មាតិកាលើបណ្តាញសង្គម បង្កើតវីដេអូកំប្លុកកំប្លែង នាពេលកន្លងមក។
ភ្នំពេញៈ សមាគមមីក្រូហិរញ្ញវត្ថុកម្ពុជាបានចេញលិខិតអំពាវនាវជាចំហមួយដល់អ្នកផលិតមាតិកាតាមបណ្តាញសង្គមឱ្យចៀសវាងការផលិតមាតិកាពាក់ព័ន្ធវិស័យធនាគារ និងហិរញ្ញវត្ថុធ្វើជាកម្មវត្ថុនៃវីដេអូកំប្លុកកំប្លែង ក្នុងន័យបន្ទុះបង្អាប់ ប្រាសចាកពីការពិត មានភាពអវិជ្ជមានដល់វិស័យហិរញ្ញវត្ថុ។
សេចក្តីអំពាវនាវដែលបានធ្វើឡើងនៅថ្ងៃទី១៨ ខែឧសភា បានលើកឡើងថា សមាគមមីក្រូហិរញ្ញវត្ថុកម្ពុជា បានសង្កេតឃើញជាញឹកញាប់នូវការផ្សព្វផ្សាយដោយយកប្រធានបទមន្ត្រីឥណទាន(CO) និងប្រធានបទពាក់ព័ន្ធនឹងវិស័យធនាគារ និងហិរញ្ញវត្ថុ ធ្វើជាកម្មវត្ថុនៃវីដេអូកំប្លុកកំប្លែង ជារូបភាពបន្ទុះបង្អាប់ ប្រាសចាកពីការពិតនៅតាមបណ្តាញផ្សព្វផ្សាយមួយចំនួនជាពិសេសបណ្តាញទំនាក់ទំនងសង្គម។
ក្នុងពេលកន្លងមក អ្នកផលិតមាតិកាវីដេអូខ្លីៗដោយនិយាយបែបកំប្លែង និងការសម្តែងជាក្រុមផង រួចបង្ហោះតាមបណ្តាញសង្គមដោយទទួលបានប្រជាប្រិយភាពយ៉ាងខ្លាំងតាមរយៈការចូលចិត្ត(Likes)និងការតាមដាន (Follows) ពីសំណាក់អ្នកប្រើប្រាស់បណ្តាញសង្គមទូទៅ។
សមាគមគ្រឹះស្ថានមីក្រូហិរញ្ញវត្ថុកម្ពុជាបានលើកឡើងថា៖«ការសម្ដែងមួយចំនួន គឺប្រាសចាកពីការពិត ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់បុគ្គលិកនៅក្នុងវិស័យធនាគារ និងហិរញ្ញវត្ថុ។ សមាគម សូមសម្តែងការសោកស្តាយ និងមានការព្រួយបារម្ភចំពោះការផ្សព្វផ្សាយប្រាសចាកពីការពិតទាំងនោះ»។
លោក កាំង តុងងី ប្រធាននាយកដ្ឋានទំនាក់ទំនងនៃសមាគមគ្រឹះស្ថានមីក្រូហិរញ្ញវត្ថុកម្ពុជា បានថ្លែងថា កន្លងមកអ្នកបង្កើតមាតិកាដោយប្រើប្រាស់វិស័យហិរញ្ញវត្ថុមិនទាន់បង្កភាពអន្តរាយណាមួយដល់វិស័យហិរញ្ញវត្ថុនោះដែរ ដោយគ្រាន់តែបង្កើតមាតិកាដើម្បីទទួលបានចំនួនអ្នកមើល និងតាមដានច្រើនប៉ុណ្ណោះ។
លោកបានបញ្ជាក់ថា៖«ក្នុងដំណាក់កាលនេះ យើងមានការអំពាវនាវ ក្រើនរំឭក និងអប់រំឱ្យគាត់យល់ថាតើ អ្វីដែលគាត់ធ្វើនោះប៉ះពាល់អ្វីខ្លះដល់វិស័យហិរញ្ញវត្ថុនេះ? យ៉ាងណាយើងនឹងបន្តសង្កេតតទៅមុខទៀតថាតើវាមាននិន្នាការប្រែប្រួលយ៉ាងដូចម្តេច ទើបយើងសម្រេចថាតើ យើងគួរធ្វើអ្វីបន្តទៀតនោះ?»។
