ក្រសួងសុខាភិបាលអំពាវនាវឱ្យចាក់វ៉ាក់សាំងកូវីដ ១៩ ដូសជំរុញដល់ប្រជាជន ដែលមានអាយុចាប់ពី ៣ ឆ្នាំឡើង ដោយក្រសួងបញ្ជាក់ថា ក្នុងពេលថ្មីៗនេះ វីរុសកូវីដ ១៩ បំប្លែងថ្មីពពួក Omicron XBB.1.5 ។ រូបថត ក្រសួងសុខាភិបាល
ភ្នំពេញៈ ក្រសួងសុខាភិបាលអំពាវនាវឱ្យចាក់វ៉ាក់សាំងកូវីដ ១៩ ដូសជំរុញដល់ប្រជាជន ដែលមានអាយុចាប់ពី ៣ ឆ្នាំឡើង ដោយក្រសួងបញ្ជាក់ថា ក្នុងពេលថ្មីៗនេះ វីរុសកូវីដ ១៩ បំប្លែងថ្មីពពួក Omicron XBB.1.5 និងពពួកថ្មីៗទៀត កំពុងមានការឆ្លងរីករាលដាលនៅតាមបណ្ដាប្រទេសមួយចំនួននៅលើសកលលោក និងនៅក្នុងតំបន់។
ក្រសួងបញ្ជាក់ក្នុងសេចក្តីជូនដំណឹងនាថ្ងៃទី ២ ខែមិថុនា ថា៖ «សូមធ្វើការក្រើនរំឭកជម្រាបជូនសាធារណជនអំពីការចាក់វ៉ាក់សាំងកូវីដ ១៩ ដូសជំរុញ តាមគោលការណ៍ស្ម័គ្រចិត្ត និងដោយមានការកែសម្រួលគម្លាតនៃការចាក់វ៉ាក់សាំងដូសជំរុញ ណែនាំពីអង្គការសុខភាពពិភពលោក ដោយគម្លាតនៃការចាក់វ៉ាក់សាំងកូវីដ ១៩ ដូសជំរុញត្រូវធ្វើចាប់ពី ៦ ខែឡើង បន្ទាប់ពីចាក់ដូសចុងក្រោយ»។
ចំពោះកុមារ ដែលមានអាយុចាប់ពី ៣ ឆ្នាំដល់អាយុក្រោម ៥ ឆ្នាំទាំងអស់ដែលបានចាក់វ៉ាក់សាំងកូវីដ ១៩ ដូសទី ១ និង ដូសទី ២ (ដូសមូលដ្ឋាន) រួចរាល់ ហើយមានគម្លាតចាប់ពី ៦ ខែឡើង បន្ទាប់ពីការចាក់វ៉ាក់សាំងកូវីដ ១៩ ដូសចុងក្រោយ ក្រសួងអំពាវនាវដល់អាណាព្យាបាលរួសរាន់នាំកូន ក្មួយ ឬចៅ ទៅទទួលយកការចាក់វ៉ាក់សាំងកូវីដ ១៩ ដូសទី ៣ ឬដូសទី ៤ ឱ្យបានគ្រប់ៗគ្នា។
សេចក្តីជូនដំណឹងបញ្ជាក់ថា៖ «ចំពោះកុមារ ដែលមានអាយុចាប់ពី ៥ ឆ្នាំ ដល់អាយុក្រោម ១២ ឆ្នាំទាំងអស់ដែលបានចាក់វ៉ាក់សាំងកូវីដ ១៩ ដូសទី ១ និងដូសទី ២ (ដូសមូលដ្ឋាន) រួចរាល់ ហើយមានគម្លាតចាប់ពី ៦ ខែឡើង បន្ទាប់ពីការចាក់វ៉ាក់សាំងកូវីដ ១៩ ដូសចុងក្រោយ សូមអាណាព្យាបាលរួសរាន់នាំកូន ក្មួយ ឬចៅ ទៅទទួលយកការចាក់វ៉ាក់សាំងកូវីដ ១៩ ដូសទី ៣ ដូសទី ៤ ឬដូសទី ៥ ឱ្យបាន គ្រប់ៗគ្នា»។
ចំពោះប្រជាជនដែលមានអាយុចាប់ពី ១២ ឆ្នាំឡើងទាំងអស់ដែលបានចាក់វ៉ាក់សាំងកូវីដ ១៩ ដូសទី ១ និងដូសទី ២ ឬបានចាក់វ៉ាក់សាំងចនសុន និងចនសុន (Johnson & Johnson) ចំនួន ១ ដូស (ដូសមូលដ្ឋាន) រួចរាល់ ហើយមានគម្លាតចាប់ពី ៦ ខែឡើង បន្ទាប់ពីការចាក់ វ៉ាក់សាំងកូវីដ ១៩ ដូសចុងក្រោយ ក្រសួងអំពាវនាវឱ្យរួសរាន់ទៅទទួលការចាក់វ៉ាក់សាំងកូវីដ ១៩ ដូសទី ៣ ដូសទី ៤ ដូសទី ៥។
ក្រសួងបញ្ជាក់ថា៖ «សូមអំពាវនាវដល់ពុក ម៉ែ បង ប្អូន ក្មួយៗ ប្រជាពលរដ្ឋគ្រប់ក្រុមអាយុទាំងអស់ចាប់ពី ៣ ឆ្នាំឡើង ដែលមិនទាន់បានចាក់វ៉ាក់សាំងកូវីដ ១៩ ដូសមូលដ្ឋាន ឬដូសជំរុញដូចបានរៀបរាប់ខាងលើ សូមអញ្ជើញទៅទទួលយកការចាក់វ៉ាក់សាំងកូវីដ ១៩ ដូសទី ១ និងដូសទី ២ (ដូសមូលដ្ឋាន) ដូសទី ៣ ដួសទី ៤ ដូសទី ៥ ឬដូសទី ៦ តាមក្រុមអាយុ និងទីតាំងដែលបានជម្រាបជូនខាងលើឱ្យបានគ្រប់ៗគ្នា»៕
