ភ្នំពេញៈ កូនពូជសុនខអ្នកប្រយុទ្ធប្រឆាំងជាមួយសំណល់គ្រាប់យុទ្ធភណ្ឌមិនទាន់ផ្ទុះពីសង្គ្រាមសម្បុកថ្មីចំនួន ១០ ក្បាលទើបតែបានកើតនៅព្រឹកថ្ងៃទី ១១ ខែឧសភា ឆ្នាំ ២០២៣ នេះ។ នេះបើយោងតាមមជ្ឈមណ្ឌលសកម្មភាពកំចាត់មីនកម្ពុជា (CMAC)។
CMAC បានឱ្យដឹងថា កូនពូជសុនខអ្នកប្រយុទ្ធប្រឆាំងជាមួយសំណល់គ្រាប់យុទ្ធភណ្ឌមិនទាន់ផ្ទុះពីសង្គ្រាមដែលទើបកើតថ្មីទាំងនោះរួមមានញី ៣ ក្បាល និងឈ្មោល ៧ ក្បាល។ មេរបស់ពួកវាឈ្មោះ Lory ហើយបារបស់វាឈ្មោះថា Khav ដែលមេបានេះគឺជាពូជសុនខ មីឡាន័រ (Malinois) ដែលជាពូជជំនាន់ទី ៣។
CMAC បានបន្ថែមថា កូនសុនខទាំងអស់នោះនឹងត្រូវបង្វឹកដោយអ្នកជំនាញ ហើយត្រូវការចំណាយពេលហ្វឹកហ្វឺនតាំងពីកើតមករហូតដល់អាយុបានជាង ១ ឆ្នាំទើបអាចមានលទ្ធភាពក្នុងការប្រតិបត្តិការនៅទីវាលបាន។
លោកហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC ក៏បានប្រកាសអបអរសាទរសុនខសម្បុកថ្មីនេះនៅលើហ្វេសប៊ុករបស់លោកផងដែរ។
លោកបានសរសរថា៖ «អបអរសាទរមួយសម្បុកថ្មីទៀតនៅព្រឹកថ្ងៃទី ១១ ខែឧសភា ឆ្នាំ ២០២៣។ កូនពូជសុនខអ្នកប្រយុទ្ធប្រឆាំងជាមួយសំណល់គ្រាប់យុទ្ធភណ្ឌមិនទាន់ផ្ទុះពីសង្គ្រាមចំនួន ១០ ក្បាល។ កូនសុនខសម្បុកមុនៗបានធំធាត់ល្អគួរកត់សម្គាល់ដែរ»។
កាលពីខែមេសាកន្លងមក កូនសុនខថ្មីចំនួនមួយសម្បុកមាន ១៣ ក្បាលក៏បានកើតផងដែរ៕
