លោកនាយករដ្ឋមន្ត្រី ហ៊ុន សែន ថ្លែងកាលពីថ្ងៃម្សិលមិញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានកើនរំឭកជាថ្មីដល់បណ្តាម្ចាស់ក្រុមហ៊ុនអ៊ីនធឺណិត និងម្ចាស់បុរីទាំងអស់ ត្រូវគោរពតាមវិធានការដែលក្រសួងប្រៃសណីយ៍ និងទូរគមនាគមន៍ បានដាក់ចេញកន្លងមកដោយត្រូវបញ្ឈប់ការផ្តល់សិទ្ធិផ្តាច់មុខដល់ក្រុមហ៊ុនអ៊ីនធឺណិតណាមួយ ហើយត្រូវសហការគ្នាផ្តល់សេវានេះដល់អ្នករស់នៅក្នុងបុរីឱ្យបានល្អប្រសើរ។
ក្នុងឱកាសសម្ពោធទីតាំងថ្មីសាកលវិទ្យាល័យភូមិន្ទវិចិត្រសិល្បៈ និងចែកសញ្ញាបត្រដល់និស្សិត នៅព្រឹកថ្ងៃទី ២៤ ខែឧសភា លោក ហ៊ុន សែន បានលើកឡើងថា ប៉ុន្មានថ្ងៃនេះសេវាអ៊ីនធឺណិតនៅក្នុងប្រទេសមានការរអាក់រអួលបន្តិច ដោយលោកបានក្រើនរំឭកឡើងវិញដល់ម្ចាស់ក្រុមហ៊ុនអ៊ីនធឺណិត និងម្ចាស់បុរីនានា យកវិធានការដែលក្រសួងប្រៃសណីយ៍ និងទូរគមនាគមន៍ដាក់ចេញកន្លងទៅ មកអនុវត្ត ដើម្បីធ្វើឱ្យសេវាអ៊ីនធឺណិតប្រសើរឡើង។
លោកបានថ្លែងថា៖ «ក្នុងពេលដែលបុរីមុននេះផ្តាច់មុខ (ផ្តល់សេវាអ៊ីនធឺណិត) ដល់ខ្ញុំស្រែកទៅ ប្រាប់ថា យើងអត់ទទួលស្គាល់ការផ្តាច់មុខរបស់អ្នកឯងទេព្រោះច្បាប់ស្តីពីទូរគមនាគមន៍ អត់អនុញ្ញាតឱ្យផ្តាច់មុខទេ ក្រោយមកកែបានបន្តិចបន្តួចពីផ្តាច់មុខទៅជាមិនផ្តាច់មុខ ប៉ុន្តែគេដាក់ចេញឧបសគ្គរារាំង»។
ក្នុងន័យនេះលោកនាយករដ្ឋមន្ត្រី សង្កេតឃើញថា បើទោះបីជានៅតាមបុរីនានា បានអនុញ្ញាតឱ្យក្រុមហ៊ុនផ្តល់សេវាអ៊ីនធឺណិត ចូលវិនិយោគក្នុងបុរីរបស់ខ្លួនក៏ដោយ ប៉ុន្តែក្រុមហ៊ុនទាំងនោះនៅជួបឧបសគ្គមួយចំនួន។ «ខ្ញុំអំពាវនាវចំពោះម្ចាស់បុរីទាំងអស់ ព្រោះឥឡូវនេះអ្នករកស៊ី មន្ត្រីរាជការ ដែលយើងធ្វើការជាមួយរស់នៅតាមបុរី ក្នុងពេលបុរីនោះ អត់មានសេវាអ៊ីនធឺណិត។ សេវាទូរស័ព្ទក៏ខ្សោយ ហើយសេវាអ៊ីនធឺណិតក៏ខ្សោយ»។
ក្រៅពីណែនាំម្ចាស់បុរី លោក ហ៊ុន សែន ក៏ក្រើនរំឭកដល់ម្ចាស់ក្រុមហ៊ុនផ្តល់សេវាអ៊ីនធឺណិតត្រូវពង្រឹងគុណភាព ទាំងផ្នែកសេវា និងល្បឿនផងដែរ។ លោកថា៖ «ខ្ញុំសូមរំឭកម្ចាស់ក្រុមហ៊ុនអ៊ីនធឺណិតទាំងតាមបុរីនានា សូមយកវិធានការដែលក្រសួងប្រៃសណីយ៍ និងទូរគមនាគមន៍ បានដាក់ចេញកន្លងទៅ ហើយសូមឱ្យបណ្តាញអ៊ីនធឺណិតនានា ដំឡើងអង់តែនឱ្យបានច្រើន តាមដែលអាចធ្វើទៅបាន»។
