រោងចក្រផលិតទឹកស្អាតបាក់ខែងជំហានទី១ ដែលបើកដំណើរការសាកល្បងកាលពីថ្ងៃទី២១ មេសា ។ រូបថត PPWSA
ភ្នំពេញៈ មន្ត្រីជាន់ខ្ពស់រដ្ឋាករទឹកស្វយ័តរាជធានីភ្នំពេញ បានអះអាងថា នៅថ្ងៃទី ៥ ខែឧសភាខាងមុខ អ្នករស់នៅក្នុងរាជធានីភ្នំពេញ និងក្រុងតាខ្មៅ ខេត្តកណ្ដាល នឹងទទួលបានទឹកស្អាតប្រើប្រាស់គ្រប់គ្រាន់ដូចធម្មតាឡើងវិញ ខណៈរោងចក្រផលិតទឹកស្អាតបាក់ខែងជំហានទី១ ត្រូវបានបើកដំណើការសាកល្បងដោយជោគជ័យ កាលពីយប់ថ្ងៃទី ២១ ខែមេសា ឆ្នាំ ២០២៣ តាមរយៈការបញ្ចូលទឹកទៅក្នុងបំពង់មេនាំទឹកទំហំ ៤០០ មិលី្លម៉ែត្រ សម្រាប់បញ្ជូនទឹកទៅកាន់តំបន់ខណ្ឌជ្រោយចង្វារ រាជធានីភ្នំពេញ ។
លោកផេង ទី អគ្គនាយករងរដ្ឋាករទឹកស្វយ័តរាជធានីភ្នំពេញទទួលបន្ទុកគ្រប់គ្រងប្រព័ន្ធផ្គត់ផ្គង់ទឹកស្អាត បានប្រាប់ភ្នំពេញប៉ុស្តិ៍នៅថ្ងៃទី២៣ ខែមេសាថា នៅពេលនេះ ក្រុមការងារកំពុងសាកល្បងបើកទឹកបញ្ចូលទៅក្នុងបំពង់មេនាំទឹកស្អាត HDPE ទំហំ ១ ៤០០មិលី្លម៉ែត្រ ចូលទៅកាន់ពហុកីឡដ្ឋានមរតកតេជោ នៅត្រើយខាងកើតស្ពានព្រែកព្នៅ និងបំពង់មេនាំទឹកស្អាតទំហំ ២ ០០០មិលី្លម៉ែត្រ នៅខាងលិចស្ពានព្រែកព្នៅ ដើម្បីពិនិត្យមើលថា តើវាមានជម្រាបទឹក ឬធ្លុះធ្លាយនៅផ្នែកណាខ្លះដែរឬអត់?
លោកបានបញ្ជាក់ថា៖«យោងតាមល្បឿនការងាររបស់យើងនាពេលនេះ យើងរំពឹងថា អតិថិជនដែលរស់នៅក្នុងរាជធានីភ្នំពេញនិងក្រុងតាខ្មៅ ខេត្តកណ្ដាលនឹងទទួលបានការផ្គត់ផ្គង់ទឹកស្អាតប្រើប្រាស់យ៉ាងគ្រប់គ្រាន់តាមតម្រូវការដូចដើមឡើងវិញ នៅមុនថ្ងៃទី៥ ខែឧសភា ខាងមុខនេះ»។
បើតាមលោកផេង ទី នៅដើមឆ្នាំ២០២៤ ខាងមុខរ.ទ.ស.ភ មានសមត្ថភាពផលិតទឹកស្អាតបានជាង១លានម៉ែត្រគុបធៀបនឹងការព្យាករតម្រូវការទឹកស្អាតប្រើប្រាស់ប្រចាំថ្ងៃប្រមាណ៩០ម៉ឺនម៉ែត្រគុបក្នុង១ថ្ងៃ។ជាមួយគ្នានេះ លោកបានអំពាវនាវឱ្យពលរដ្ឋបន្តភាពអត់ធ្មត់ និងប្រើប្រាស់ទឹកដោយសន្សំសំចៃ រហូតដល់ការភ្ជាប់ប្រព័ន្ធបំពង់មេនាំទឹកទាំងអស់ត្រូវបានតភ្ជាប់រួចរាល់ជាស្ថាពរ។
