លោកនាយករដ្ឋមន្ត្រីឥណ្ឌាពេលចូលគាល់ព្រះមហាក្សត្រកម្ពុជា កាលពីថ្ងៃទី៣០ ឧសភា ។ រូបថត Royal du Cambodge
ភ្នំពេញៈ ប្រធានាធិបតីឥណ្ឌាលោកស្រី ដ្រាវផាឌី មួរមូ (Droupadi Murmu)បានជំរុញកិច្ចខិតខំប្រឹងប្រែងក្នុងការពង្រីកទំនាក់ទំនងទេសចរណ៍ និងទំនាក់ទំនងរវាងប្រជាជន និងប្រជាជនដើម្បីពង្រឹងទំនាក់ទំនងទ្វេភាគីកម្ពុជា-ឥណ្ឌាបន្ថែមទៀត។
លោកស្រី Murmu លើកឡើងដូច្នេះក្នុងជំនួបកាលពីថ្ងៃទី៣០ ខែឧសភា ជាមួយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានៅវិមានប្រធានាធិបតីឥណ្ឌា Rashtrapati Bhavanដែលព្រះអង្គបានយាងទៅបំពេញព្រះរាជទស្សនកិច្ចលើកដំបូងទៅកាន់ប្រទេសនេះចាប់ពីថ្ងៃទី២៩ ដល់ថ្ងៃទី៣១ ខែឧសភា។
សេចក្តីប្រកាសព័ត៌មានវិមានប្រធានាធិបតីឥណ្ឌាបញ្ជាក់ថា លោកស្រីបានកត់សម្គាល់នូវសក្ដានុពលខ្លាំងសម្រាប់កំណើនបន្ថែមទៀតនៃពាណិជ្ជកម្ម និងការវិនិយោគរវាងឥណ្ឌា និងកម្ពុជា ដោយលោកស្រីបញ្ជាក់ថា៖ «ឥណ្ឌាមានបំណងចង់លើកកម្ពស់ទំនាក់ទំនងការពារជាតិជាមួយកម្ពុជា»។
សេចក្តីប្រកាសព័ត៌មាននាថ្ងៃទី៣០ ខែឧសភា បញ្ជាក់ថា៖ «លោកជំទាវប្រធានាធិបតីក៏បានសង្កត់ធ្ងន់ផងដែរអំពីភាពចាំបាច់នៃកិច្ចខិតខំប្រឹងប្រែងដើម្បីពង្រីកទំនាក់ទំនងទេសចរណ៍ និងទំនាក់ទំនងរវាងប្រជាជន និងប្រជាជន ដើម្បីលើកកម្ពស់ទំនាក់ទំនងទ្វេភាគីរវាងប្រទេសទាំង២បន្ថែមទៀត»។
លោកស្រី Murmu បានកោតសរសើរចំពោះការចូលរួមរបស់លោកនាយករដ្ឋមន្ត្រី ហ៊ុន សែន ក្នុងកិច្ចប្រជុំកំពូលស្តីពីសំឡេងនៃបណ្តាប្រទេសខាងត្បូង(Voice of Global South) កាលពីខែកុម្ភៈ ឆ្នាំនេះ។លោកស្រីបានអបអរសាទរកម្ពុជាដែលបានបញ្ចប់តំណែងជាប្រធានអាស៊ានដោយជោគជ័យកាលពីឆ្នាំមុន។
លោកស្រី ថ្លែងថា ដំណើរបំពេញព្រះរាជទស្សនកិច្ចរបស់ព្រះអង្គនាពេលនេះ បង្ហាញពីសារៈសំខាន់ដែលកម្ពុជាភ្ជាប់ទំនាក់ទំនងរបស់ខ្លួនជាមួយឥណ្ឌា ហើយថា៖ «ប្រទេសឥណ្ឌា និងកម្ពុជាភ្ជាប់ទំនាក់ទំនងដ៏សម្បូរបែប និងរស់រវើក។ យើងផ្តល់តម្លៃលើប្រវត្តិសាស្ត្ររួមរបស់យើង ហើយចាត់ទុកប្រទេសកម្ពុជាជាបងប្អូនអរិយធម៌របស់យើង»។
ដោយឡែកនៅក្នុងពិធីលៀងសាយភោជន៍កិត្តិយសទទួលស្វាគមន៍ព្រះករុណា ព្រះបាទសម្តេច ព្រះបរមនាថនរោត្តម សីហមុនី លោកស្រីប្រធានាធិបតី ថ្លែងថា ប្រទេសឥណ្ឌាមានឯកសិទ្ធិធ្វើជាដៃគូជាមួយប្រទេសកម្ពុជាក្នុងដំណើរស្វែងរកការកសាងប្រទេសតាមរយៈការកសាងសមត្ថភាពការអភិវឌ្ឍធនធានមនុស្ស និងការផ្តល់ជំនួយសម្រាប់គម្រោងសេដ្ឋកិច្ចសង្គម។