អនុរដ្ឋលេខាធិការក្រសួងប្រៃសណីយ៍និងទូរគមនាគមន៍លោក លីវ សុផាណារិទ្ធ បានប្រាប់ឱ្យដឹងថា តាមយន្តការរបស់ក្រសួងប្រៃសណីយ៍មានក្រុមការងារទាំងអស់ចំនួន ៨ សម្រាប់ចុះជួយពង្រឹងគុណភាពសេវានៅតាមបុរីហើយក្រុមការងារកំពុងតែធ្វើការជាមួយខាងបុរី ក៏ដូចជាប្រតិបត្តិករទូរស័ព្ទទាំងអស់នៅកម្ពុជាទាំងខាងក្រុមហ៊ុនទូរស័ព្ទ និងក្រុមហ៊ុនអ៊ីនធឺណិត។
លោកលើកឡើងថា ជាក់ស្តែងរហូតមកដល់ពេលនេះក្រសួងបានដំឡើងអង់តែនទូរស័ព្ទមួយចំនួនទៅតាមលទ្ធភាពនៃការផ្តល់ទីតាំងរបស់បុរី ប៉ុន្តែក៏ជួបនូវបញ្ហាមួយចំនួនទាក់ទងការស្វែងរកទីតាំងដើម្បីសាងសង់បង្គោលអង់តែនទូរស័ព្ទផងដែរ។
លោក លីវ សុផាណារិទ្ធ ថ្លែងថា៖ «ដោយសារនៅតាមបុរីមួយចំនួននៅពេលដែលគាត់រៀបចំប្លង់មេសាងសង់បុរី គឺមិនបានទុកទីធ្លាឬក៏ទីតាំងសម្រាប់បង្គោលអង់តែន អ៊ីចឹងដល់ពេលគាត់អភិវឌ្ឍបុរីហើយ វាមានភាពចង្អៀត ហើយពេលក្រុមការងារបានចុះទៅវាស់ស្ទង់គុណភាពសេវានៅតាមបុរីឃើញថា មានជ្រុងខ្លះឬស្ទើរតែទាំងស្រុងនៃបុរីមួយចំនួន នៅមានសេវាខ្សោយមែន»។
យ៉ាងណាក្តីលោកថា រហូតមកដល់ពេលនេះក្រុមការងារកំពុងធ្វើការបន្តទៀត ស្វែងរកទីតាំងណាដែលសមរម្យ ដែលអាចជួយបង្កើនគុណភាពសេវាឱ្យប្រសើរឡើង។ លោក លីវ សុផាណារិទ្ធ បន្ថែមថា ទាក់ទងបង្គោលអង់តែននេះ រហូតមកដល់ពេលនេះ គឺក្រុមការងារដំឡើងបានច្រើនបង្គោលរួចហើយ ជាពិសេសនៅតាមបុរីដែលសហការល្អ ក្នុងការផ្តល់ទីតាំង ក៏ដូចជាសម្របសម្រួលជាមួយប្រជាពលរដ្ឋ នៅក្នុងតំបន់នោះ។
លោកបញ្ជាក់ថា៖ «ក្រោយដំឡើងរួច យើងក៏សង្កេតឃើញថា សេវាទូរស័ព្ទ និងសេវាអ៊ីនធឺណិតនៅតាមបណ្តាបុរីទាំងនោះមានភាពប្រសើរឡើង។ ត្រង់ចំណុចនេះខ្ញុំចង់បញ្ជាក់ថា បង្គោលអង់តែនមួយចំនួនត្រូវបានដំឡើងជាស្ថាពរបន្ទាប់ពីមានការបំពាក់ឧបករណ៍គ្រឿងបរិក្ខារទូរគមនាគមន៍ពីប្រតិបត្តិករទូរស័ព្ទហើយបង្គោលអង់តែនមួយចំនួនទៀត ត្រូវបានដំឡើងហើយ ប៉ុន្តែមិនទាន់មានការបំពាក់គ្រឿងបរិក្ខារពីប្រតិបត្តិករនៅឡើយ»។
ជាមួយគ្នានេះលោក លីវ សុផាណារិទ្ធ ស្នើសុំឱ្យប្រជាពលរដ្ឋ និងម្ចាស់បុរីឱ្យមានការសហការល្អដើម្បីឱ្យក្រុមការងារមានលទ្ធភាពក្នុងការពង្រឹងគុណភាពសេវាជូនគាត់ ហើយប្រតិបត្តិករដទៃទៀតក៏អាចផ្តល់សេវាបានល្អ៕
