ពិធីចុះហត្ថលេខារវាងក្រសួងបរិស្ថាន និងតំណាងទីភ្នាក់ងារ JICA កាលពីថ្ងៃទី១៣ ខែមិថុនា ។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថាន និងទីភ្នាក់ងារសហប្រតិបត្តិការអន្តរជាតិជប៉ុន (JICA) បានចុះហត្ថលេខារួមគ្នា ដើម្បីដាក់ឱ្យដំណើរការគម្រោងពង្រឹងសមត្ថភាពលើការត្រួតពិនិត្យការបំពុលទឹក សំដៅគ្រប់គ្រង់ធនធានទឹកនៅកម្ពុជាឱ្យកាន់តែមានគុណភាពខ្ពស់។
គម្រោងពង្រឹងសមត្ថភាពលើការត្រួតពិនិត្យការបំពុលទឹកនេះ ត្រូវបានចុះហត្ថលេខាដោយលោក សៅ សុភាព រដ្ឋលេខាធិការក្រសួងបរិស្ថាន និងលោក SANUI Kazumasa តំណាងទីភ្នាក់ងារសហប្រតិបត្តិការអន្តរជាតិប្រទេសជប៉ុនប្រចាំកម្ពុជា (JICA)នាទីស្តីការក្រសួងបរិស្ថាន កាលពីថ្ងៃទី ១៣ ខែមិថុនា ឆ្នាំ ២០២៣។
ពាក់ព័ន្ធនឹងការចុះហត្ថលេខារួមគ្នានេះ លោក នេត្រ ភក្ត្រា អ្នកនាំពាក្យក្រសួងបរិស្ថាន បានប្រាប់ឱ្យដឹងនៅថ្ងៃទី១៤ ខែមិថុនាថា នេះគឺជាកិច្ចសហការដ៏មានសារៈសំខាន់ ដែលក្រសួងបរិស្ថាន មានតួនាទីភារកិច្ចនៅក្នុងការគ្រប់គ្រងគុណភាពទឹក ពិសេសសំណល់រាវ ដែលបង្ហូរចេញពីបណ្តារោងចក្រ កន្លែងទីតាំងប្រើប្រាស់ផ្សេងៗ ដែលទាមទារត្រូវមានការគ្រប់គ្រងសំណល់រាវឱ្យបានល្អ។
លើសពីនេះ លោកបញ្ជាក់ថា ៖ «គម្រោងនេះ ក៏បានផ្តោតសំខាន់ទៅលើការគ្រប់គ្រងសំណល់កខ្វក់ ត្រួតពិនិត្យលើការធ្វើប្រព្រឹត្តិកម្មទឹកកខ្វក់កុំឱ្យមានការបំពុលទឹកណាមួយ មុនបង្ហូរចូលទៅកាន់ប្រភពទឹកធម្មជាតិជាដើម»។
ក្រសួងបរិស្ថាន បានលើកឡើងថា ដោយពិនិត្យឃើញពីសារៈប្រយោជន៍នៃគម្រោងកិច្ចសហប្រតិបត្តិការនេះ ទើបអគ្គនាយកដ្ឋានគាំពារបរិស្ថាន បានសហការជាមួយក្រុមការងារបច្ចេកទេសរបស់ JICA រៀបចំគម្រោងកិច្ចសហការជំហានទី២ ស្តីពី «ការពង្រឹងសមត្ថភាពលើការគ្រប់គ្រងការបំពុលទឹក»នេះឡើង។
គម្រោងនេះមានរយៈពេល៣ឆ្នាំ ដោយគ្រោងនឹងអនុវត្តចាប់ពីឆ្នាំ២០២៣នេះតទៅ ដោយរំពឹងថា ការអនុវត្តគម្រោងនឹងធ្វើឱ្យប្រសើរឡើងនូវសុក្រឹតភាព និងភាពអាចជឿជាក់បាននៃការវិភាគគុណភាពទឹក ដោយមន្ទីរពិសោធន៍នៃក្រសួងបរិស្ថាន។
បង្កើតប្រព័ន្ធត្រួតពិនិត្យតាមដានគុណភាពទឹកលើដី និងសំណល់រាវនៅតាមតំបន់គោលដៅ, ទទួលបានការពង្រឹងសមត្ថភាពក្នុងការរៀបចំបង្កើតផែនការគ្រប់គ្រងគុណភាពទឹក និងទទួលបានវិធានអនុវត្តន៍ត្រឹមត្រូវទាក់ទងទៅនឹងវិធីសាស្ត្រអនុវត្តន៍អនុក្រឹត្យស្តីពី ការត្រួតពិនិត្យការបំពុលទឹក ត្រូវបានផ្សព្វផ្សាយទៅកាន់ភាគីពាក់ព័ន្ធរួមមាន រដ្ឋបាលថ្នាក់ក្រោមជាតិ និងវិស័យឯកជនជាដើម។
សូមបញ្ជាក់ផងដែរថា រយៈពេលកន្លងមក អគ្គនាយកដ្ឋានគាំពារបរិស្ថាននៃក្រសួងបរិស្ថាន បានអនុវត្តគម្រោងស្តីពីការអនុវត្តប្រកបដោយប្រសិទ្ធភាពនូវការវាយតម្លៃហេតុប៉ះពាល់បរិស្ថាន និងត្រួតពិនិត្យការបំពុលតាមរយៈការអភិវឌ្ឍសមត្ថភាពមន្ត្រីក្រសួងបរិស្ថានជំហានទី១ ដែលមានរយៈពេល៣ឆ្នាំកន្លះ។
គម្រោងនោះ ធ្វើឡើងក្រោមជំនួយបច្ចេកទេសពីទីភ្នាក់ងារសហប្រតិបត្តិការអន្តរជាតិប្រទេសជប៉ុន ក្នុងគោលបំណងពង្រឹងសមត្ថភាពមន្ត្រីនៃអគ្គនាយកដ្ឋានគាំពារបរិស្ថានលើការត្រួតពិនិត្យ ទប់ស្កាត់ និងកាត់បន្ថយការបំពុលបរិស្ថានដោយផ្តោតលើការវាយតម្លៃហេតុប៉ះពាល់បរិស្ថាន (EIA) និងទឹក។
តាមរយៈនៃការអនុវត្តគម្រោងកិច្ចសហប្រតិបត្តិការនេះ ក្រសួងបរិស្ថាន បានអះអាងថា គម្រោងនេះពិតជាបានជួយពង្រឹងសមត្ថភាពជូនទៅដល់មន្ត្រីជំនាញនៃអគ្គនាយកដ្ឋានគាំពារបរិស្ថាន សម្រាប់អនុវត្តការងារប្រចាំថ្ងៃពាក់ព័ន្ធនឹងការងារត្រួតពិនិត្យ ទប់ស្កាត់ និងកាត់បន្ថយការបំពុលបរិស្ថាន សំដៅការពារសុខភាពសាធារណៈ និងការអភិរក្សជីវចម្រុះកាន់តែប្រសើរឡើង៕
