ឡូហ្គោគណបក្សភ្លើងទៀន។ គ.ជ.ប បដិសេធការចុះបញ្ជីឈរឈ្មោះបោះឆ្នោតរបស់គណបក្សភ្លើងទៀន សម្រាប់ការបោះឆ្នោតឆ្នាំ ២០២៣។ រូបថត គណបក្សភ្លើងទៀន
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីសម្រេចបដិសេធទាំងស្រុង ចំពោះការចុះបញ្ជីរបស់គណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ របស់គណបក្សភ្លើងទៀន ក្រោយពីមិនបានបំពេញគ្រប់លក្ខខណ្ឌនៃច្បាប់បោះឆ្នោត។
យោងតាមសេចក្តីប្រកាសព័ត៌មានរបស់គ.ជ.ប នៅរសៀលថ្ងៃទី ១៥ ខែឧសភា ឆ្នាំ ២០២៣ បានធ្វើការបដិសេធការចុះបញ្ជីរបស់គណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះជ្រើសតាំងតំណាងរាស្ត្រ នីតិកាលទី៧ ឆ្នាំ ២០២៣ របស់ គណបក្សភ្លើងទៀន ដែលមាន ២៥ មណ្ឌលរាជធានី ខេត្ត។
គ.ជ.ប បានបញ្ជាក់ហេតុផលថា៖ «មូលហេតុដោយសារគណបក្សភ្លើងទៀន មិនបានភ្ជាប់មកជាមួយនូវប្រកាសស្ដីពីការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែល មានបញ្ជាក់នីត្យានុកូលកម្ម»។
អ្នកនាំពាក្យនៃគណៈកម្មាធិការជាតិរៀបចំការបោះឆ្នោត (គ.ជ.ប) លោក ខន កែវមនោ បានប្រាប់ឱ្យដឹងនៅថ្ងៃទី ១៥ ខែឧសភាថា ការដែលគ.ជ.ប បដិសេធមិនចុះបញ្ជីគណបក្សនយោបាយឈរឈ្មោះបោះឆ្នោត ជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣ របស់គណបក្សភ្លើងទៀន ដោយសារតែគណបក្សនេះ មិនបានបំពេញបន្ថែមពីចំណុចខ្វះខាតរបស់ខ្លួន តាមការជូនដំណឹង របស់ គ.ជ.ប។
លោកបានបន្តថា ៖ «គ.ជ.ប បានជូនដំណឹង ឱ្យគណបក្សភ្លើងទៀនបំពេញបន្ថែមនូវចំណុច ខ្វះខាតចំនួន ៣ ចំណុច ដោយ ក្នុងនោះ គណបក្សបានបំពេញ បានតែ ២ ចំណុច និង ១ ចំណុចទៀត គណបក្សនេះ មិនបាន បំពេញ ឱ្យបានត្រឹមត្រូវ ទៅតាមការកំណត់នៃច្បាប់ ហើយចំណុចដែលគណបក្សនេះ មិនបានបំពេញនោះ គឺលិខិតបញ្ជាក់ស្តីពីការចុះបញ្ជីគណបក្សនយោបាយនៅក្រសួងមហាផ្ទៃ ត្រូវមាននីត្យានុកូលកម្ម»។
ជាមួយគ្នានេះដែរ លោក គឹមសួរ ភីរិទ្ធ អ្នកនាំពាក្យគណបក្សភ្លើងទៀន បានប្រាប់ឱ្យដឹងនៅថ្ងៃទី ១៥ ខែឧសភា ផងដែរថា គណបក្សលោកមានការខកចិត្តយ៉ាងខ្លាំងចំពោះការសម្រេចបដិសេធចំពោះការចុះបញ្ជីគណបក្សលោក មិនឱ្យចូលរួមការបោះឆ្នោតជ្រើសតាំងតំណាងរាស្ត្រ នីតិកាលទី ៧ នេះ។
លោកបន្តថា មានមតិជាតិ និងអន្តរជាតិបានមើលឃើញថា មានតែគណបក្សភ្លើងទៀនទេ ដែលមានកម្លាំងអាចប្រកួតប្រជែងជាមួយគណបក្សកាន់អំណាចបាន។
ទោះជាបែបនេះក្តី លោក គឹមសួរ ភីរិទ្ធ បានបញ្ជាក់ថា៖ «គណបក្សយើងនឹងរៀបចំឯកសារដាក់ពាក្យបណ្តឹងទៅក្រុមប្រឹក្សាធម្មនុញ្ញ ឱ្យជួយស្វែងរកយុត្តិធម៌ចំពោះករណីនេះ តែយើងហាក់មានក្តីសង្ឃឹមតិចតួចណាស់ថា ទទួលបាននូវភាពយុត្តិធម៌»។
យោងតាមសេចក្តីប្រកាស ព័ត៌មានរបស់គ.ជ.បដដែលនេះ ក៏លើកឡើងផងដែរថា គិតត្រឹមថ្ងៃទី ១៥ ខែឧសភា ឆ្នាំ ២០២៣ គ.ជ.ប បានសម្រេចទទួលស្គាល់ជាផ្លូវការលើការចុះបញ្ជីរបស់គណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ចំនួន ១៨ គណបក្សនយោបាយ និងបានបដិសេធការចុះបញ្ជីរបស់គណបក្សនយោបាយឈរឈ្មោះ បោះឆ្នោត និងបញ្ជីបេក្ខជនឈរឈ្មោះចំនួន ១ គណបក្សនយោបាយ។
សេចក្តីប្រកាសព័ត៌មានបន្តថា ក្នុងដំណើរការពិនិត្យពាក្យសុំចុះបញ្ជីរបស់គណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ មានគណបក្សនយោបាយចំនួន ៥ ត្រូវបាន គ.ជ.ប ចេញលិខិត ជូនដំណឹង ឱ្យបំពេញបន្ថែមចំណុចខ្វះខាត ហើយគណបក្សទាំងនោះបានបំពេញជូន គ.ជ.ប វិញ មានតែគណបក្សភ្លើងទៀន មិនបានបំពេញបន្ថែមចំណុចខ្វះខាតរបស់ខ្លួន៕