កាលពីខែវិច្ឆិកា ឆ្នាំ២០១៩ រ.ទ.ស.ភ និងក្រុមហ៊ុន VINCI Construction Grand’s Projects បានចុះកិច្ចសន្យាសាងសង់រោងចក្រប្រព្រឹត្តិកម្មទឹកស្អាតបាក់ខែងជំហាន១ដែលមានសមត្ថភាពផលិត១៩៥ពាន់ម៉ែត្រគុបក្នុង១ថ្ងៃ។ កិច្ចសន្យាសាងសង់នេះមានទឹកប្រាក់សរុបប្រមាណ១៥៦លានដុល្លារអាមេរិក ក្នុងនោះថវិកាកម្ចីបន្តពីក្រសួងសេដ្ឋកិច្ច និងហិរញ្ញវត្ថុចំនួន១៣៦លានដុល្លារអាមេរិក ដែលទទួលការគាំទ្រពីដៃគូអភិវឌ្ឍន៍ចំនួន២គឺទីភ្នាក់ងារបារាំងសម្រាប់ការអភិវឌ្ឍន៍(AFD)និងធនាគារវិនិយោគអឺរ៉ុប(EIB)និងថវិកាបដិភាគរបស់ រ.ទ.ស.ភ ចំនួន២០លានដុល្លារអាមេរិក។
ជុំវិញការបើកដំណើរការសាកល្បងរោងចក្រផលិតទឹកស្អាតបាក់ខែងជំហានទី១នេះ អាជីវករនៅភូមិ-សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ អ្នកស្រី សេង ធីណា អាយុ៥២ឆ្នាំ បានប្រាប់ភ្នំពេញប៉ុស្តិ៍ថា នៅពេលនេះ ផ្ទះរបស់គាត់ក៏ដូចជាអ្នកូមិផ្សេងទៀតក្នុងសង្កាត់បាក់ខែង គឺមានទឹកស្អាតប្រើប្រាស់គ្រប់គ្រាន់ដោយសម្ពាធទឹកបានចេញខ្លាំងដូចកាលពីមុនឡើងវិញហើយ។
អ្នកស្រីបានថ្លែងថា៖«ក្នុងរយៈពេល២-៣ថ្ងៃនេះ ខ្ញុំពិនិត្យឃើញទឹកបើកមកចេញខ្លាំង ហើយចេញខ្លាំង២៤ម៉ោងលើ២៤ម៉ោងតែម្ដង មិនមានភាពរអាក់រអួលដូចកាលពីខែមីនា ទេ»។
យ៉ាងណាក៏ដោយ អ្នកស្រី ណាស់ ស៊ីណាត អាយុ៥៦ឆ្នាំ រស់នៅក្នុងសង្កាត់ច្រាំងចម្រេះ១ ខណ្ឌឫស្សីកែវ រាជធានីភ្នំពេញ បាននិយាយថា សម្រាប់ពលរដ្ឋក្នុងភូមិសង្កាត់ដែលគាត់រស់នៅនិងដែលពុំមានម៉ូទ័របូមដើម្បីទាញទឹកពីបំពង់មេនាំទឹក គឺមិនអាចបើកទឹកនៅបន្ទប់ជាន់ទី១ចេញទេ ជាពិសេសនៅពេលថ្ងៃ។
អ្នកស្រីបានបញ្ជាក់ថា៖«នៅផ្ទះខ្ញុំ បន្ទប់ជាន់ផ្ទាល់ដី គឺមានទឹកចេញអាចប្រើប្រាស់បានទាំងយប់ទាំងថ្ងៃ ប៉ុន្តែនៅបន្ទប់ជាន់ទី១ ពេលថ្ងៃបើកទឹកមិនចេញទេ ព្រោះខ្ញុំមិនមានម៉ូទ័របូមទឹកជាជំនួយដូចគេ»។
យ៉ាងណាក៏ដោយ អ្នកស្រី ជឿទៅលើការអះអាងរបស់រដ្ឋាករទឹកស្វយ័តរាជធានីភ្នំពេញដែលថា នៅដើមរដូវវស្សាខាងមុខឬយ៉ាងយូរនៅដើមឆ្នាំ២០២៤ អង្គភាពនេះនឹងមានសមត្ថភាពផលិតទឹកស្អាតសម្រាប់ផ្គត់ផ្គង់ដល់អតិថិជនបានប្រើប្រាស់គ្រប់គ្រាន់នៅទូទាំងរាជធានីភ្នំពេញ និងក្រុងតាខ្មៅ ខេត្តកណ្ដាល៕
