.jpg)
ពលរដ្ឋរងគ្រោះដោយខ្យល់កន្ត្រាក់ទទួលជំនួយពីកាកបាទក្រហម។ រូប CRC
ភ្នំពេញៈ យ៉ាងហោចណាស់មានមនុស្ស ៣៧ នាក់បានស្លាប់ រីឯ ១២៨ នាក់ផ្សេងទៀតរងរបួស ចំណែកផ្ទះ ១ ១៦៤ ខ្នង បានដួលរលំ និងរបើកដំបូលមាន ៩ ៧១៥ ខ្នង ដោយសារករណីខ្យល់កន្ត្រាក់ និងរន្ទះបាញ់គិតចាប់ពីថ្ងៃទី ១ មករា ដល់ថ្ងៃទី ២៨ ខែឧសភា ឆ្នាំ ២០២៣។ នេះបើតាមលោកសុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
ថ្លែងប្រាប់ភ្នំពេញប៉ុស្តិ៍នៅថ្ងៃទី ២៩ ខែឧសភា លោក សុទ្ធ គឹមកុលមុនី បានឱ្យដឹងថា ករណីខ្យល់កន្ត្រាក់ និងរន្ទះបាញ់បានកើតឡើងញឹកញាប់ចាប់ពីដើមរដូវវស្សា។ លោកថា ចាប់ពីដើមឆ្នាំ រហូតដល់ថ្ងៃទី ២៨ ខែឧសភា ចំពោះករណីខ្យល់កន្ត្រាក់ បានកើតឡើងចំនួន ១៥៥ លើកក្នុងនោះបានធ្វើឱ្យផ្ទះរលំចំនួន ១ ១៦៤ ខ្នង និងផ្ទះរបើកដំបូលមាន ៩ ៧១៥ ខ្នង ព្រមទាំងប៉ះពាល់ដល់សាលារៀនចំនួន ៦៧ ខ្នងផងដែរ។ ក្រៅពីនេះករណីខ្យល់កន្ត្រាក់ក៏បានប៉ះពាល់ដល់អគាររដ្ឋបាល និងបណ្តាលឱ្យមនុស្សស្លាប់ ៦ នាក់និងរបួស ៩៩ នាក់។
លោកបានបញ្ជាក់ថា៖ «ការកើនឡើងនៃខ្យល់កន្ត្រាក់នេះ គឺគួរឱ្យចាប់អារម្មណ៍ ព្រោះមានការកើតឡើងសឹងតែរាល់ថ្ងៃនៅពេលមានភ្លៀង អ៊ីចឹងសុំអាជ្ញាធរ និងប្រជាពលរដ្ឋយើងមេត្តាយកចិត្តទុកដាក់ខ្ពស់ចំពោះករណីខ្យល់កន្ត្រាក់នេះដើម្បីកាត់បន្ថយផលប៉ះពាល់ផ្សេងៗ ជាពិសេសកាត់បន្ថយគ្រោះថ្នាក់ដែលអាចកើតឡើងដល់អាយុជីវិត»។
លោក សុទ្ធ គឹមកុលមុនី បានឱ្យដឹងទៀតថា ដោយឡែកករណីរន្ទះបាញ់គឺជាបញ្ហាមួយដែលកំពុងគំរាមកំហែងដល់អាយុជីវិតរបស់ប្រជាពលរដ្ឋផងដែរ។ ក្នុងនោះ ៥ ខែ ដើមឆ្នាំ ២០២៣ នេះ គិតត្រឹមថ្ងៃទី ២៨ ខែឧសភា មានករណីរន្ទះបាញ់ កើតឡើងចំនួន ៦០ លើក បង្កឱ្យមនុស្សស្លាប់ ៣១នាក់ និងរបួស ២៩ នាក់ ព្រមទាំងគោក្របីងាប់ ៥៩ ក្បាល។
