មន្ត្រីស៊ីម៉ាក់កំពុងថែទាំកូនសុនខទើបកើតថ្មី។ រូបថត ហេង រតនា
ភ្នំពេញៈ មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានកំពុងមើលថែ និងបង្ហាត់កូនសុនខ ១៣ ក្បាលដែលទើបកើតមកនាពេលថ្មីៗនេះដើម្បីឱ្យក្លាយទៅជាសុនខបន្តវេនហិតរកមីន និងជំនាញផ្សេងៗទៅតាមភាពវាងវៃរបស់ពួកវា ព្រោះបច្ចុប្បន្នកម្ពុជានៅខ្វះសុនខជំនាញហិតមីនសម្រាប់ប្រើប្រាស់ជាជំនួយក្នុងការបោសសម្អាតមីន។
លោក ហេង រតនា អគ្គនាយក ស៊ីម៉ាក់ បានឱ្យដឹងនៅថ្ងៃទី ១៩ ខែមេសាថា បច្ចុប្បន្ននេះ ស៊ីម៉ាក់ បានគាំទ្រមេពូជសុនខផលិតកូនបានជាង ១០០ ក្បាល រួមជាមួយកូនសុនខទើបតែកើតថ្មីចំនួន ១៣ ក្បាលទៀត ដែលកំពុងទទួលបានការមើលថែ។
លោក ហេង រតនា ថ្លែងថា៖ «យើងនឹងជ្រើសរើសវា ក្រោយពីបង្រៀនមួយរយៈ បើអាណាជាប់ទើបយកបាន អាណាធ្លាក់នឹងក្លាយជាសុនខដែលមានជំនាញផ្សេងទៀត (ព្រោះ) កូនសុនខទាំងនេះ មិនមែនសុទ្ធតែមានជំនាញក្នុងការស្វែងរកមីន ឬហិតមីននោះទេ»។
លោកអះអាងថា ស៊ីម៉ាក់ មានលទ្ធភាពគ្រប់គ្រាន់នៅក្នុងការផលិតកូនសុនខសម្រាប់ក្នុងស្រុក ប៉ុន្តែក៏ត្រូវស្រាវជ្រាវ និងស្វែងរកប្រភេទពូជផ្សេង ដែលនាំចូលពីប្រទេសដទៃទៀតផងដែរ។
លោក ហេង រតនា បញ្ជាក់ថា សព្វថ្ងៃនេះកម្ពុជាមានសុនខដែលមានជំនាញស្វែងរកមីនសរុបចំនួនជាង ២០០ ក្បាល ដែលសុនខទាំងនោះខ្លះកំពុងប្រតិបត្តិការ និងខ្លះកំពុងទទួលការហ្វឹកហាត់ ដើម្បីក្លាយជាសុនខ ដែលមានជំនាញស្វែងរកមីន។
លោកថ្លែងថា៖ «ចំនួនសរុបសុនខទាំងជាង ២០០ ក្បាលនេះ វាមិនគ្រប់គ្រាន់ឡើយសម្រាប់ការងារក្នុងវិស័យមីនហេតុនេះហើយបានជាស៊ីម៉ាក់ ប្រឹងប្រែងខិតខំពង្រីកកម្លាំងសុនខនេះ ពីព្រោះការងាររបស់សុនខមិនមែនតែហិតមីននោះទេ ដោយសារមានសុនខខ្លះក៏វាមានជំនាញផ្សេងដែរដូចជា ជំនាញសន្តិសុខ និងជំនាញផ្សេងៗទៀតជាដើម»។
យោងតាមរបាយការណ៍របស់ស៊ីម៉ាក់ បានបង្ហាញថា សុនខហិតមីន ត្រូវបានបង្កើតឡើង និងនាំចូលសម្រាប់គាំទ្រដល់អង្គភាពស៊ីម៉ាក់ ដោយកងទ័ពប្រទេសស៊ុយអ៊ែត កាលពីឆ្នាំ ១៩៩៦ ក្នុងកម្រិតហ្វឹកហ្វឺនសាកល្បងប្រើប្រាស់សុនខហិតមីននៅកម្ពុជា និងបានបញ្ចប់គម្រោង នៅឆ្នាំ ២០០២។
ប៉ុន្ដែ ស៊ីម៉ាក់បានចាប់ផ្ដើមពង្រឹងភាពជាម្ចាស់ និងភាពជាដៃគូ នៃកម្មវិធីសុនខហិតមីន ចាប់ពីឆ្នាំ ២០០២ រហូតទទួលបានភាពជោគជ័យ និងរឹងមាំតែម្ដង នៅអំឡុងឆ្នាំ ២០១៦។ បច្ចុប្បន្ន ស៊ីម៉ាក់ បានកែប្រែស្ថានភាពពីទិញពីបរទេស ក្លាយជាអ្នកផ្គត់ផ្គង់សុនខទៅអន្តរជាតិ និងគាំទ្រកិច្ចប្រតិបត្តិការក្នុងប្រទេសផងដែរ។ សុនខមានជំនាញហិតមីនដែលកប់ដី និងសារធាតុផ្ទុះផ្សេងៗដូចជាសារធាតុញៀន៕
