លោកឌិត ទីណា (ឆ្វេង) និងលោកជា វ៉ាន់ដេត ក្នុងពិធីចុះ MoU។ ហុង មិនា
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា និងរដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត នៅថ្ងៃទី ២ ខែឧសភា បានចុះអនុស្សរណៈយោគយល់គ្នា សម្រាប់ការគាំទ្រការ ដាក់ដំណើរការថ្នាលផ្ទៀងផ្ទាត់ឯកសារ verify.gov.kh ដែលអភិវឌ្ឍដោយក្រសួងប្រៃសណីយ៍ និងទូរគមនាគមន៍នៅក្របខ័ណ្ឌក្រសួងកសិកម្ម។
ការចុះអនុស្សរណៈក្រោមវត្តមាននៃថ្នាក់ដឹកនាំ និងមន្ត្រីជំនាញនៃក្រសួងទាំង ២ ប្រមាណ ២៥០ រូបបានក្លាយជាព្រឹត្តិការណ៍ដ៏សំខាន់ សម្រាប់ដំណើរការនៃការធ្វើទំនើបកម្មក្នុងវិស័យកសិកម្ម ដែលលោក ឌិត ទីណា បានលើកឡើងថា ថ្នាលផ្ទៀងផ្ទាត់ឯកសារ verify.gov.kh ដោយគ្រាន់តែស្កេន «ឃ្យួ.អ.កូដ ស្តង់ដា» ដែលមានភាពងាយស្រួល កាន់តែទំនើប និងកាន់តែរហ័ស។
លោករដ្ឋមន្ត្រីកសិកម្មបញ្ជាក់ថា តាមរយៈខ្លឹមសារនៃអនុស្យរណៈដ៏សំខាន់នេះ ក្រសួងប្រៃសណីយ៍នឹងជំរុញការតភ្ជាប់អីុនធឺណិតទៅគ្រប់ការិយាល័យចំណុះក្រសួងកសិកម្ម រុក្ខាប្រមាញ់ និងនេសាទ ក្នុងពេលខាងមុខ ឱ្យមានល្បឿនលឿន ងាយស្រួលដល់ការបំពេញកិច្ចការ និងមានប្រសិទ្ធភាព។
លោកមានប្រសាសន៍ថា៖ «ខ្លឹមសារនៃអនុស្សរណៈយោគយល់គ្នានេះ ផ្តើមចេញពីការជជែកសហការ រវាងឯកឧត្តម ជា វ៉ាន់ដេត ក្នុងការពិនិត្យលទ្ធភាពធ្វើទំនើបកម្ម ក្នុងក្រសួងកសិកម្ម រុក្ខាប្រមាញ់ និងនេសាទយើង។ ចំណុចសំខាន់មួយ គឺការផ្តល់នូវលទ្ធភាពក្នុងការរៀបចំជា ឃ្យូ.អ.កូដ (QR Code) ដើម្បីផ្ទៀងផ្ទាត់ទៅលើឯកសារមួយចំនួន ដើម្បីធានានូវការបន្លំឯកសារ ជាដើម»។
ឆ្លើយតបសំណួររបស់អ្នកសារព័ត៌មានក្នុងពេលសន្និសីទសារព័ត៌មាន លោកឌិត ទីណា បានលើកឡើងថា ប្រជាជនកម្ពុជាកាន់តែច្រើន មានលទ្ធភាពប្រើប្រាស់បច្ចេកវិទ្យាទំនើប ទោះក្នុងកម្រិតណាក៏ដោយ ប៉ុន្តែអ្នកប្រើប្រាស់ជាពិសេសកសិករ អាចមានលទ្ធភាពស្វែងយល់ពីការធ្វើទំនើបកម្មក្នុងការងារកសិកម្មរបស់ខ្លួន។
លោកបន្តថា តាមរយៈការអភិវឌ្ឍបច្ចេកវិទ្យាក្រសួងកសិកម្ម នឹងរៀបចំកសិកម្មផ្សាភ្ជាប់ឌីជីថល ដោយផ្សារភ្ជាប់ការងារកសិកម្មតាំងពីកសិកររហូតដល់អ្នកនាំចេញ ប្រកបដោយព័ត៌មានច្បាស់លាស់ និងកាត់បន្ថយបាននូវផ្នែកដែលមិនចាំបាច់ណាមួយ ក្នុងដំណើរការបញ្ចេញផលិតផលទៅកាន់ទីផ្សារ។ លោកបានគូសបញ្ជាក់ថា៖ «ក្នុងការរៀបចំប្រព័ន្ធឌីជីថលនេះ នឹងជួយសម្រួលយ៉ាងច្រើនដល់ប្រជាកសិកររបស់យើងនៅពេលខាងមុខ ក្នុងការប្រើប្រាស់ប្រព័ន្ធបច្ចេកវិទ្យា ដើម្បីឱ្យគាត់ដឹងព័ត៌មានពីទីផ្សារច្បាស់លាស់»។
