មន្ត្រីយោធាកម្ពុជាដែលរងរបួសត្រូវបានមន្ត្រីយោធាសែងយកទៅជួយសង្គ្រោះ។ រូបថត សហការី
បន្ទាយមានជ័យៈ មន្ត្រីយោធាខ្មែរម្នាក់ បានរងរបួសធ្ងន់ បន្ទាប់ពីបានចូលរួមកាប់ឆ្ការព្រៃ ដើម្បីចូលទៅជួយស្ត្រីជនជាតិថៃម្នាក់ ដែលត្រូវរបួសដាច់ជើងម្ខាង ដោយសារគ្រាប់មីន ហើយបានជាន់ប៉ះចំលើគ្រាប់មីន ១ គ្រាប់ផ្សេងទៀត បណ្ដាលឱ្យផ្ទុះឡើង។
លោក ង៉ា ស្រស់ នាយនគរបាលប៉ុស្តិ៍ស្ដីទី នៃរដ្ឋបាលឃុំគោករមៀត បានប្រាប់ភ្នំពេញប៉ុស្តិ៍ថា ហេតុការណ៍ផ្ទុះមីនដ៏អាក្រក់នោះ បានកើតឡើងកាលពីព្រឹកថ្ងៃទី២៩ ខែឧសភា ឆ្នាំ២០២៣ នៅចំណុចព្រំដែនកម្ពុជា-ថៃ ត្រង់ចន្លោះបង្គោលសីមាលេខ៣៧-៣៨ ស្ថិតក្នុងភូមិសាស្ត្រ ភូមិក្តឹបថ្ម ឃុំគោករមៀត ស្រុកថ្មពួក ខេត្តបន្ទាយមានជ័យ ទល់មុខនឹងភូមិអំពិល ឃុំថាប់ថៃ ស្រុកតាប្រាយ៉ា ខេត្តស្រះកែវ ប្រទេសថៃ។
លោកបានបន្តថា មុនពេលកើតហេតុ មានកម្មករស៊ីឈ្នួលដកដំឡូងមីនៅតាមព្រំដែន ជាច្រើននាក់ បានប្រទះឃើញស្ត្រីជនជាតិថៃម្នាក់ ឈ្មោះ សំរឹទ្ធ រៃរឿន មានទីលំនៅក្នុងភូមិអំពិល ឃុំថាប់ថៃ ស្រុកតាប្រាយ៉ា បានដើរឆ្លងចូលមកដកផ្សិត និងបេះបន្លែនៅតាមដងព្រៃនៃតំបន់ស ដែលជាតំបន់ហាមឃាត់ ក្នុងទឹកដីនៃប្រទេសកម្ពុជា។
លោកបានបញ្ជាក់ថា៖«បន្ទាប់មក ពួកគេក៏ឮស្នូរសំឡេងផ្ទុះមីន ហើយសង្ស័យថា ស្ត្រីជនជាតិថៃនោះ ពិតជាត្រូវរបួសដោយសារគ្រាប់មីនមិនខាន ក៏បានរាយការណ៍ប្រាប់មកមន្ត្រីយោធារបស់យើង ដែលប្រចាំការនៅតំបន់អភិវឌ្ឍន៍ភ្នំឆត្រ ឱ្យចុះទៅជួយសង្គ្រោះស្ត្រីជនជាតិថៃនោះ។ នៅពេលចុះអន្តរាគមន៍ មន្ត្រីយោធាយើងម្នាក់ ឈ្មោះ សេង ឆន ក៏ដើរទៅជាន់ប៉ះចំគ្រាប់មីន បណ្ដាលឱ្យផ្ទុះ រងរបួសចំភ្នែក»។
បើតាមលោក ង៉ា ស្រស់ ថ្វីបើមានករណីនេះកើតឡើងចំពោះមន្ត្រីយោធាក៏ដោយ ក៏កងកម្លាំងយោធាកម្ពុជា នៅតែបន្តចុះអន្តរាគមន៍ រុករកស្ត្រីជនជាតិថៃ នៅក្នុងព្រៃចម្ការមីនដ៏គ្រោះថ្នាក់នោះ រហូតដល់បានប្រទះឃើញ និងបាននាំយកស្ត្រីរងគ្រោះនោះ ទៅប្រគល់ឱ្យអាជ្ញាធរថៃ ជាប់ព្រំដែនយកទៅព្យាបាលរបួស។
ចំណែកមន្ត្រីយោធាខ្មែរដែលរងរបួស ត្រូវបានបញ្ជូនទៅកាន់មន្ទីរពេទ្យយោធាភូមិភាគ៥ ក្នុងខេត្តបាត់ដំបង។
ជុំវិញករណីនេះដែរ លោក ឌី សិលា ដែលជាមន្ត្រីយោធា ប្រចាំតំបន់អភិវឌ្ឍន៍ភ្នំឆត្រ និង ដែលបានចូលរួមនៅក្នុងប្រតិបត្តិការរុករក និងជួយសង្គ្រោះស្ត្រីជនជាតិថៃខាងលើ បានប្រាប់ភ្នំពេញប៉ុស្តិ៍ថា តំបន់ដែលស្ត្រីជនជាតិថៃ បានឆ្លងចូលមកដកផ្សិត និងបេះបន្លែ នោះជាតំបន់ហាមឃាត់ និងជាព្រៃចម្ការមីន។
លោកបានបញ្ជាក់ថា៖«យើងបានបន្តរាវដោះមីន និងកាប់ឆ្ការព្រៃចូលទៅរកស្ត្រីជនជាតិថៃ ដែលសង្ស័យថា រងរបួស ដោយសារគ្រាប់មីនទៅទីនោះ។ ទីបំផុតក្រុមការងារយើង បានប្រទះឃើញគាត់បានដេកសន្លប់ស្ដូកស្ដឹង ក្នុងថ្លុកឈាម ជាមួយនឹងរបួសដាច់ជើងម្ខាង»។
លោកបានបន្តថា តាមការប្រាប់ឱ្យដឹងពីក្រុមគ្រូពេទ្យថៃ ដែលបានចូលមកសួរសុខទុក្ខ លោក សេង ឆន ក្នុងមន្ទីរពេទ្យយោធភូមិភាគ៥ក្នុងខេត្តបាត់ដំបង កាលពីរសៀលថ្ងៃទី៣០ ខែឧសភា ស្ត្រីជនជាតិថៃ បានដឹងខ្លួនឡើងវិញហើយ។ ស្ត្រីរូបនោះ ក៏បានផ្ដាំមកថ្លែងអំណរគុណ ដល់កងកម្លាំងយោធាកម្ពុជា ដែលបានប្រថុយជីវិត ចូលទៅជួយសង្គ្រោះគាត់ពីតំបន់គ្រោះថ្នាក់នោះ។
លោកសិលា បានបន្ថែមថា ចំណែកលោក សេង ឆន នៅពេលនេះកំពុងរង់ចាំលទ្ធផលនៃការវះកាត់របួសភ្នែករបស់គាត់ ពីក្រុមគ្រូពេទ្យជំនាញ៕
