លោក គួច ចំរើន ក្នុងជំនួបសម្តែងការគួរសមជាមួយឧបការីរដ្ឋមន្រ្តីការបរទេសចិន គណៈប្រតិភូ និងទីប្រឹក្សាអមស្ថានទូត ប្រធានផ្នែកកុងស៊ុលចិនប្រចាំខេត្តព្រះសីហនុ កាលពីថ្ងៃទី២២ ខែមេសា។ រូបថត រដ្ឋបាលខេត្តព្រះសីហនុ
ព្រះសីហនុៈ អភិបាលខេត្តព្រះសីហនុ លោក គួច ចំរើន បានឱ្យដឹងថា ដោយសារតែរាជរដ្ឋាភិបាល បានដាក់ចេញនូវយុទ្ធសាស្ត្រចតុកោណដំណាក់កាលទី៤ និងគោលនយោបាយ «ផ្លូវ ១ ខ្សែក្រវាត់ ១» របស់លោកប្រធានាធិបតីចិន ស៊ី ជីនភីង នៅឆ្នាំ ២០១៥ ខេត្តព្រះសីហនុទទួលបានភ្ញៀវទេសចរ និងវិនិយោគិនចិន និងបានចងសម្ព័ន្ធមេត្រីភាពជាមួយខេត្ត-ក្រុងនៃសាធារណរដ្ឋប្រជាមានិតចិនចំនួន ១៧។
លោក គួច ចំរើន លើកឡើងដូចនេះ ក្នុងជំនួបសម្តែងការគួរសមជាមួយឧបការីរដ្ឋមន្រ្តីការបរទេសចិន គណៈប្រតិភូ និងទីប្រឹក្សាអមស្ថានទូត ប្រធានផ្នែកកុងស៊ុលចិនប្រចាំខេត្តព្រះសីហនុ កាលពីថ្ងៃទី២២ ខែមេសា ឆ្នាំ២០២៣ ដោយលោកថា ផ្តើមចេញពីគោលនយោបាយចតុកោណរបស់រាជរដ្ឋាភិបាលកម្ពុជា និងគោលនយោបាយផ្លូវ១ ខ្សែក្រវាត់១វាស្របនឹងខេត្តព្រះសីហនុ ដែលមានសក្តានុពលកោះឆ្នេរ ដែលបានទាក់ទាញភ្ញៀវទេសចរមកកាន់ខេត្តព្រះសីហនុយ៉ាងច្រើកុះករនៅចុងសប្តាហ៍ ជាពិសេសទេសចរចិន។
លោកបន្តថា៖«រាជរដ្ឋាភិបាលបានកំណត់យកខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ហើយតំបន់សេដ្ឋកិច្ចពិសេសក្រុងព្រះសីហនុ ស្រូបយកកម្លាំងពលកម្មបានចំនួន ២៥ ០០០នាក់។ នៅខែឧសភា ឆ្នាំ២០២៣ខាងមុខ សម្តេចតេជោ ហ៊ុន សែន នឹងចូលរួមពិព័រណ៍ និងសម្ពោធរោងចក្រផលិតសម្បកកង់រថយន្តដំបូងក្នុងខេត្តព្រះសីហនុ មានទុនវិនិយោគ ៣០០លានដុល្លារអាមេរិក ប្រើប្រាស់កម្លាំងពលកម្ម ១ ៥០០នាក់ ជាក្រុមហ៊ុនឧស្សាហកម្មធំ ហើយទំនើបនៅខេត្តព្រះសីហនុ»។
បើតាមរយៈរដ្ឋបាលខេត្តព្រះសីហនុ លោកគួច ចំរើន បានប្រាប់ឧបការីរដ្ឋមន្រ្តីការបរទេសចិនថា ខេត្តព្រះសីហនុ មានសេវាកម្មយ៉ាងច្រើនមានដូចជា សណ្ឋាគារ កាស៊ីណូ ហើយវិស័យនេះរីកលូតលាស់មានអ្នកវិនិយោគចិនជាច្រើន ផ្តល់ការងារនិងទទួលបានប្រាក់ខែខ្ពស់ជូនយុវជនកម្ពុជា។