ជាមួយគ្នានេះ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ ក៏បានថ្លែងដែរថា កម្ពុជាជាប្រទេសទី ២ បន្ទាប់ពីប្រទេសសិង្ហបុរី ដែលដាក់ឱ្យដំណើរការ ប្រព័ន្ធផ្ទៀងផ្ទាត់ឯកសារ ដោយប្រើបច្ចេកវិទ្យាប្លុកឆេន ដែលជាសំណុំប្រតិបត្តិការជាប្លុក តភ្ជាប់គ្នាពីមួយទៅមួយដោយសុវត្ថិភាព តាមរយៈការប្រើលេខសម្គាល់សម្ងាត់ និងកំណត់ត្រាពេលវេលានៃប្រតិបត្តិការដែលមិនអាចកែបាន និងត្រូវបានចែករំលែក នៅក្នុងបណ្តាញពាក់ព័ន្ធ។
លោករដ្ឋមន្ត្រីក្រសួងប្រៃសណីយ៍ ក៏បានសន្យាជួយលើកកម្ពស់ផលិតផលកសិកម្មកម្ពុជាតាមរយៈការគាំទ្រដល់ការបង្កើតផ្សារបែបប្រពៃណី និងការបង្កើតផ្សារលើថ្នាល់បច្ចេកវិទ្យា។ លោកបញ្ជាក់ថា មន្ត្រីជំនាញនៃក្រសួងទាំង ២ នឹងចាប់ផ្តើមធ្វើការងារជាមួយគ្នា ហើយនៅក្នុងរយៈពេល ១ ទៅ២ ខែខាងមុខ នឹងអាចដាក់ដំណើរការថ្នាលផ្ទៀងផ្ទាត់ឯកសារនេះ។
សេចក្តីប្រកាសព័ត៌មានក្រសួងប្រៃសណីយ៍នាថ្ងៃទី ២ ខែឧសភា បញ្ជាក់ថា ក្រសួងប្រៃសណីយ៍នឹងផ្តល់ការគាំទ្រដល់ក្រសួងកសិកម្មលើការដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh សម្រាប់ផ្ទៀងផ្ទាត់ឯកសារ ការរៀបចំប្រព័ន្ធបច្ចេកវិទ្យាឌីជីថល និងការរៀបចំហេដ្ឋារចនាសម្ព័ន្ធនិងតភ្ជាប់អ៊ីនធឺណិតនៅក្នុងក្រសួងកសិកម្ម ព្រមទាំងការសហការរៀបចំថ្នាលបច្ចេកវិទ្យាឌីជីថលដើម្បីចូលរួមអភិវឌ្ឍវិស័យកសិកម្ម។ ការផ្ទៀងផ្ទាត់ឯកសារនៅលើថ្នាល verify.gov.kh ត្រូវធ្វើឡើងតាមរយៈការដាក់បញ្ចូល QR Code ស្តង់ដា ដោយប្រើបច្ចេកវិទ្យាប្លុកឆេន (Blockchain) ដែលមានសុវត្ថិភាពខ្ពស់នៅលើសន្លឹកនៃឯកសារនីមួយៗ។ ការប្រើឯកសារដែលមានដាក់បញ្ចូល QR Code ស្តង់ដានេះមិនតម្រូវឱ្យមានការធ្វើនីត្យានុកូលកម្មលើឯកសារថតចម្លងក្នុងទម្រង់ជាក្រដាសឡើយ។
រាជរដ្ឋាភិបាលកាលពីថ្ងៃទី ៣ ខែមីនាឆ្នាំនេះ បានចេញអនុក្រឹត្យ ដោយដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh របស់រាជរដ្ឋាភិបាល ដែលអភិវឌ្ឍដោយក្រសួងប្រៃសណីយ៍ក្នុងគោលបំណងលុបបំបាត់ការក្លែងបន្លំឯកសារ ផ្តល់ភាពងាយស្រួលក្នុងការប្រើប្រាស់ និងផ្ទៀងផ្ទាត់ភាពត្រឹមត្រូវនៃឯកសារ ផ្តល់ទំនុកចិត្ត ចំណេញពេលវេលា និងកាត់បន្ថយការចំណាយនានា ព្រមទាំងជំរុញ ការធ្វើបរិវត្តកម្មឌីជីថលសេវាសាធារណៈ៕
