លោកខៀវ កាញារីទ្ធ ពេលចូលរួមក្នុងវេទិកាពិភាក្សាស្តីពីការពង្រឹងក្រមសីលធម៌វិជ្ជាជីវៈសារព័ត៌មានពីថ្ងៃទី២១ មេសា ។ រូបថត ក្រសួងព័ត៌មាន
ភ្នំពេញៈ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានលើកឡើងថា ក្រសួងកំពុងរៀបចំធ្វើវិសោធនកម្មច្បាប់ស្តីពីរបបសារព័ត៌មានលើមាត្រាមួយចំនួន ក្នុងនោះផ្តោតសំខាន់លើស្ថាប័នណាដែលផ្សាយព័ត៌មានខុសត្រូវតែចុះផ្សាយកែតម្រូវឱ្យគេទាំងស្រុងឡើងវិញ ក្នុងករណីមិនផ្សាយទាំងស្រុងទេគឺត្រូវដកអាជ្ញាប័ណ្ណ។
លោកខៀវ កាញារីទ្ធ លើកឡើងដូចនេះក្នុងវេទិកាពិភាក្សាស្តីពីការពង្រឹងក្រមសីលធម៌វិជ្ជាជីវៈសារព័ត៌មាន កាលពីថ្ងៃទី២១ ខែមេសា ឆ្នាំ២០២៣។ លោកបានបន្ថែមថា ក្រសួងក៏បាន កែសម្រួលនូវចំណុចមួយចំនួនដើម្បីអនុវត្តមាត្រានៃច្បាប់នេះឱ្យបានពេញលេញដើម្បីធ្វើឱ្យមានភាពប្រសើរឡើងនៃការផ្សាយព័ត៌មាន។
លោកបានបញ្ជាក់ថា៖ «យើងធ្វើនេះ ដើម្បីចូលរួមក្នុងការទប់ស្កាត់ និងលុបបំបាត់ព័ត៌មានក្លែងក្លាយ ខណៈការបោះឆ្នោតជិតចូលមកដល់ការបង្កើតនូវព័ត៌មានក្លែងក្លាយក៏នឹងកើតមានច្រើនដែរ»។
លោក ផុស សុវណ្ណ អ្នកនាំពាក្យក្រសួងព័ត៌មានបានឱ្យដឹងនៅថ្ងៃទី២៣ ខែមេសាថា ពាក់ព័ន្ធនឹងបញ្ហានេះក្រសួងនឹងចែងចំណុចនេះនៅក្នុងមាត្រាណាមួយនៅក្នុងពេលធ្វើវិសោធនកម្មច្បាប់ស្ដីពីរបបសារព័ត៌មានដើម្បីងាយស្រួលក្នុងការអនុវត្ត ព្រោះកន្លងទៅច្បាប់របបសារព័ត៌មាន ត្រូវនឹងស្ថានភាពចាប់តាំងពីឆ្នាំ១៩៩៥ ខណៈស្ថានភាពបច្ចុប្បន្នបានវិវឌ្ឍទៅរកអនឡាញច្រើន។
លោកបានថ្លែងថា៖ «ត្រង់ចំណុចនេះ ឯកឧត្តមរដ្ឋមន្ត្រីបានណែនាំឱ្យក្រុមការងារពិចារណាដាក់ចូលនៅក្នុងចំណុចណាមួយនៃមាត្រាឬក្នុងមាតិកានៃវិសោធនកម្មច្បាប់ស្ដីពីរបបសារព័ត៌មានរបស់យើង»។
ជាមួយគ្នានេះដែរ លោក ណុប វី នាយកប្រតិបត្តិនៃសមាគមសម្ព័ន្ធអ្នកសារព័ត៌មានកម្ពុជា (ខេមបូចា) បានលើកឡើងនៅថ្ងៃទី២៣ ខែមេសា ថា ក្នុងច្បាប់របបសារព័ត៌មានបច្ចុប្បន្នក៏មានមាត្រាខ្លះចែងពីការកែតម្រូវរួចហើយដែរ ប៉ុន្តែយ៉ាងណា ប្រហែលជាគោលបំណងរបស់រដ្ឋមន្ត្រីក្រសួងព័ត៌មានចង់ធ្វើឱ្យលម្អិតនៅក្នុងចំណុចណាមួយបន្ថែមទៀត។
លោកបានថ្លែងថា៖ «នៅក្នុងច្បាប់ស្តីពីរបបសារព័ត៌មានបានចែងថា នៅពេលដែលមានការផ្សព្វផ្សាយមិនត្រឹមត្រូវឬខុសឆ្គង សារព័ត៌មាននោះត្រូវតែធ្វើការកែតម្រូវ ក្នុងរយៈពេលកំណត់ថ្ងៃណាមួយ»។
ពាក់ព័ន្ធនឹងការធ្វើវិសោធនកម្មច្បាប់ស្តីពីរបបសារព័ត៌មាននេះ លោក ណុប វី នៅតែគាំទ្រឱ្យមានការធ្វើទៅលើមាត្រាខ្លះដើម្បីដើរឱ្យទាន់សម័យកាលអ៊ីនធឺណិត និងបច្ចេកវិទ្យាឌីជីថល ជាពិសេសមាត្រាមួយចំនួនមិនត្រូវបានអនុវត្តនោះទេ។ យ៉ាងណាត្រូវតែមានការចូលរួមមតិយោបល់ឱ្យបានគ្រប់ជ្រុងជ្រោយ និងមានការចូលរួមពីភាគីពាក់ព័ន្ធផ្សេងៗផងដែរ៕
