លោក ហ៊ុន ម៉ាណែត និងលោកធាវ ឈីហ៊ាន (Teo Chee Hean) ក្នុងជំនួបកាលពីថ្ងៃទី៨ឧសភា។ រូបថត HMN
ភ្នំពេញៈលោក ហ៊ុន ម៉ាណែត បានធ្វើការវាយតម្លៃខ្ពស់ចំពោះការរីកចម្រើនកាន់តែប្រសើរនៃទំនាក់ទំនង និងកិច្ចសហប្រតិបត្តិការលើគ្រប់វិស័យ រវាងប្រទេសកម្ពុជា និងសិង្ហបុរី ដែលមានលក្ខណៈជិតស្និទ្ធ ស៊ីជម្រៅ និងប្រកបដោយទំនុកចិត្ត។
បើតាមផេច ហ្វេសប៊ុក Hun Manet. C.O. Army Office នៅថ្ងៃទី៨ ខែឧសភា ឆ្នាំ២០២៣ លោក ហ៊ុន ម៉ាណែត បានលើកឡើងដូចខាងលើនេះ ក្នុងពេលលោកទទួលជួបសំណេះសំណាលជាមួយលោកធាវ ឈីហ៊ាន (Teo Chee Hean)ទេសរដ្ឋមន្ត្រី និងជារដ្ឋមន្ត្រីទទួលបន្ទុកសម្របសម្រួលសន្តិសុខជាតិ នៃសាធារណរដ្ឋសិង្ហបុរី ដែលបានដឹកនាំគណៈប្រតិភូមកបំពេញទស្សនកិច្ច នៅកម្ពុជា និងដើម្បីចូលរួមទស្សនាព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣។
ក្នុងជំនួបនេះ លោក ហ៊ុន ម៉ាណែត ក៏បានរំឭកពីចំណងមិត្តភាពជិតស្និទ្ធ និងយូរអង្វែងរវាងកម្ពុជា-សិង្ហបុរី រាប់ពីការចាប់ផ្តើមនៃទំនាក់ទំនងការទូតដំបូងក្នុងឆ្នាំ១៩៦៥ ក្រោយពេលដែលសិង្ហបុរីក្លាយជារដ្ឋឯករាជ្យ ដែលនៅពេលនោះ កម្ពុជាស្ថិតនៅក្នុងចំណោមប្រទេសដំបូងបង្អស់ដែលបានទទួលស្គាល់ឯករាជ្យរបស់សិង្ហបុរី។
លោក ហ៊ុន ម៉ាណែត បានធ្វើការវាយតម្លៃខ្ពស់ចំពោះការរីកចម្រើនកាន់តែប្រសើរឡើងនៃទំនាក់ទំនងកិច្ចសហប្រតិបត្តិការលើគ្រប់វិស័យរវាងប្រទេសទាំង២ ដែលមានលក្ខណៈជិតស្និទ្ធ ស៊ីជម្រៅ និងប្រកបដោយទំនុកចិត្ត។
នាជំនួបនោះដែរ លោក ធាវ ឈីហ៊ាន បានសម្តែងនូវការពេញចិត្តចំពោះលទ្ធផលកិច្ចសហប្រតិបត្តិការទ្វេភាគី កម្ពុជា-សិង្ហបុរី ដែលកំពុងមានវឌ្ឍនភាពរីកចម្រើនទៅមុខគួរឱ្យកត់សម្គាល់ និងបានថ្លែងនូវការកោតសរសើរចំពោះជោគជ័យរបស់កម្ពុជាក្នុងការធ្វើជាម្ចាស់ផ្ទះរៀបចំព្រឹត្តិការណ៍ធំៗជាលក្ខណៈតំបន់ជាច្រើន ជាពិសេសភាពជាប្រធានអាស៊ានឆ្នាំ២០២២ និងព្រឹត្តិការណ៍កីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣។
សូមរំឭកផងដែរថា ក្នុងដំណើរទស្សនកិច្ចនេះដែរ លោកធាវ ឈីហាន ក៏ត្រូវចូលជួបសម្ដែងការគួរសម និងពិភាក្សាការងារ ជាមួយនឹងលោកនាយករដ្ឋមន្រ្តី ហ៊ុន សែន កាលពីថ្ងៃទី៨ ខែឧសភា ផងដែរ។
ក្នុងជំនួបនោះលោក ធាវ ឈីហ៊ាន ថា ដំណើរទស្សនកិច្ចរបស់លោកមកកម្ពុជានៅពេលនេះ ដើម្បីជំរុញទំនាក់ទំនងរវាងប្រទេសទាំង២ឱ្យឈានឡើងមួយជំហានទៀត៕
