មន្ត្រីសុខាភិបាលធ្វើការណែនាំអ្នកផ្សព្វផ្សាយពីការប្រើឱសថបុរាណគ្មានច្បាប់ នៅភូមិតាឡី សង្កាត់ដង្កោ កាលពីថ្ងៃទី២៩ឧសភា។ រូបថត មន្ទីរសុខាភិបាលរាជធានីភ្នំពេញ
ភ្នំពេញៈ ក្រុមការងារនៃមន្ទីរសុខាភិបាលរាជធានីភ្នំពេញ និងអាជ្ញាធរពាក់ព័ន្ធ បានចុះពិនិត្យ និងផ្អាកទីតាំងព្យាបាលដោយប្រើឱសថបុរាណគ្មានច្បាប់ ១ កន្លែង នៅភូមិតាឡី សង្កាត់ដង្កោ ខណ្ឌដង្កោ និងបានពិន័យជាប្រាក់ ១ លានរៀល នៅថ្ងៃទី ២៩ ខែឧសភា។
មន្ទីរសុខាភិបាលនៃរដ្ឋបាលរាជធានីភ្នំពេញ សរសេរលើបណ្តាញសង្គមហ្វេសប៊ុកនៅថ្ងៃទី ២៩ ខែឧសភា ឱ្យដឹងថា ទីតាំងឱសថបុរាណគ្មានច្បាប់អនុញ្ញាតនេះ មានឈ្មោះ ស៊ូ សេងហ៊ួ ស្ថិតនៅភូមិតាឡី សង្កាត់ដង្កោ ខណ្ឌដង្កោ។
មន្ទីរសុខាភិបាលរាជធានីភ្នំពេញបញ្ជាក់ថា ទីតាំងឱសថបុរាណនេះ បានបើកសេវាពិនិត្យព្យាបាលជំងឺទឹកនោមផ្អែម មហារីក និងបានចុះផ្សាយតាម Facebook ដែលមានគណនីឈ្មោះ ស៊ូសេងហ៊ួ អាណាចក្រ ពុទ្ធចក្រ ព្រហ្មចក្រ ទទួលមើលជំងឺទឹកនោមផ្អែម និងព្យាបាលជំងឺមហារីក បានជាសះស្បើយ ដែលការផ្សព្វផ្សាយនេះពុំមានលក្ខណៈបច្ចេកទេសវេជ្ជសាស្រ្តច្បាស់លាស់ និងមានចរិតភូតភ ខុសពីការពិត។
ប្រភពបញ្ជាក់ថា៖«បន្ទាប់ពីបានត្រួតពិនិត្យទីតាំង បុគ្គលិកបម្រើការងារ និងជួបជាមួយម្ចាស់ឱសថបុរាណនេះ ព្រមទាំងធ្វើកំណត់ហេតុរួចមក ក្រុមការងារបានផ្អាកទីតាំងឱសថបុរាណជាបណ្តោះអាសន្ន និងពិន័យជាប្រាក់ចំនួន ១លានរៀល ព្រមទាំងបានបញ្ជូនកំណត់ហេតុនេះជូនទៅថ្នាក់ដឹកនាំ និងក្រុមការងារពាក់ព័ន្ធផ្សេងៗទៀត ដើម្បីចាត់ការតាមនីតិវិធីច្បាប់»។
លោក ស៊ូ សេងហ៊ួ គ្រូឱសថបុរាណដែលធ្វើការផ្សព្វផ្សាយតាមបណ្តាញសង្គមហ្វេសប៊ុកនោះ បានចេញវីដេអូសុំទោសដល់សាធារណជន ក្រសួង ស្ថាប័នពាក់ព័ន្ធទាំងអស់ នៅយប់ថ្ងៃទី២៩ ខែឧសភា ដោយលើកឡើងថា កន្លងមកខ្លួនពិតជាបានធ្វើការផ្សព្វផ្សាយជាច្រើនពីការព្យាបាលជាសះស្បើយដាច់១០០ភាគរយ នូវជំងឺទឹកនោមផ្អែម ជំងឺមហារីក ជំងឺស្លាប់១ចំហៀងខ្លួន ប៉ុន្តែក្រសួងសុខាភិបាលបានណែនាំមិនឱ្យមានការផ្សព្វផ្សាយបែបនោះទេ។
ក្រោយពីមានការណែនាំពីក្រសួងសុខាភិបាល លោក ស៊ូ សេងហ៊ួ អះអាងថា នឹងអនុវត្តតាមការណែនាំរបស់ក្រសួងសុខាភិបាល និងប្រកាសលុបចោលគម្រោងទាំងអស់ដែលមាន ដូចជាមហាព្រឹត្តិការព្យាបាលជំងឺទឹកនោមផ្អែមមិនគិតថ្លៃ១០០នាក់ ជំងឺមហារីក១០០នាក់ ជំងឺស្លាប់មួយចំហៀងខ្លួន១០០នាក់មិនគិតថ្លៃ និងផ្អាករាល់ការជួបជុំចែកផលិតផលទាំងអស់មិនគិតថ្លៃ៕
.jpg)