ក្រៅពីនេះក៏មានក្រុមហ៊ុនវិនិយោគរោងចក្រអគ្គិសនីដើរដោយធ្យូងថ្មធំ២ ដែលមានអនុភាពផ្តល់ថាមពលរហូតដល់ ១ ៣០០មេហ្គាវ៉ាត់ ខណៈខេត្តព្រះសីហនុតម្រូវការប្រើប្រាស់ថាមពល ១៧០មេហ្គាវ៉ាត់នៅរដូវក្តៅ នៅសល់បន្តចែកចាយទៅកាន់បណ្តារាជធានី ខេត្តផ្សេងទៀត។ ក្រោយពីវិបត្តិកូវីដ១៩សម្ទុះភ្ញៀវទេសចរមិនទាន់ដំណើរការល្អឡើងវិញនៅឡើយ តែទេសចរក្នុងស្រុកមានសម្ទុះខ្លាំង។
នៅក្នុងជំនួបនោះដែរ លោក ណុង រ៉ុង (NONG RONG) ឧបការីរដ្ឋមន្រ្តីការបរទេសចិន បានលើកឡើងថា អាជ្ញាធរខេត្តព្រះសីហនុ បានធ្វើឱ្យកិច្ចសហប្រតិបត្តិការចិន កម្ពុជាកាន់តែស៊ីជម្រៅថែមទៀត ខណៈដែលខេត្តនេះមានការរីកចម្រើនរស់រវើក នៅគ្រាដែលមេដឹកនាំប្រទេសទាំង២មានកុងសង់ស៊ីសសំខាន់ៗជាច្រើន។
លោកបន្តថា កាលពីខែកុម្ភៈ លោកនាយករដ្ឋមន្ត្រី ហ៊ុន សែន បានបំពេញទស្សនកិច្ចផ្លូវការទៅកាន់ប្រទេសចិន បានជួបពិភាក្សាជាមួយនឹងប្រធានាធិបតីចិន លោក ស៊ី ជីនភីង ដោយប្រទេសទាំង២កសាងក្របខ័ណ្ឌត្បូងពេជ្រ ចំនួន៦វិស័យ ផ្តោតសំខាន់លើការអភិវឌ្ឍខេត្តព្រះសីហនុ ដើរតួនាទីយ៉ាងសំខាន់ជំរុញកិច្ចសហប្រតិបត្តិការរវាងចិន កម្ពុជា ។
លោកណុង រ៉ុង គូសបញ្ជាក់ដូច្នេះថា៖ «សមិទ្ធផលរបស់ខេត្តព្រះសីហនុ សរបញ្ជាក់ពីកិច្ចសហប្រតិបត្តិការចិន កម្ពុជារីកចម្រើនក្នុងពេលអនាគត។ ខ្ញុំដឹងថា សម្តេចនាយករដ្ឋមន្ត្រីមកទស្សនាខេត្តព្រះសីហនុជាច្រើនដង បានចូលរួមក្នុងពិធីសម្ពោធគម្រោងជាច្រើនរបស់វិនិយោគចិននៅកម្ពុជា ខ្ញុំរីករាយ។ នៅខែឧសភា ឆ្នាំ២០២៣ខាងមុខ សម្តេចតេជោ នឹងមកខេត្តព្រះសីហនុម្តងទៀត ដើម្បីចូលរួមសម្ពោធក្រុមហ៊ុនធំរបស់ចិនវិនិយោគនៅកម្ពុជា»។
លោកបន្តថា ៖ «ខេត្តព្រះសីហនុ មានកំពង់ផែទឹកជ្រៅ ព្រលានយន្តហោះ មានផ្លូវល្បឿនលឿន ផ្តល់ឱកាសកាន់តែច្រើនសម្រាប់ការអភិវឌ្ឍសេដ្ឋកិច្ច ឧស្សាហកម្មរបស់ខេត្តព្រះសីហនុ»។