សមាគមមីក្រូហិរញ្ញវត្ថុកម្ពុជាបានលើកឡើងថា វិស័យធនាគារ និងហិរញ្ញវត្ថុ គឺជាឆ្អឹងខ្នងនៃសេដ្ឋកិច្ចជាតិ និងជាដៃគូហិរញ្ញវត្ថុមិនអាចខ្វះបានសម្រាប់ប្រជាជនកម្ពុជា។ ការបំផុសនូវមាតិកាដោយខ្វះការយល់ដឹងពីវិស័យ ហួសពីការពិត នឹងធ្វើឱ្យប៉ះពាល់ដល់ទំនុកចិត្តសាធារណជន ព្រមទាំងអាចជាការជំរុញឱ្យប្រជាពលរដ្ឋងាកទៅប្រើប្រាស់កម្ចីក្រៅផ្លូវការ ដែលមានអត្រាការប្រាក់ខ្ពស់ហួសហេតុ និងគ្មានយន្តការការពារអតិថិជន។
សមាគមបានបន្តថា៖«សូមម្ចាស់[គណនី]ក្នុងបណ្តាញសង្គម និងអ្នកផលិតមាតិកា មេត្តាចៀសវាង ការបង្ហោះឬចែកចាយនូវការសម្តែងឬរឿងមិនពិតដែលអាចបង្កជារូបភាពអវិជ្ជមានដល់វិស័យហិរញ្ញវត្ថុ។ សមាគមពិតជាជឿជាក់និងសង្ឃឹមយ៉ាងមុតមាំថា សាធារណជននិងម្ចាស់[គណនី]បណ្ដាញសង្គម នឹងចូលរួមជាមួយសមាគមក្នុងការពង្រឹងវិស័យដ៏សំខាន់មួយនេះ»។
របាយការណ៍ត្រួតពិនិត្យរបស់ធនាគារជាតិនៃកម្ពុជាដែលទើបចេញផ្សាយកាលពីចុងត្រីមាសទី៣ឆ្នាំនេះ បានឱ្យដឹងថា ក្នុងឆ្នាំ២០២២កន្លងទៅនេះ ធនាគារពាណិជ្ជនិងធនាគារឯកទេសនៅកម្ពុជាបានគ្រប់គ្រងទ្រព្យសកម្មក្នុងវិស័យហិរញ្ញវត្ថុដែលមានចំនួន ២៧២ ៧៣២ពាន់លានរៀល (៦៨,១៨៣ពាន់លានដុល្លារ) និងគ្រឹះស្ថានមីក្រូហិរញ្ញវត្ថុនិងគ្រឹះស្ថានឥណទានជនបទជាង៣០០ស្ថាប័ន គ្រប់គ្រងទ្រព្យសកម្ម ៤៦ ៤២៤ ពាន់លានរៀល(១១,៦០៦ពាន់លានដុល្លារ)។
យោងតាមធនាគារជាតិនៃកម្ពុជា ប្រព័ន្ធធនាគារនៅកម្ពុជានៅតែបន្តមានវឌ្ឍនភាពទទួលបានជំនឿទុកចិត្តពីសាធារណជននិងចូលរួមយ៉ាងសកម្មក្នុងការជំរុញសកម្មភាពសេដ្ឋកិច្ចនានា។ទ្រព្យសកម្មរបស់ប្រព័ន្ធធនាគារក្នុងឆ្នាំ២០២២ មានកំណើន១២,៦% ដល់៣១៩,២ពាន់ពាន់លានរៀល(៧៧,៥ពាន់លានដុល្លារ) ក្នុងនោះឥណទានអតិថិជនបានកើនឡើង១៨,៩ភាគរយដល់២២៦,៧ពាន់ពាន់លានរៀល(៥៥,១ពាន់លានដុល្លារ) ប្រាក់បញ្ញើអតិថិជនមានកំណើន៩,២ភាគរយដល់១៧៤,៤ពាន់ពាន់លានរៀល(៤២,៤ពាន់លានដុល្លារ)និងដើមទុនមានកំណើន១៣,៩ភាគរយ ដល់៦៣,៣ពាន់ពាន់លានរៀល (១៥,៤ ពាន់លានដុល្លារ)៕
