លោកអុិត សំហេង នៅក្នុងពិធីផ្សព្វផ្សាយការងារគ្រប់គ្រងហត្ថពលកម្មជនបរទេសកាលពីថ្ងៃទី ៣១ ឧសភា។ រូបថត ក្រសួងការងារ
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ អំពាវនាវដល់ម្ចាស់សហគ្រាស គ្រឹះស្ថាន ដែលមានជនបរទេសបម្រើការងារ ចាំបាច់ត្រូវតែបង្ហាញការដាក់ពាក្យស្នើសុំបណ្ណការងារ និងសៀវភៅការងារជនបរទេសនៅពេលមន្ត្រីក្រសួងការងារចុះធ្វើអធិការកិច្ចហត្ថពលកម្មបរទេសដល់ទីតាំងផ្ទាល់។ នេះបើយោងតាមសេចក្ដីណែនាំរបស់ក្រសួងចុះថ្ងៃទី ៣១ ខែឧសភា ឆ្នាំ ២០២៣។
ការណែនាំនេះ បន្ទាប់ពីក្រសួងការងារសង្កេតឃើញថា ក្នុងការចុះធ្វើអធិការកិច្ចហត្ថពលកម្មបរទេសកន្លងមក នៅមានការបកស្រាយផ្សេងៗគ្នារវាងម្ចាស់ ឬនាយកសហគ្រាស គ្រឹះស្ថាន ឬជនបរទេស និងមន្ត្រីអធិការកិច្ចហត្ថពលកម្មបរទេសទៅលើបណ្ណការងារ និងសៀវភៅការងារជនបរទេស ដែលទើបដាក់ពាក្យស្នើសុំធ្វើបណ្ណការងារនិងសៀវភៅការងារជនបរទេស ក្នុងប្រព័ន្ធគ្រប់គ្រងទិន្នន័យកម្លាំងពលកម្មតាមប្រព័ន្ធស្វ័យប្រវត្តិកម្ម (www.fwcms.mlvt.gov.kh)។
នៅក្នុងសេចក្ដីណែនាំនោះ ក្រសួងការងារបានតម្រូវឱ្យម្ចាស់សហគ្រាសឬជនបរទេសអនុវត្ត ទី១ នៅពេលចុះអធិការកិច្ចហត្ថពលកម្មបរទេស ហើយត្រួតពិនិត្យឃើញមានសហគ្រាស គ្រឹះស្ថាន ឬជនបរទេស បានដាក់ពាក្យស្នើសុំធ្វើបណ្ណការងារ និងសៀវភៅការងារជនបរទេស នៅក្នុងប្រព័ន្ធ www.fwcms.mlvt.gov.kh ហើយទទួលបានការអនុម័តកម្រិតទី ១ (កម្រិតការិយាល័យជំនាញ) រួចហើយ ចាត់ទុកថាសហគ្រាស គ្រឹះស្ថាន ឬជនបរទេស បានអនុវត្តត្រឹមត្រូវតាមច្បាប់ស្តីពីការងារ និងមិនទទួលរងការពិន័យភ្លាមលើករណីលិខិតអនុញ្ញាតឱ្យប្រើប្រាស់ហត្ថពលកម្មបរទេស និងករណីបណ្ណការងារ និងសៀវភៅការងារជនបរទេស។
ទី២ ម្ចាស់ ឬនាយកសហគ្រាស គ្រឹះស្ថាន ឬជនបរទេស ត្រូវតែបង្ហាញលទ្ធផលនៃការដាក់ពាក្យស្នើសុំ ក្នុងប្រព័ន្ធ www.fwcms.mlvt.gov.kh ដូចជា បង្កាន់ដៃបង់ប្រាក់ ឬបណ្ណការងារ និងសៀវភៅការងារជនបរទេសក្នុងរយៈពេល ២០ ថ្ងៃដល់ក្រុមចម្រុះអធិការកិច្ចហត្ថពលកម្មបរទេស បន្ទាប់ពីថ្ងៃដែលពិនិត្យឃើញ។ ទី៣ ក្នុងករណីម្ចាស់ឬនាយកសហគ្រាស គ្រឹះស្ថាន ឬជនបរទេស មិនបានបង្ហាញលទ្ធផលតាមការកំណត់ដូចក្នុងចំណុចទី ២ខាងលើ មន្ត្រីអធិការកិច្ចហត្ថពលកម្មបរទេស ត្រូវអនុវត្តតាមនីតិវិធីច្បាប់ជាធរមាន។
