បឹងធំ១នៅក្នុងខេត្តកំពង់ធំ ជិតគោករីង ដែលក៏ជាផ្នែក១នៃការប្រែប្រួលអាកាសធាតុផងដែរ។ ហេង ជីវ័ន
ភ្នំពេញៈ នាពេលដ៏ខ្លីខាងមុខនេះ កម្ពុជា និងចក្រភពអង់គ្លេស នឹងពង្រីកកិច្ចសហការរួមគ្នាលើការបណ្តុះបណ្តាលធនធានមនុស្ស ដើម្បីដោះស្រាយការប្រែប្រួលអាកាសធាតុ ខណៈបច្ចុប្បន្នភាគីទាំង ២ កំពុងជួបពិភាក្សាការងាររួមគ្នា សំដៅពន្លឿនលើកិច្ចសហការនេះ។
គម្រោងនៃការពង្រីកកិច្ចសហការនេះ ត្រូវបានលើកឡើងតាមរយៈជំនួប រវាងលោក អ៊ាង សុផល្លែត រដ្ឋលេខាធិការក្រសួងបរិស្ថាន ជាមួយនឹងលោក JIM SKEA បេក្ខជននៃចក្រភពអង់គ្លេស ឈរឈ្មោះបោះឆ្នោតជ្រើសរើសប្រធានក្រុមការងារអន្តររដ្ឋាភិបាល ស្តីពីការប្រែប្រួលអាកាសធាតុ (IPCC) នាទីស្តីការក្រសួងបរិស្ថាន កាលពីថ្ងៃទី១ ខែឧសភា ឆ្នាំ២០២៣។
យោងតាមក្រសួងបរិស្ថាន នាឱកាសនោះ លោក អ៊ាង សុផល្លែត បានលើកឡើងថា កម្ពុជាបានកំណត់គោលដៅច្បាស់លាស់ សម្រាប់អព្យាក្រឹតភាពកាបូននៅឆ្នាំ២០៥០ ដោយបានដាក់ចេញនូវយុទ្ធសាស្ត្រអភិវឌ្ឍន៍រយ:ពេលវែងប្រកបដោយអព្យាក្រឹតកាបូន និងរបាយការណ៍បច្ចុប្បន្នភាពស្តីពីការចូលរួមចំណែករបស់អន្តរជាតិក្នុងការអនុវត្តអនុសញ្ញាក្របខ័ណ្ឌសហប្រជាជាតិស្តីការប្រែប្រួលអាកាសធាតុ។
លោកបានថ្លែងថា ៖ «ប្រការនេះ គឺបានបញ្ជាក់អំពីសក្ខីភាពមួយ ដែលកម្ពុជាបានប្តេជ្ញាចិត្តដ៏រឹងមាំ និងមានឆន្ទៈនយោបាយខ្ពស់ ក្នុងការដោះស្រាយការប្រែប្រួលអាកាសធាតុ»។
ក្នុងការដោះស្រាយការប្រែប្រួលអាកាសធាតុនេះ លោក អ៊ាង សុផល្លែត បានបញ្ជាក់បន្តថា៖«យើងមានគំនិតផ្តួចផ្តើមលើកិច្ចសហការបណ្តុះបណ្តាលធនធានមនុស្សតាមរយ:ការផ្តល់ឱកាសចូលបម្រើការងារ និងធ្វើកម្មសិក្សានៅក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ(IPCC)ដល់មន្ត្រីរាជការវ័យក្មេង និងយុវជនកម្ពុជា»។
លោកបានបន្ថែមថា នាថ្ងៃអនាគត យុវជនកម្ពុជា អាចនឹងក្លាយជាអ្នកដឹកនាំប្រទេស ពិសេសស្របតាមការប្តេជ្ញាចិត្តរបស់កម្ពុជា ក្នុងការចូលរួមចំណែកយ៉ាងសកម្ម ជាមួយសហគមន៍អន្តរជាតិ ក្នុងការដោះស្រាយបញ្ហាប្រឈមនានាដែលបណ្តាលមកពីការប្រែប្រួលអាកាសធាតុ។
ជាមួយគ្នានេះ លោក អ៊ាង សុផល្លែត ក៏បានស្នើសុំទៅ IPCC ជួយចែករំលែកនូវរបកគំហើញថ្មីៗពីការស្រាវជ្រាវរបស់ខ្លួនដល់កម្ពុជាផងដែរ។
នាឱកាសនោះ លោកសាស្រ្តាចារ្យ JIM SKEA ក៏បានថ្លែងអំណរគុណនិងកោតសរសើរចំពោះកិច្ចខិតខំប្រឹងប្រែងរបស់កម្ពុជា ក្នុងការដោះស្រាយបញ្ហាប្រែប្រួលអាកាសធាតុ និងការលើកកម្ពស់ការគ្រប់គ្រងបរិស្ថាន បានល្អប្រសើរ។
ទន្ទឹមគ្នានេះ លោកសាស្រ្តាចារ្យអង់គ្លេសរូបនេះក៏បានគាំទ្រពីការពង្រឹងនិងពង្រីកកិច្ចសហប្រតិបត្តិការរវាង IPCC និងរាជរដ្ឋាភិបាលកម្ពុជា ពិសេស លើគំនិតផ្តួចផ្តើមលើការបណ្តុះណ្តាលធនធានមនុស្ស ដើម្បីពង្រឹងការឆ្លើយតបនឹងការប្រែប្រួលអាកាសធាតុ។
សូមរំឭកដែរថា ប្រទេសកម្ពុជា បានបង្ហាញពីការប្តេជ្ញាចិត្ត និងតម្រូវការសម្រាប់ទសវត្សរ៍បន្ទាប់ ដើម្បីធ្វើឱ្យសម្រេចបាននូវចក្ខុវិស័យនៃសង្គម១ ដែលមានការបញ្ចេញកាបូនតិច មានភាពធន់ទៅនឹងការប្រែប្រួលអាកាសធាតុ និងការអភិវឌ្ឍប្រកបដោយចីរភាព។
កាលពីចុងឆ្នាំ២០២១កន្លងទៅ ក្រសួងបរិស្ថាន បានប្រកាសដាក់ឱ្យប្រើប្រាស់ យុទ្ធសាស្ត្រអភិវឌ្ឍន៍រយៈពេលវែង ប្រកបដោយអព្យាក្រឹតកាបូន ដែលលោក សាយ សំអាល់ រដ្ឋមន្រ្តីក្រសួងបរិស្ថាន ធ្លាប់បានថ្លែងថា កម្ពុជាជាប្រទេសអភិវឌ្ឍន៍តិចតួចទី២ ក្នុងពិភពលោក និងជាប្រទេសទី២ ក្នុងតំបន់អាស៊ាន ដែលបានដាក់ចេញនូវយុទ្ធសាស្ត្រនេះ ជាមួយនឹងគោលដៅឆ្នាំ២០៥០ សម្រាប់ការបញ្ចេញឧស្ម័នស្មើសូន្យ។
យ៉ាងណាក្តី តាមរយៈជំនួបពិភាក្សាការងាររវាងក្រសួងបរិស្ថាន និងក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (IPCC)នេះរួចមក ភាគីទាំង២ក៏បានប្តេជ្ញានឹងសហការគ្នា លើការបណ្តុះបណ្តាលធនធានមនុស្ស ដើម្បីឆ្លើយតបនឹងការប្រែប្រួលអាកាសធាតុ ដែលជាបញ្ហាសកល ដើម្បីអភិវឌ្ឍប្រទេសឆ្ពោះទៅរកភាពបៃតង ភាពធន់ និងប្រកបដោយចីរភាព៕
