លោកហ៊ុន សែន នៅក្នុងពិធីចែកសញ្ញាបត្រដល់និស្សិតនៅថ្ងៃទី២៥ មេសា ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា ពេលមានការសាងសង់សាលារៀន និងអគារសិក្សាណាមួយ ចាំបាច់ត្រូវគិតលើការកសាងអគារស្នាក់នៅឬផ្ទះសម្រាប់គ្រូបង្រៀនក្នុងពេលដំណាលគ្នា ខណៈលោកក៏បានអំពាវនាវដល់សប្បុរសជន និងអភិបាលខេត្តនានាឱ្យយកចិត្តក្នុងការកសាងកន្លែងស្នាក់នេះផងដែរ ដើម្បីទាក់ទាញគ្រូពូកែមកកាន់សាលា និងខេត្តរបស់ខ្លួន។
ការលើកឡើងរបស់លោកនាយករដ្ឋមន្ត្រីបែបនេះធ្វើឡើងនៅក្នុងពិធីចែកសញ្ញាបត្រជូនដល់គរុសិស្ស និស្សិត និងបុគ្គលិកអប់រំប្រមាណជាង២ពាន់នាក់នៅវិទ្យាស្ថានជាតិអប់រំ (NIE) កាលថ្ងៃទី២៥ ខែមេសា ឆ្នាំ២០២៣។
លោកនាយករដ្ឋមន្ត្រីហ៊ុន សែន បានថ្លែងថា បច្ចុប្បន្នប្រព័ន្ធបណ្ដុះបណ្ដាលគ្រូ គឺរាជរដ្ឋាភិបាលបានដាក់ចេញទាំងថ្នាក់ជាតិ និងថ្នាក់ក្រោមជាតិ ដើម្បីប្រសិទ្ធភាពនៃការបណ្តុះបណ្តាល។
ទន្ទឹមគ្នានេះលោកក៏ជំរុញឱ្យមានការវិនិយោគ និងយកចិត្តទុកដាក់លើការកសាងអគារសិក្សា និងកន្លែងស្នាក់នៅឬផ្ទះគ្រូរបស់គ្រូបង្រៀនបន្ថែមផងដែរ ស្របពេលដែលកន្លែងស្នាក់នៅរបស់គ្រូបង្រៀននៅតែមានបញ្ហាប្រឈមនៅឡើយ។
លោកហ៊ុន សែន មានប្រសាសន៍ថា៖ «ខ្ញុំសូមអំពាវនាវដល់អ្នកដែលជួយកសាងសាលា សូមឱ្យជួយយកចិត្តទុកដាក់ដល់ការកសាងផ្ទះគ្រូបង្រៀននៅតាមសាលានានាឱ្យបានច្រើន តាមដែលអាចធ្វើបាន ព្រោះយើងបានឃើញពិតប្រាកដ ច្រើនកន្លែងណាស់ ឃើញថាគ្រូបង្រៀនរបស់យើង ទៅពីឆ្ងាយ ត្រូវការជួលផ្ទះ ហើយបើខ្ញុំបានស្តាប់គ្រូបង្រៀនម្នាក់នៅកំពង់ស្ពឺ ឃើញថា ពេលខ្លះគ្រូបង្រៀនរបស់យើងយកកូនមកយោលអង្រឹងក្រោមដើមឈើក៏មាន អ៊ីចឹងចាំបាច់ណាស់ត្រូវគិតគូរលើការកសាងផ្ទះគ្រូបង្រៀន ដើម្បីឱ្យគ្រូរបស់យើងមានកន្លែងស្នាក់នៅ»។
ជាមួយគ្នានេះលោកក៏បានបញ្ជាក់ដែរថា៖«បើខេត្ត និងស្រុក ឬឃុំណាដែលឆ្លាត គឺត្រូវប្រឹងប្រែងធ្វើចំណុចនេះហើយបើចង់បានគ្រូបង្រៀនល្អនៅកន្លែងរបស់ខ្លួន គឺត្រូវតែមានផ្ទះឱ្យគ្រូស្នាក់នៅ អាហ្នឹងប្រាកដជាទាញបានគ្រូបង្រៀនដែលពូកែ និងល្អជាមិនខាន»។
ពាក់ព័ន្ធនឹងការលើកឡើងរបស់លោកនាយករដ្ឋមន្ត្រី លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា បានបង្ហាញការគាំទ្រចំពោះគំនិត និងអនុសាសន៍នេះ។
លោកបានថ្លែងថា៖ «ការធ្វើបែបនេះ មិនត្រឹមតែអាចទាក់ទាញគ្រូបង្រៀនដែលមានសមត្ថភាពប៉ុណ្ណោះទេ ថែមទាំងអាចជួយឱ្យលោកគ្រូ អ្នកគ្រូ មានកន្លែងសម្រាប់សម្រាក និងសិក្សាស្រាវជ្រាវ ដើម្បីពង្រឹងការងារបង្រៀនរបស់ខ្លួនឱ្យកាន់តែខ្លាំងថែមទៀត»។
យោងតាមរបាយការណ៍របស់អង្គការយូណេស្កូ(UNESCO)កាលពីកន្លងទៅ ធ្លាប់បានបង្ហាញដែរថា កង្វះខាតកន្លែងស្នាក់នៅសម្រាប់គ្រូបង្រៀនក៏ជាមូលហេតុសំខាន់មួយដែលធ្វើឱ្យមានការខ្វះខាតគ្រូបង្រៀននៅតាមបឋមសិក្សា ពិសេសនៅតំបន់ដាច់ស្រយាលនៅកម្ពុជាបើទោះបីជាក្រសួងអប់រំត្រូវការចំនួនគ្រូបង្រៀនច្រើនក៏ដោយ។
UNESCOបានបញ្ជាក់ថា ចំណុចនេះ ក៏ធ្វើឱ្យគ្រូបង្រៀនមួយចំនួនធំមិនព្រមទៅបង្រៀននៅតំបន់ដាច់ស្រយាលដែលជាហេតុធ្វើឱ្យការអប់រំនៅតាមតំបន់ជនបទនៅមានកម្រិតអន់ថយ។
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន ធ្លាប់បានបង្ហាញនៅក្នុងទិវាគ្រូបង្រៀនកាលពីថ្ងៃទី៥ ខែតុលា ឆ្នាំ២០២២ថា ក្រសួងបាននិងបន្តលើកកម្ពស់គុណភាព និងជីវភាពគ្រូបង្រៀន ដោយបន្តដំឡើងប្រាក់ខែជូនគ្រូបង្រៀនព្រមទាំងខិតខំដោះស្រាយបញ្ហាប្រឈមរបស់គ្រូបង្រៀនតាមលទ្ធភាពរបស់រាជរដ្ឋាភិបាល សំដៅលើកកម្ពស់គ្រូបង្រៀន លើកកម្ពស់ការបង្រៀន និងវិជ្ជាជីវៈគ្រូបង្រៀន ដើម្បីឈានទៅសម្រេចអនាគតដ៏ប្រសើររបស់កុមារ និងយុវជនកម្ពុជា៕