លោកបន្ថែមទៀតថា តាមទិន្នន័យនៃការស្លាប់ដោយសាររន្ទះបាញ់នេះជាតួលេខ ១ ដ៏ខ្ពស់ ហេតុដូច្នេះទាមទារឱ្យមានការប្រុងប្រយ័ត្ន និងយកចិត្តទុកដាក់ខ្ពស់លើបញ្ហារន្ទះបាញ់នេះ។ អាជ្ញាធរ និងប្រជាពលរដ្ឋ ព្រមទាំងអ្នកជំនាញគ្រប់លំដាប់ថ្នាក់ត្រូវគិតគូរយកចិត្តទុកដាក់ដើម្បីកាត់បន្ថយគ្រោះថ្នាក់។
ជាមួយគ្នានេះគណៈកម្មាធិការជាតិគ្រប់គ្រងគ្រោះមហន្តរាយក៏បានណែនាំឱ្យពិនិត្យ វិភាគ និងស្រាវជ្រាវបញ្ហារន្ទះបាញ់នេះ ដើម្បីដាក់ចេញវិធានការសមស្រប ក្នុងការកាត់បន្ថយ ផលប៉ះពាល់ទៅដល់អាយុជីវិតរបស់ប្រជាពលរដ្ឋ។
លោកថ្លែងថា៖ «អាជ្ញាធរត្រូវយកចិត្តទុកដាក់ដើម្បីរៀបចំប្រព័ន្ធការពាររន្ទះនៅតំបន់ណាដែលធ្លាប់កើត ហើយអ្នកពាក់ព័ន្ធទាំងអស់ ជាពិសេសប្រជាពលរដ្ឋ ត្រូវយល់ដឹងឱ្យច្បាស់អំពីបញ្ហារន្ទះបាញ់នេះ ដើម្បីកាត់បន្ថយផលប៉ះពាល់»។
តាមរបាយការណ៍របស់នគរបាលស្រុកប្រាសាទបាគងបានឱ្យដឹងថា ភ្លៀងលាយខ្យល់កន្ត្រាក់ បណ្តាលឱ្យផ្ទះប្រជាពលរដ្ឋចំនួន ៣ ខ្នងបាក់រលំ បង្កឱ្យមនុស្ស ៣ នាក់ រងរបួស និងត្រូវបានបញ្ជូនមកមន្ទីរពេទ្យ ដើម្បីព្យាបាលនៅថ្ងៃទី ២៧ ខែឧសភា នៅក្នុងភូមិសុភី ឃុំកន្ត្រាំង ស្រុកប្រាសាទបាគង ខេត្តសៀមរាប។ ប្រភពដដែលបានឱ្យដឹងទៀតថា នៅយប់ថ្ងៃទី ២៦ ខែឧសភា មានយុវជន ២ នាក់នៅស្រុកប្រាសាទបាគងបានស្លាប់ ដោយសាររន្ទះបាញ់ ខណៈពួកគេដើរឆ្លុះកង្កែបនៅពេលយប់ក្នុងពេលកំពុងមានទឹកភ្លៀង និងខ្យល់កន្ត្រាក់។
ដោយឡែករបាយការណ៍របស់ លោក កែវ តារារស្មី អភិបាលស្រុកអូរជ្រៅ បានឱ្យដឹងថា ភ្លៀងលាយឡំទៅដោយខ្យល់កន្ត្រាក់ បណ្ដាលឱ្យផ្ទះសំបែងរបស់ប្រជាពលរដ្ឋនៅក្នុងស្រុកអូរជ្រៅរងការខូចខាតអស់ ៣៦ ខ្នង កាលពីថ្ងៃទី ២៦ ខែឧសភា ។ ករណីខ្យល់កន្ត្រាក់នេះបានកើតឡើងនៅ ២ឃុំ គឺទី ១ ឃុំចង្ហា ប៉ះពាល់ផ្ទះ ២៨ ខ្នង និង ទី២គឺ ឃុំសិង្ហ ប៉ះពាល់ផ្ទះចំនួន ៨ ខ្នង និងរងការដួលរំលំស្លាកសញ្ញាគណបក្សចំនួន ២ ផ្ទាំងផងដែរ៕