ពាក់ព័ន្ធករណីនេះលោក គួច ចំរើន អភិបាលខេត្តព្រះសីហនុ ធ្លាប់បានបញ្ជាក់កាលពីថ្ងៃទី ២៣ ខែឧសភា ឆ្នាំ ២០២៣ ថា រដ្ឋបាលខេត្តនឹងរង់ចាំសហការចុះប្រតិបត្តិការ ព្រមទាំងបានណែនាំឱ្យមន្ទីរការងារ និងបណ្តុះបណ្តាលវិជ្ចាជីវ: ត្រៀមរៀបចំមន្ត្រី ស្នងការដ្ឋាននគរបាលខេត្ត និងកងរាជអាវុធហត្ថ ត្រៀមចូលរួមសហការក្នុងការចុះប្រតិបត្តិការតាមទីតាំងដើម្បីពិនិត្យមើលពីបណ្ណការងារនិងសៀវភៅការងារជនបរទេស។
លោកបានថ្លែងថា៖ «ការត្រួតពិនិត្យនេះនឹងជំរុញឱ្យមានសន្តិសុខសណ្តាប់ធ្នាប់ល្អក្នុងការគ្រប់គ្រងឱ្យគ្រប់ជ្រុងជ្រោយ ទោះបីការចុះប្រតិបត្តិការវាមានការខ្វះខាត ក៏ប៉ុន្តែមន្ត្រីពាក់ព័ន្ធត្រូវសហការគ្នាចុះធ្វើប្រតិបត្តិការ និងធ្វើអធិការកិច្ចហត្ថពលកម្មបរទេសនៅក្នុងខេត្ត»។
លោកបានឱ្យដឹងថា៖ «ជនបរទេសនៅខេត្តព្រះសីហនុ នាពេលបច្ចុប្បន្នមានបណ្ណការងារសឹងតែ ១០០ ភាគរយហើយការធ្វើសៀវភៅការងារនេះ គឺដើម្បីប្រមូលថវិកាចូលថវិកាជាតិ និងផ្តល់កិច្ចសហការពេញទំហឹង ដើម្បីឱ្យដំណើរការប្រព្រឹត្តទៅបានល្អ»។
ទន្ទឹមនោះដែរ លោកស្នើសុំឱ្យធ្វើផែនការដោយការទទួលខុសត្រូវ និងមានតម្លាភាពដើម្បីឈានទៅគ្រប់គ្រងភ្ញៀវបរទេសស្នាក់នៅក្នុងការកាត់បន្ថយបទល្មើស ត្រៀមចុះពិនិត្យក្រុមហ៊ុនដែលបានធ្វើស្វ័យប្រកាសរួចហើយក្នុងខេត្តព្រះសីហនុ»។
បន្ថែមពីនេះលោក គួច ចំរើន អំពាវនាវឱ្យម្ចាស់ក្រុមហ៊ុន សណ្ឋាគារ កាស៊ីណូ ដែលកំពុងធ្វើអាជីវកម្មនៅក្នុង ខេត្តព្រះសីហនុ ត្រូវធ្វើស្វ័យប្រកាសឱ្យបានត្រឹមត្រូវ មានតម្លាភាព ហើយប្រសិនបើក្រុមការងារចុះត្រួតពិនិត្យរកឃើញមានជនបរទេសស្នាក់នៅមិនមានបណ្ណការងារនឹងតម្រូវឱ្យមានការផាកពិន័យតាមច្បាប់របស់កម្ពុជា។
កន្លងមកដោយអនុវត្តតាមច្បាប់ស្តីពីអន្តោប្រវេសន៍ និងច្បាប់ស្តីពីការងារ ក្រសួងមហាផ្ទៃបានសហការចុះធ្វើអធិការកិច្ចហត្ថពលកម្មបរទេសតាមសហគ្រាសគ្រឹះស្ថានដែលបានចាប់ផ្តើមដំណើរការតាំងពីឆ្នាំ២០០០មក។
ក្រសួងការងារបានបញ្ជាក់ថា ការចុះធ្វើអធិការកិច្ចហត្ថពលកម្មបរទេសគឺសំដៅកាត់បន្ថយជាអតិបរមា និងឈានទៅរកការលុបបំបាត់នូវការប្រើប្រាស់ហត្ថពលករបរទេសមិនស្របច្បាប់ តាមគោលដៅ ឬទីតាំងអាជីវកម្មនានា តែមិនបានធ្វើឱ្យមានការប៉ះពាល់ ឬមួយរំខានដល់មជ្ឈដ្ឋានជនបរទេសដែលកំពុងស្នាក់នៅ ប្រកបមុខរបរ និងធ្វើការស្របច្បាប់នៅកម្ពុជានោះទេ៕