លោកស្រី Murmu បន្តថា ប្រទេសឥណ្ឌាជឿលើទស្សនវិជ្ជា១ឃ្លា«VasudhaivaKutumbakam»ដែលមានន័យថា «ពិភពលោកគឺជាគ្រួសារតែមួយ» ហើយលោកស្រីបន្ថែមថា៖«ទំនាក់ទំនងពហុភាគីរវាងឥណ្ឌា និងកម្ពុជា និងព្រះរាជវត្តមានដ៏មានសារៈសំខាន់របស់ព្រះអង្គនៅវិមានប្រធានាធិបតីឥណ្ឌាជាមួយយើងនាពេលនេះ គឺជាការបញ្ជាក់នូវអត្ថន័យដ៏ពីរោះនៃឃ្លាមួយនេះដែលមានអាយុកាលជាយូរលង់មកហើយ»។
លោកណារិនដ្រា ម៉ូឌី(Narendra Modi)នាយករដ្ឋមន្ត្រីឥណ្ឌា បានសរសេរនៅបណ្តាញ Twitter ក្រោយជំនួបជាមួយព្រះអង្គកាលពីថ្ងៃទី៣០ ខែឧសភា ថា លោកមានសេចក្តីសោមនស្សរីករាយណាស់ ដែលបានជួបពិភាក្សាការងារជាមួយព្រះអង្គ ដោយលោកបញ្ជាក់ថា៖ «យើងបានផ្លាស់ប្តូរទស្សនវិជ្ជមានអំពីទំនាក់ទំនងដ៏ជិតស្និទ្ធរបស់យើងលើវិស័យវប្បធម៌ និងទំនាក់ទំនងរវាងប្រជាជន និងប្រជាជននិងភាពជាដៃគូអភិវឌ្ឍន៍»។
ដោយឡែកក្រសួងការបរទេសកម្ពុជាបញ្ជាក់ក្នុងសេចក្តីប្រកាសព័ត៌មាននាថ្ងៃទី៣១ ខែឧសភា ថា ភាគីឥណ្ឌាបានបញ្ជាក់ជាថ្មីពីការបន្តគាំទ្រកម្ពុជាក្នុងការស្ដារ និងអភិរក្សប្រាសាទបុរាណ និងសកម្មភាពសម្អាតមីននៅកម្ពុជា ព្រមទាំងកិច្ចសហប្រតិបត្តិការផ្សេងទៀតដែលផ្ដល់ផលប្រយោជន៍ទៅវិញទៅមកសម្រាប់ប្រទេសទាំង២ នៅក្នុងបណ្ដាឆ្នាំខាងមុខ។
ក្រសួងបញ្ជាក់ថា៖ «ក្នុងអំឡុងព្រះរាជសវនាការជាមួយព្រះករុណា ព្រះមហាក្សត្រ ឯកឧត្តម នាយករដ្ឋមន្ត្រី ណារិនដ្រា ម៉ូឌី បានថ្វាយសំណើជួសជុលគំនូរនៅលើថែវស្ដីពីរឿងរាមាយណៈ នៅក្នុងព្រះបរមរាជវាំង»។
ក្រសួងបញ្ជាក់ថា៖ «ភាគីទាំង២ បានសម្ដែងទំនុកចិត្តយ៉ាងមុតមាំថា មូលដ្ឋានដ៏រឹងមាំនៃទំនាក់ទំនងទ្វេភាគី នឹងក្លាយជាកម្លាំងចលករដ៏សំខាន់ ដើម្បីបន្តជំរុញឱ្យកិច្ចសហប្រតិបត្តិការដ៏ល្អប្រសើរលើគ្រប់វិស័យដែលជាផលប្រយោជន៍រួមកាន់តែមានភាពរីកចម្រើន និងស៊ីជម្រៅ សំដៅឆ្ពោះទៅរកអនាគតដ៏ត្រចះត្រចង់ និងប្រកបដោយវិបុលភាពសម្រាប់ប្រទេសទាំង២»។
ព្រះករុណា ព្រះមហាក្សត្រ ទ្រង់សព្វព្រះរាជហឫទ័យអញ្ជើញលោកស្រី Murmu ទៅបំពេញទស្សនកិច្ចផ្លូវរដ្ឋនៅកម្ពុជា តាមពេលវេលាសមស្រប។ លោកស្រី បានសម្ដែងនូវអំណរព្រះរាជគុណថ្វាយ ព្រះករុណា ព្រះមហាក្សត្រ និងទទួលយកការអញ្ជើញដោយសេចក្តីសោមនស្សរីករាយ។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា ប្រាប់ភ្នំពេញប៉ុស្តិ៍កាលពីថ្ងៃទី៣១ ខែឧសភា ថា ជាបទពិសោធន៍បើជំរុញទំនាក់ទំនងរវាងប្រជាជន និងប្រជាជននៃប្រទេសមួយនិងប្រទេសមួយបាន គឺនាំឱ្យប្រទេសទាំង២មានទំនាក់ទំនងរឹងមាំនិងស្អិតល្មួត។
