ដូរឥរិយាបថសហគមន៍ (BCC) នេះ។
កម្មវិធីនេះធ្វើឡើងបន្ទាប់ពីគម្រោងសម្ពោធលើកដំបូងដែលបានធ្វើឡើងនៅថ្ងៃទី១ ខែមេសា ឆ្នាំ២០២៣ នៅផ្សារទំនើប Heritage Walk ក្នុងខេត្តសៀមរាបដែលមានប្រជាពលរដ្ឋជាង១៧០គ្រួសារ មកពីស្រុកជិតខាងបានចូលរួម។
លោកស្រីស៊ិន ណម ប្រធានគណ:កម្មាធិការពិគ្រោះយោបល់កិច្ចការស្ត្រីនិងកុមារខេត្តសៀមរាប (គ.ក.ស.ក) បានឱ្យដឹងថា៖ «យុទ្ធនាការផ្លាស់ប្តូរឥរិយាបថសហគមន៍នេះនឹងបង្កើតឱកាសសម្រាប់ការចូលរួមនិងការគាំទ្រយ៉ាងពេញទំហឹងពីប្រជាពលរដ្ឋគ្រប់ស្រទាប់វណ្ណៈដើម្បីលើកកម្ពស់សហគមន៍បែបបរិយាប័ន្ន»។
លោកស្រីបានបន្ដថា៖ «គោលដៅសំខាន់គឺដើម្បីធានាថា កុមារតូចទាំងអស់នឹងទទួលបានការថែទាំយ៉ាងពេញលេញនិងការអភិវឌ្ឍប្រកបដោយគុណភាពខ្ពស់ពីឪពុកម្តាយអ្នកថែទាំទាំងបុរសនិងស្ត្រីក្រុមគ្រួសារនិងសហគមន៍ទាំងមូលដែលនឹងអាចឱ្យពួកគេទទួលបានការលូតលាស់និងអភិវឌ្ឍប្រកបដោយសក្តានុពលពេញលេញ»។
ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ(USAID) គ្រប់គ្រងកម្មវិធីជំនួយបរទេសរបស់សហរដ្ឋអាមេរិកដែលផ្តល់ជំនួយផ្នែកសេដ្ឋកិច្ច និងមនុស្សធម៌ នៅក្នុងប្រទេសជាង៨០ ទូទាំងពិភពលោក។
ទីភ្នាក់ងារ USAID នេះ បានសហការជាមួយដៃគូកម្ពុជានិងអន្តរជាតិទូទាំង២៥ខេត្ត/ក្រុងក្នុងប្រទេសកម្ពុជាដើម្បីធ្វើឱ្យប្រទេសនេះកាន់តែមានភាពបើកចំហរីកចម្រើន មានភាពធន់និងជាដៃគូប្រកបដោយបរិយាប័ន្នក្នុងតំបន់ឥណ្ឌូប៉ាស៊ីហ្វិក។
នេះជាការលើកកម្ពស់គណនេយ្យភាពរបស់រាជរដ្ឋាភិបាល បញ្ហាសិទ្ធិមនុស្ស សុខភាពនិងអាហារូបត្ថម្ភគាំទ្រការអប់រំនិងការអភិវឌ្ឍកុមារដើម្បីបង្កើនផលិតភាពកសិកម្មនិងសន្តិសុខស្បៀង អភិរក្សព្រៃឈើ និងអាងត្រងទឹកជួយគ្រួសារកសិករសម្របខ្លួនក្នុងការកាត់បន្ថយផលប៉ះពាល់ពីការប្រែប្រួលអាកាសធាតុនិងគ្រោះធម្មជាតិក៏ដូចជាជួយគាំទ្រកម្ពុជាឆ្លើយតបទៅនឹងការរាតត្បាតនៃជំងឺកូវីដ១៩៕