បើតាម លោក ណុង រ៉ុង នៅក្នុងអំឡុងពេលទស្សនកិច្ចនៅក្នុងខេត្តព្រះសីហនុ លោកនិងគណៈប្រតិភូ បានទៅទស្សនកិច្ចនៅក្រុមហ៊ុនវិនិយោគចិនក្នុងតំបន់សេដ្ឋកិច្ចក្រុងព្រះសីហនុ រោងចក្រផលិតសម្លៀកបំពាក់ដោយសង្កេតឃើញថា ដោយមានការគាំទ្រពីអភិបាលខេត្ត ដំណើរការវិនិយោគនៅទីនោះប្រព្រឹត្តទៅដោយរលូន។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ឱ្យដឹងនៅថ្ងៃទី២៣ ខែមេសាថា ទំនាក់ទំនងចិន និងកម្ពុជា កាន់តែមានភាពប្រសើរឡើងពី១ថ្ងៃទៅ១ថ្ងៃ ហើយថ្មីៗនេះ សភាពាណិជ្ជកម្មក៏បានស្វាគមន៍ចំពោះដំណើរទស្សនកិច្ចមកកាន់កម្ពុជារបស់គណៈប្រតិភូចិនខេត្តក្វាងស៊ី និងបានលើកឡើងពីទំនាក់ទំនងដ៏ល្អរវាងប្រទេសចិននិងកម្ពុជា ដែលជាកត្តាអំណោយផលដល់ការធ្វើពាណិជ្ជកម្មនិងវិនិយោគទៅវិញទៅមក។
លោកបន្ថែមថា កាលានុវត្តភាពថ្មីៗដែលវិនិយោគិនចិន អាចបណ្តាក់ទុនវិនិយោគ និងប្រើប្រាស់យន្តការដែលមានស្រាប់រួមមានដូចជា កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ គំនិតផ្តួចផ្តើមខ្សែក្រវាត់និងផ្លូវ និងកិច្ចសហប្រតិបត្តិការមេគង្គ-ឡានឆាង ជាដើម។
លោក លឹម ហេង មានប្រសាសន៍ដូច្នេះថា ៖ «ខេត្តព្រះសីហនុ ទទួលបានការចាប់អារម្មណ៍ច្រើនពីវិនិយោគិនចិន។ ថ្នាក់ដឹកនាំរដ្ឋ និងរដ្ឋ បានជួយសម្រួលច្រើនហើយ ដោយឡែកសម្រាប់សភាពាណិជ្ជកម្មកម្ពុជា គឺជាស្ថាប័នតំណាងវិស័យឯកជន និងជាដៃគូរបស់រាជរដ្ឋាភិបាល ក្នុងការជួយដោះស្រាយបញ្ហាប្រឈមរបស់វិស័យឯកជន និងជួយជំរុញដល់សកម្មភាពធុរកិច្ចនិងវិនិយោគ។ ខ្ញុំបានស្នើធុរជនចិន ប្រសិនបើជួបបញ្ហាប្រឈម ឬចង់បានដៃគូវិនិយោគពិតប្រាកដ សូមទាក់ទងមកសភាពាណិជ្ជកម្មកម្ពុជា ដើម្បីជួយសម្របសម្រួល»។
សូមជម្រាបថា នៅខេត្តព្រះសីហនុ មានរោងចក្រអគ្គិសនីធ្យូងថ្ម ដែលវិនិយោគដោយក្រុមហ៊ុនចិនផងដែរដែលផលិតអគ្គិសនីបានច្រើន ក្នុងអត្រា៤០ភាគរយ នៃអគ្គិសនីទាំងមូល របស់ប្រទេសកម្ពុជា និងបានប្រើប្រាស់បច្ចេកទេសខ្ពស់ក្នុងការការពារបរិស្ថាន៕
