លោក ម៉ម ប៊ុនហេង ពេលចុះពិនិត្យអគារសម្ភពថ្មីនៅមន្ទីរពេទ្យកុមារជាតិនាថ្ងៃទី១៨ មេសា ។ រូបថត ក្រសួងសុខាភិបាល
ភ្នំពេញៈរដ្ឋមន្ត្រីក្រសួងសុខាភិបាលក្នុងដំណើរចុះពិនិត្យអគារសម្ភពថ្មីនៃមនី្ទរពេទ្យកុមារជាតិ កាលព្រឹកថ្ងៃទី១៨ ខែមេសា ឆ្នាំ២០២៣ បានឱ្យដឹងថា អគារថ្មីផ្នែកសម្ភពនៃមន្ទីរពេទ្យកុមារជាតិកម្ពស់ ៤ ជាន់គ្រោងសម្ពោធដាក់ដំណើរការនៅក្នុងខែមេសានេះ។
លោក ម៉ម ប៊ុនហេង រដ្ឋមន្រី្តក្រសួងសុខាភិបាលបានឱ្យដឹងថា អគារថ្មីនៃមនី្ទរពេទ្យកុមារជាតិនឹងគ្រោងសម្ពោធដាក់ឱ្យដំណើរការជាផ្លូវការនាថ្ងៃទី២០ ខែមេសា ក្រោមអធិបតីភាពលោកនាយករដ្ឋមន្រី្ត ហ៊ុន សែន។
លោកបានបន្តថា៖ «អគារថ្មីនេះមានបំពាក់សម្ភារបរិក្ខារពេទ្យទំនើបជាជំនួយរបស់ប្រទេសឆែកដោយមានផ្តល់សេវាពិគ្រោះជំងឺកុមារ ពិនិត្យផ្ទៃពោះ ចាក់ថ្នាំបង្ការកុមារ រោគស្ត្រី សម្រាលកូន ផ្នែកវះកាត់និងទារកមានបញ្ហាផ្សេងៗក្រោយសម្រាល»។
លោក ម៉ម ប៊ុនហេង បានបញ្ជាក់ទៀតថា៖ «អគារថ្មីនៃមនី្ទរពេទ្យកុមារជាតិ បានបំពាក់នូវឧបករណ៍ថ្មីទំនើបបន្ថែម ជាពិសេសការធ្វើទំនើបកម្មប្រព័ន្ធព័ត៌មានវិទ្យា ការតាមដានថែទាំសុខភាពជូនកុមារ មាតា និងការពិនិត្យផ្ទៃពោះ ដែលមានឧបករណ៍ទំនើបនិងការថែទាំកុមារកើតមកមិនគ្រប់ខែឬក៏កុមារមានទម្ងន់មិនគ្រប់មានបន្ទប់ថែទាំថែមទៀត»។
នៅក្នុងឱកាសនោះដែរ លោក ម៉ម ប៊ុនហេង ក៏បានកោតសរសើរចំពោះក្រុមគ្រូពេទ្យនៃមនី្ទរពេទ្យកុមារជាតិ ក៏ដូចជាផ្នែកពាក់ព័ន្ធដទៃទៀតដែលបានខិតខំតាមដានពិនិត្យសភាពការណ៍ជូនដល់ប្រជាពលរដ្ឋកម្ពុជានាឱកាសបុណ្យចូលឆ្នាំថ្មី ដើម្បីជួយការពារសុខភាព និងសុវត្ថិភាពរបស់ពួកគាត់ដែរ។
អគារសម្ភពនេះមានកម្ពស់ ៤ជាន់អាចដាក់អ្នកជំងឺបានប្រមាណជាង១ ០០គ្រែ។ អគារថ្មីនេះបានចាប់ផ្ដើមសាងសង់ក្នុងអំឡុងឆ្នាំ ២០២១ និងបានបញ្ចប់ការសាងសង់រួចរាល់ជាស្ថាពរ កាលពីខែកញ្ញា ឆ្នាំ២០២២ ។
គួរបញ្ជាក់ថា បច្ចុប្បន្ន មនី្ទរពេទ្យកុមារជាតិមានសេវាធំៗចំនួន ២ គឺផ្នែកកុមារ និងផ្នែកសម្ភព ហើយសមិទ្ធផល នៃអគារមនី្ទរពេទ្យកុមារជាតិនេះ (ផ្នែកសម្ភព) ដែលមានទទឹង ១៥ម៉ែត្រនិងបណ្តោយ ៦០ម៉ែត្រ មានកម្ពស់ ៤ជាន់នេះគឺសាងសង់ឡើងដោយថវិការបស់រាជរដ្ឋាភិបាល។
ក្រសួងសុខាភិបាលកម្ពុជាបានបង្ហាញក្តីរំពឹងថា ការមានអគារមន្ទីរពេទ្យថ្មីបន្ថែមទៀតនឹងជួយលើកកម្ពស់សុខុមាលភាពមាតានិងកុមារ កាន់តែប្រសើរនិងប្រសិទ្ធភាពខ្ពស់ថែមទៀត៕
