ថ្នាក់ដឹកនាំគណៈកម្មាធិការជាតិគ្រប់គ្រងគ្រោះមហន្តរាយ កម្ពុជា បានចុះហត្ថលេខាលើអនុស្សរណៈយោគយល់ (MoU) ជាមួយនឹងសាជីវកម្មបរិស្ថានកូរ៉េ បណ្តាញទឹកកូរ៉េ (KWCC ) ពីថ្ងៃទី២ឧសភា។ រូបថត NCDM
ភ្នំពេញៈ គណៈកម្មាធិការជាតិគ្រប់គ្រងគ្រោះមហន្តរាយកម្ពុជា (NCDM) បានចុះហត្ថលេខាលើអនុស្សរណៈយោគយល់ (MoU) ជាមួយនឹងសាជីវកម្មបរិស្ថានកូរ៉េ បណ្តាញទឹកកូរ៉េ (KWCC ) ដើម្បីអភិវឌ្ឍទឹកស្អាតសម្រាប់ប្រជាពលរដ្ឋប្រើប្រាស់នៅក្នុងតំបន់ដាច់ស្រយាល ដែលងាយរងគ្រោះដោយគ្រោះមហន្តរាយនៅកម្ពុជា។
ពិធីចុះហត្ថលេខានេះ ធ្វើឡើងកាលពីទី ២ ខែឧសភា ឆ្នាំ ២០២៣ ដោយលោក គីម វីរៈ អគ្គលេខាធិការគណៈកម្មាធិការជាតិគ្រប់គ្រងគ្រោះមហន្តរាយ និងជានាយកកម្មវិធីជាតិ ជាមួយនឹងលោក Park Seok-Hun ប្រធានគណៈប្រតិភូសាជីវកម្មបរិស្ថាន បណ្តាញទឹកកូរ៉េ (KWCC )។
លោក សុទ្ធ គឹមកុលមុន្នី អ្នកនាំពាក្យនៃគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់ឱ្យដឹងនៅថ្ងៃទី៣ ខែឧសភា ថា គម្រោងមនុស្សធម៌ដែលត្រូវបានចុះហត្ថលេខានេះ ដើម្បីជួយអភិវឌ្ឍទឹកស្អាតជូនដល់ប្រជាពលរដ្ឋដែលរស់នៅក្នុងទីតាំងដាច់ស្រយាល និងងាយរងគ្រោះ បង្កឡើងដោយគ្រោះមហន្តរាយនានា។
លោកបានបន្តថា គម្រោងនេះ នឹងត្រូវអនុវត្តសាកល្បងជាដំបូងនៅក្នុងភូមិអតីតយុទ្ធជនស្ថិតនៅក្នុងខេត្តពោធិ៍សាត់ដែលមានចំនួន អតីតយុទ្ធជនជាង ៦០០ គ្រួសារ និងបន្តទៀតនឹងត្រូវពង្រីកនៅទូទាំងប្រទេស ប៉ុន្តែផ្តោតសំខាន់តែទៅលើតំបន់ដាច់ស្រាយាលណាដែលជួបគ្រោះមហន្តរាយផ្សេងៗធ្វើឱ្យខ្វះខាតទឹកប្រើប្រាស់ប៉ុណ្ណោះ។
លោកសុទ្ធ គឹមកុលមុន្នី បានថ្លែងថា៖ «គម្រោងនេះ មិនគិតកម្រៃទេព្រោះវាជាគម្រោងមនុស្សធម៌ មានន័យថា យើងផលិតទឹកស្អាតជូនប្រជាពលរដ្ឋ ដែលងាយរងគ្រោះពីគ្រោះមហន្តរាយ ប្រើប្រាស់ដោយមិនគិតថ្លៃទេ»។
បើតាមទូរទស្សន៍ជាតិ លោក គីម វីរៈ បានលើកឡើងនាពិធីចុះអនុស្សរណៈនៃការយោគយល់គ្នានោះថា ដោយសារកត្តាច្បាស់លាស់នៃការប្រែប្រួលអាកាសធាតុនៅកម្ពុជា វិស័យទឹក កំពុងរងផលប៉ះពាល់ ហើយសហគមន៍បានជួបប្រទះការខ្វះខាតទឹកសម្រាប់កសិកម្ម និងការប្រើប្រាស់ប្រចាំថ្ងៃរបស់ពួកគេផងដែរ។
លោកបន្តថា ការចុះហត្ថលេខាលើអនុស្សរណៈយោគយល់គ្នា នៅពេលនេះសម្រាប់កិច្ចសហប្រតិបត្តិការរវាង NCDM និង KWCC គឺជាចំណុចសំខាន់នៃអាទិភាពកំពូលលើវិស័យទឹក មិនត្រឹមតែសម្រាប់ការប្រើប្រាស់ប្រចាំថ្ងៃធម្មតាសម្រាប់អ្នកទទួលផលប៉ុណ្ណោះទេ ប៉ុន្តែថែមទាំងគិតគូរក្នុងបរិបទនៃការបង្កើនភាពអាសន្នផងដែរ។
លោកមានប្រសាសន៍ ៖ «គ្រោះមហន្តរាយដែលបានពន្លឿនដោយការប្រែប្រួលអាកាសធាតុ ទឹកស្អាតមានសារៈសំខាន់ខ្លាំងណាស់សម្រាប់ការជួយសង្គ្រោះជីវិតមនុស្ស និងកាត់បន្ថយការរងទុក្ខវេទនាក្នុងអំឡុងពេលមានអាសន្នណាមួយ»។
លោក គីម វីរៈ បានបន្តថា ៖ «ជាមួយនឹងគម្រោងសាកល្បងដំបូងនេះ យើងមានជំនឿយ៉ាងមុតមាំថា យើងទាំងអស់គ្នានឹងដាក់ដៃទាំងអស់គ្នាដើម្បីធ្វើឱ្យវាក្លាយជាគម្រោងជោគជ័យដែលយើងទាំងអស់គ្នាជឿថា នឹងនាំទៅរកគំនិតផ្តួចផ្តើម និងគម្រោងផ្សេងៗទៀតនាពេលខាងមុខ»៕