លោកបានលើកឧទាហរណ៍ពីទំនាក់ទំនងរវាងកម្ពុជានិងចិនដែលបានចូលដល់កម្រិតមិត្តភាពដែកថែប និងកិច្ចសហប្រតិបត្តិការត្បូងពេជ្រដោយសារតែប្រជាជននិងប្រជាជនមានទំនាក់ទំនងគ្នាខ្លាំងច្រើនជាងបណ្ដាប្រទេសផ្សេងជាសាច់ឈាមផង ទំនាក់ទំនងដែលជំរុញដោយរដ្ឋាភិបាលទាំង២ផងដែលនាំឱ្យមានកំណើនវិនិយោគនិងកំណើននៃការយល់គ្នា។
លោកយង់ ពៅ ថ្លែងថា៖ «ដោយឡែក ឥណ្ឌាប្រសិនបើរុញដល់ចំណុចទំនាក់ទំនងប្រជាជននិងប្រជាជនជាមួយកម្ពុជានេះគឺកាន់តែល្អ ពីព្រោះវប្បធម៌ឥណ្ឌានិងវប្បធម៌កម្ពុជានេះមានលក្ខណៈឆ្លុះបញ្ចាំងគ្នាទៅវិញទៅមក តាំងទីសម័យមុនមហានគរមក រហូតមកដល់បច្ចុប្បន្នហ្នឹង»។ អ៊ីចឹង ការជំរុញទំនាក់ទំនងប្រជាជននិងប្រជាជននេះគឺជាការលើកកម្ពស់ទំនាក់ទំនងទ្វេភាគីល្អ។ បើទោះជាប្រទេសណាក៏ដោយឱ្យតែជំរុញដល់ប្រជាជននិងប្រជាជននោះនាំឱ្យទាក់ទងប្រទេសរវាងប្រទេសហ្នឹងគឺកាន់តែល្អ កាន់តែរឹងមាំ»៕
ក្រសួងការបរទេសកម្ពុជាបញ្ជាក់ក្នុងសេចក្តីប្រកាសព័ត៌មាននាថ្ងៃទី៣១ ខែឧសភា ថា ភាគីឥណ្ឌាបានបញ្ជាក់ជាថ្មីពីការបន្តគាំទ្រកម្ពុជាក្នុងការស្ដារ និងអភិរក្សប្រាសាទបុរាណ និងសកម្មភាពសម្អាតមីននៅកម្ពុជា ព្រមទាំងកិច្ចសហប្រតិបត្តិការផ្សេងទៀតដែលផ្ដល់ផលប្រយោជន៍ទៅវិញទៅមកសម្រាប់ប្រទេសទាំងពីរ នៅក្នុងបណ្ដាឆ្នាំខាងមុខ។
ក្រសួងបញ្ជាក់ថា៖ «ក្នុងអំឡុងព្រះរាជសវនាការជាមួយ ព្រះករុណា ព្រះមហាក្សត្រ ឯកឧត្តម នាយករដ្ឋមន្រ្តី ណារិនដ្រា ម៉ូឌី បានថ្វាយសំណើជួសជុលគំនូរនៅលើថែវស្ដីពីរឿងរាមាយណៈ នៅក្នុងព្រះបរមរាជវាំង»។
ក្រសួងបញ្ជាក់ថា៖ «ភាគីទាំង២ បានសម្ដែងនូវទំនុកចិត្តយ៉ាងមុតមាំថា មូលដ្ឋានដ៏រឹងមាំនៃទំនាក់ទំនងទ្វេភាគី នឹងក្លាយជាកម្លាំងចលករដ៏សំខាន់ ដើម្បីបន្តជំរុញឱ្យកិច្ចសហប្រតិបត្តិការដ៏ល្អប្រសើរលើគ្រប់វិស័យដែលជាផលប្រយោជន៍រួមកាន់តែមានភាពរីកចម្រើន និងស៊ីជម្រៅ សំដៅឆ្ពោះទៅរកអនាគតដ៏ត្រចះត្រចង់ និងប្រកបដោយវិបុលភាពសម្រាប់ប្រទេសទាំង២»។
ព្រះករុណា ព្រះមហាក្សត្រ ទ្រង់សព្វព្រះរាជហឫទ័យអញ្ជើញលោកស្រី Murmu ទៅបំពេញទស្សនកិច្ចផ្លូវរដ្ឋនៅកម្ពុជា តាមពេលវេលាសមស្រប។ លោកស្រី បានសម្ដែងនូវអំណរព្រះរាជគុណថ្វាយ ព្រះករុណា ព្រះមហាក្សត្រ និងទទួលយកការអញ្ជើញដោយសេចក្តីសោមនស្សរីករាយ៕
