ជ្រុង ១ នៃទិដ្ឋភាពឧទ្យានជាតិព្រះសុរាម្រិត-កុសមៈ (គិរីរម្យ)។ ក្រសួងបរិស្ថាន
កំពង់ស្ពឺៈ ក្រសួងបរិស្ថាន បានធ្វើការផ្សព្វផ្សាយពីសក្តានុពលនៃឧទ្យានជាតិព្រះសុរាម្រិត-កុសមៈ (គិរីរម្យ) ថា ជាតំបន់ប្រកបទៅ ដោយព្រៃស្រល់ធម្មជាតិ និងមានរុក្ខជាតិតំបន់ត្រូពិកជាច្រើនប្រភេទ វាលស្មៅ ព្រៃស្រោង ជួរភ្នំ លម្អទៅដោយជ្រោះទឹកធ្លាក់ជាច្រើនដំណាក់ច្រើនអន្លើ និងទំនប់ទឹកកែច្នៃពីតាមជ្រលងភ្នំជាច្រើន។
ក្រសួងបរិស្ថានបន្តថា បន្ថែមលើសពីនោះ ឧទ្យានជាតិនេះ មានវត្តមានសត្វព្រៃជាច្រើនប្រភេទ ជាពិសេសមានវត្តមានហ្វូងសត្វ ដំរីព្រៃអាស៊ីផងដែរ ដោយលាតសន្ធឹងនៅលើខ្ពង់រាបមានរយៈកម្ពស់ខ្ពស់បង្គួរ។
ដោយសារមានអាកាសធាតុត្រជាក់ជាងតំបន់ផ្សេងៗនៃប្រទេសកម្ពុជា និងទទួលរបបទឹកភ្លៀងច្រើនផងនោះ បានធ្វើឱ្យឧទ្យានជាតិ ព្រះសុរាម្រិត-កុសមៈ សម្បូរទៅដោយ អនុផលព្រៃឈើរាប់សិបជំពូក ដែលផ្តល់ជាគុណប្រយោជន៍ផ្នែកសុខភាព និងសេដ្ឋកិច្ច សង្គម សម្រាប់ប្រជាសហគមន៍ក្នុងតំបន់។
ដោយមានលក្ខណពិសេសដាច់ដោយឡែកនៃធនធានធម្មជាតិ ជាពិសេស ព្រៃស្រល់ធម្មជាតិ សត្វព្រៃ រួមជាមួយទឹកធ្លាក់ដ៏ស្រស់ស្អាតនៃឧទ្យានជាតិនេះ បានប្រែក្លាយតំបន់នេះជាទិសដៅទេសចរណ៍ធម្មជាតិដ៏ទាក់ទាញ៕
