គម្រោង USAID ព្រៃឡង់បៃតង ធ្វើទស្សនកិច្ចស្វែងយល់ពីសក្ដានុពល និងកែលម្អការគ្រប់គ្រងតំបន់អេកូទេសចរណ៍បឹងលំកុដ។ រូបថត USAID Morodok Baitang-មរតកបៃតង
ព្រះវិហារៈ គម្រោង USAID មរតកបៃតង បានសហការជាមួយ គម្រោង USAID ព្រៃឡង់បៃតងរៀបចំដំណើរទស្សនកិច្ចសម្រាប់សមាជិកគណៈកម្មការចំនួន ៦ រូបមកពីខេត្តរតនគិរី ទៅទស្សនា និងជួបជាមួយសមាជិកគណៈកម្មការអេកូទេសចរណ៍នៅទីតាំងចំនួន ២ ក្នុងខេត្តព្រះវិហារដើម្បីស្វែងយល់ពីសក្ដានុពល និងកែលម្អការគ្រប់គ្រងតំបន់អេកូទេសចរណ៍បឹងលំកុដ។
តាមការផ្សាយលើហ្វេសប៊ុក USAID មរតកបៃតងបានឱ្យដឹងថា អេកូទេសចរណ៍បឹងលំកុដត្រូវបានកំណត់ជាខ្សែច្រវាក់តម្លៃសក្តានុពលមួយសម្រាប់អន្តរាគមន៍របស់ USAID មរតកបៃតង បន្ថែមលើការអភិវឌ្ឍគម្រោងរេដបូកនៅក្នុងដែនជម្រកសត្វព្រៃលំផាត់ក្នុងខេត្តរតនគិរី។
ដើម្បីស្វែងយល់ពីសក្ដានុពល និងកែលម្អការគ្រប់គ្រងតំបន់អេកូទេសចរណ៍បឹងលំកុដ USAID មរតកបៃតង បានសហការជាមួយ គម្រោង USAID ព្រៃឡង់បៃតង ដើម្បីរៀបចំដំណើរទស្សនកិច្ចសម្រាប់សមាជិកគណៈកម្មការចំនួន ៦ រូបមកពីខេត្តរតនគិរី ទៅទស្សនា និងជួបជាមួយសមាជិកគណៈកម្មការអេកូទេសចរណ៍នៅទីតាំងចំនួនពីរក្នុងខេត្តព្រះវិហារគឺ សហគមន៍តំបន់ការពារធម្មជាតិតាំងយូរ និងត្មាតប៉ើយធឿនក្រសាំង។
គណៈកម្មការទាំងពីរបានបង្កើនសមត្ថភាពគ្រប់គ្រងរបស់ខ្លួន និងកែលម្អការផ្សព្វផ្សាយតំបន់របស់ពួកគេបានយ៉ាងល្អ តាមរយៈការគាំទ្រពីគម្រោង USAID ព្រៃឡង់បៃតង។ ក្នុងដំណើរទស្សនកិច្ចរយៈពេលបីថ្ងៃ សិក្ខាកាមបានស្វែងយល់ពីវិធីសាស្ត្រអនុវត្តផែនការអាជីវកម្ម សិក្សាអំពីរបៀបគ្រប់គ្រងបុគ្គលិក និងពិភាក្សាអំពីបញ្ហាប្រឈមផ្នែកហិរញ្ញវត្ថុផ្សេងៗ៕
